Stap Lukaotem blong Kam Fulwan Olsem Kraes
I Kam long Elda Jeffrey R. Holland
Blong Kworom blong Olgeta Twelef Aposol
I kamaot long wan toktok long wan maltirijin yang adalt divosen, “The Measure of the Stature of the Fulness of Christ,” we hem i bin givim long Stanford, Kalifonia, YSA, long 9 Febwari 2020.
Long Ista sisen ia, mekem rod blong yu i go long Jisas Kraes mo lukaotem voes blong Hem we i mekem tingting i kwaet mo i givim pis.
Yu No Stap Fraet, i kam long Michael Malm
Bae mi givim sam tingting abaot samting ia we wanwan long yufala bae i mekem taem bae yufala i lukaotem blong kam “fulwan” olsem Kraes we i bigman (luk long Efesas 4:13). Mi hop se bae i impoten long yu long taem ia long laef blong laef we yu stap lanem samting, mo wetem ol situesen we yu stap long hem.
Sam long yufala i stap finis long ples we yufala i wantem stap long hem, o, yufala i save finis weaples yufala i wantem go long hem long laef blong yufala. Sam long yufala, i luk se, yufala i gat plante blesing mo gat ol gudfala joes i stap long fored blong yufala. Sam long yufala, bae i gat sam taem mo sam risen we, i gat ol rod we i no gud tumas mo yufala i no wantem tumas oli stap long fored blong yufala.
Be, i nomata weaples yu stap go long hem, mo i nomata hao yu wok tru long ol jalenj blong kasem ples ia, mi askem yu blong kam long Sevya, Jisas Kraes, olsem strong fas step ia blong kasem ples we yu wantem go long hem, blong yu faenem hapines mo paoa blong yuwan, mo blong kasem las ples mo sakses blong yu (luk long 1 Nifae 10:18; 2 Nifae 26:33; Omnae 1:26; Doktrin mo Ol Kavenan 18:11).
Evri samting ia oli save blong yu nomo sapos ansa blong kwestin “?Yu yu stap go wea?” (Moses 4:15) hem i “Weaples we yu yu stap go long hem Lod.”
Laef i givim plante jalenj. Yumi gat ol harem nogud, mo ol rigret, mo ol ril problem blong dil wetem. Yumi gat ol taem we tingting i no glad mo i harem nogud, evri kaen taem we i gud tumas, mo we i nogud tumas. Be Lod mo ol profet oli talem inaf toktok blong leftemap tingting abaot wei blong fesem ol problem blong fulumap wan bigfala jenol.
“Pis, Mi Lego Wetem Yu”
Prea blong Sevya long ol disaepol blong Hem iven taem Hem i bin stap go blong harem nogud mo safa long Getsemane mo Kalvari, i ol toktok we i tajem man bigwan. Long naet ia, naet blong bigfala safaring we i eva tekem ples long wol ia, o bae i eva tekem ples, Sevya i talem: “Pis, mi lego wetem yu, pis blong mi, mi givim long yu. … Yufala i no letem tingting blong yufala i trabol, yufala i no fraet.” (Jon 14:27).
!Hemia i wan nambawan wei blong luk long laef long wan taem we i prapa nogud tru! ?Olsem wanem nao Hem i save talem toktok ia taem bae Hem i fesem wanem we Hem i save se bae Hem i fesem? !Hem i save talem hemia from se, Jos blong Hem, i Jos mo gospel we en blong hem i hapi nomo! Long yumi, yumi winim faet finis. Hem i lukluk longlongwe; Hem i stap serem bigfala pikja.
Mi stap ting se sam long yumi, i mas stil holemtaet wan kaen kastom ia we i talem se, hem i rong blong man i mekem tingting blong yumi i harem gud, o i helpem yumi, se yumi sapos blong no stap gud evri taem. Mi talem se “stap glad” (Jon 16:33) long rod ia blong lukaotem blong kam fulwan olsem Kraes we i kam bigman (luk long Efesas 4:13); maet hemia i komanmen ia we, iven insaed long hat blong ol Lata-dei Sent we oli no fetful, oli no stap obei long hem raon long wol, mo yes, i tru, i no gat wan samting we bae i mekem hat blong Lod we i gat sore, i harem nogud.
Bae mi wari tumas sapos, samtaem long laef blong olgeta, wan long ol pikinini blong mi bae i trabol tumas, o bae i no hapi, o i no stap obei, be bae mi harem prapa nogud nao sapos mi filim se pikinini blong mi bae i no save trastem mi blong helpem hem, o bae i ting se ol intres blong hem oli no impoten long mi, o i no sef long han blong mi.
Long sem spirit ia, mi save tru se i no gat wan long yumi i save se ol soa blong hat blong God Papa mo Pikinini blong Hem we i gat lav, we i Sevya blong wol, i soa hamas taem Tufala i faenem se ol pipol oli no filim se oli save trastem Tufala, se bae Tufala i kea mo mekem olgeta oli sef long han blong Tufala, o se oli no trastem ol komanmen blong Tufala. Ol fren blong mi, from risen ia nomo, !yumi gat wan diuti blong yumi mas stap glad!
“Gladhat blong Hem, I Inaf”
Wan nara kaonsel abaot fasin blong lukaotem Kraes mo ful mak blong Hem, i hapen afta we Jisas i bin mekem merikel ia blong fidim 5,000 man wetem faef bred mo tu fis (luk long Matiu 14:13–21). (Be, yu no wari tumas se bae Kraes i nomo gat janis blong mekem ol merikel blong stap helpem yu. “Gladhat blong Hem i inaf.” [Seken Korin 12:9]. Hemia i wan lesen long saed blong spirit, we i no save finis abaot merikel ia. !Hem i gat plante blesing blong go raon wetem we i putum long samfala basket we oli fulap long ol haf kaekae! !Stap biliv, mo stap glad long han blong Hem we i givim “bred blong laef”! [Jon 6:35].)
Afta we Jisas i bin fidim ol bigfala grup blong ol pipol, Hem i sendem olgeta oli gobak, mo i putum ol disaepol blong Hem long wan bot blong oli krosem Solwota blong Galili. Afta, Hem i “go antap long wan hil, i stap hemwan, i prea” (Matiu 14:23).
Taem we ol disaepol oli stap aot long bot blong olgeta, hem i kolosap naet taem, mo i gat strong win long naet ia. Maet ol win ia oli strong tumas finis long stat. From ol win ia, ol man ia oli neva leftemap sel blong olgeta be oli wok nomo wetem barel blong olgeta—mo ating oli hadwok tru.
Yumi save hemia from se taem we oli kasem nambafo taem blong lukaot long naet (Matiu 14:25)—samples bitwin 3 klok mo 6 klok moning—oli bin muv smol ples nomo (luk long Jon 6:19). Taem i kasem moning, sip i stap go fas insaed long strong win ia.
Be, olsem oltaem, Kraes i bin stap lukaotgud long olgeta. Hem i luk se oli gat hadtaem, nao Sevya i tekem simpol rod i go long sip blong olgeta, i wokbaot krosem ol wef blong helpem olgeta.
Hem we I Stat Kasem En blong Stamba blong Bilif, i kam long J. Alan Barrett
“Yufala I No Mekem Tingting blong Yufala I Trabol”
Long wan taem we evri samting i kasem mak blong hem, ol disaepol oli lukluk i go mo oli bin luk, long tudak, sapraes we i stap flot long longfala klos blong Hem, i wokbaot i kam from olgeta long solwota. Oli singaot taem oli luk Hem, oli ting se Hem i wan devel we i wokbaot antap long ol wef. Afta, tru long strong win mo tudak—taem we i luk se solwota i bigbigwan mo sip blong olgeta i smosmol—nao voes ia we i mekem tingting i kwaet, voes blong pis blong Masta blong olgeta i kamaot: “Mi nomo ya. Yufala i no fraet” (Matiu 14:27).
Skripja histri ia i mekem yumi tingbaot se, taem yumi kam long Kraes, blong lukaotem Hem fulwan, o taem Hem i kam long yumi blong tekem fulwan blong Hem i kam, fas step ia bae i save fulumap yumi wetem wan samting we i kolosap olsem wan bigfala fraet. I no blong i olsem, be samtaem, i olsem. Wan long ol bigfala fani saed blong gospel, i we, stret ples blong kasem help ia mo sefti, i samting ia nao we, from sot maen blong yumi, i mekem yumi ronwe.
Mi no save risen, be mi bin luk ol investigeta oli ronwe long baptaes. Mi bin luk ol elda oli ronwe long koling blong misin. Mi bin luk ol switat oli ronwe long mared. Mi bin luk ol memba oli ronwe long ol jalenj blong koling. Mo mi bin luk ol pipol oli ronwe long Jos membasip.
Plante taem tumas, yumi stap ronwe long ol stret samting ia we bae oli sevem yumi, mo mekem tingting i kwaet. Plante taem tumas, yumi stap luk ol komitmen blong gospel olsem wan samting we bae yumi fraet long hem, mo afta, yumi lego fogud.
Elda James E. Talmage (1862–1933) i bin talem: “Long evri laef blong wan we i adalt, i gat ol eksperiens oli kam we oli olsem hemia blong solwota ia we i raf, wetem ol strong win mo solwota we oli nogud; plante taem, naet blong trabol mo denja i go bigwan finis taem we help i kamaot; mo afta, plante taem tumas, help ia we i blong sevem man, oli no luksave gud, mo oli tekem i wan nogud fraet. [Be,] olsem we i bin kam long [ol disaepol ia] long medel blong ol raf wota ia, voes blong Man we I Mekem Man I Fri bae i kam semmak, long evri wan we i stap traehad wetem fet—‘Hem i Mi; yu no fraet.’”1
Kam long Hem
Naesfala samting abaot invitesen ia blong akseptem Sevya, blong kam long Hem mo traehad blong kam fulwan olsem Hem i we, eni man i save mekem. Hemia i no minim se evriwan we yu save i wantem blong obei ol komanmen, o we evriwan we yu mitim, bae i wantem blong stap obei ol komanmen. Be wanem i minim i we, i posibol blong obei ol komanmen we yu no gat wan spesel presen o samting we oli pasem i kam daon long yu blong save mekem hemia.
Mi askem wetem krae blong fet we “i stap saen mo i laet strong mo strong,” blong Kraes blong i “kam long evri sentimeta blong kalja [blong yumi],”2 mo blong yumi kam bigwan olsem Kraes long evri samting long laef blong yumi (luk long Efesas 4:13).
Laef bae i jalenjem yu. Ol hadtaem bae oli kam. Bae ol hat i brok. Olgeta we yumi lavem bae oli ded. So, long weaples yu stap go long hem, mekem rod blong yu i go long Jisas Kraes faswan. Tingbaot se safaring blong Hem mo Girap blong Hem long Ded i mekem i posibol blong yumi winim hadtaem mo ded. Mekem ol kavenan blong yu wetem Hem mo kipim olgeta taem yu stap gohed long laef.
Long evri wiknes blong mi, we mi rere blong admitim, mi wantem tumas blong yumi “kam bigwan olsem Kraes … we i bigman tru.” Mi wantem blong kam long Hem. Mi wantem Hem, sapos i posibol, blong kam long mi. Mo mi rili wantem blesing ia blong yufala evriwan.