Ol Fas Fasfala Woman blong Restoresen
Jane I Glad tru long Rod
?Yumi yumi olsem Jane Manning James, we yumi tingting strong blong finisim rod blong yumi wetem fet?
Pikja droing we i kam long Toni Oka
Jane Manning James i bin taet blong stap wokbaot, be hem i no agri blong stop.
Olfala boe blong hem, Sylvester, i bigwan inaf blong wokbaot narasaed long han kat. Be bebi Silas, we i bin bon i kam long wol long rod nomo, i nidim blong oli karem hem yet. I bin 1847, mo i no longtaem, famli James bae oli wan long ol fas paeonia blong kam long vale blong Bigfala Sol Lek.
Jane i save gud ol longfala rod.
Fo yia bifo taem ia, famli blong hem i bin lego hom blong olgeta long wan siti long Is blong joenem Ol Sent long Nauvu, long en blong rod we i seperetem tu kantri long Wes. Trip ia i sapos blong tekem sam dei nomo long reva. Be from se fulap blak man oli bin ol slef long Yunaeted Stet long taem ia, i mekem se oltaem famli blong Jane i mas soem ol pepa blong pruvum se oli ol fri man. Mo sam ples oli gat ol strong loa we i stopem ol pipol we skin kala i defren blong travel tru long eria ia—mo tu, oli mekem olgeta i pem $500 (samples 50,000 vatu) long wan man.
Maet from se fi ia i sas tumas o ating from ol nara tingting we ol man i gat long olgeta, i mekem se kru blong bot oli no agri blong tekem Jane mo ol famli memba blong hem i go moa longwe. Nomata long hemia, oli lego fulap long ol samting blong olgeta i stap mo wokbaot leg nomo wetem wanem oli save karem.
Famli blong Jane i wokbaot i bitim 1,287 kilometa. Oli wokbaot tru long ol dei we i hot tumas mo ol naet we i tudak evriwan. Long wan taem, oli wokbaot tru long wan bigfala bus mo slip andanit long open skae. Taem oli wekap, klos blong olgeta i waet long aes.
“Mifala i wokbaot kasem taem ol sus blong mifala i brokbrok, mo ol leg blong mifala i soa mo skin i open mo blad,” Jane i tingbaot. “… Mifala i bin askem God Papa we I No Save Finis blong i hilim ol leg blong mifala mo ol prea blong mifala i bin ansa.”1
Taem Jane i stap stanap strong kasem en blong had rod ia, hem i stap singsing ol hym wetem papa, mama mo ol brata mo sista blong hem mo presem God. Mo afta, kolosap afta tri manis blong stap wokbaot, oli kasem Nauvu. Plante yia afta, taem ol fetful Sent oli krosem ol bigfala grin spes, Jane i stap long medel blong ol fas paeonia blong stat wokbaot long longfala rod ia.