Help blong Stap Olsem Papa mo Mama
Wanem Brum I Tijim Mi abaot Fasin blong Stap Olsem Papa mo Mama
Hem we i raet i stap long Yuta, YSA.
Ol haoswok blong ol pikinini blong mi oli bin helpem mi blong ansarem prea.
Pikja i kam long David Green
Wan moning, mi wekap, mi harem se ol samting oli tumas. Ol diuti blong mi, olsem wan mama i kam hevi, mo mi bin luksave gud tu ol wiknes blong mi. I luk se i gat wan bigfala hol i stap bitwin wei we mi stap pikjarem mi olsem wan mama mo wei we mi rili stap.
Mi nildaon blong prea mo talem long Papa long Heven hamas mi lavem Hem. Mi talem long Hem hamas mi lavem ol pikinini we Hem i bin blesem famli blong mi wetem. Mo mi stat blong talem long Hem se mi mi stap traem blong stap olsem wan gud mama, be mi filim se mi no stap mekem gud long wok ia. Taem mi bin stap prea, mi tingting se ol pikinini blong mi bae oli gud moa sapos God nomo i lukaotem olgeta oli kam bigwan.
Nao, wan pikja i kam long maen blong mi. Mi gat pikja ia se ol pikinini blong mi oli stap brum long floa blong kijin. Hemia i wan long ol plante wok we oli gat blong mekem blong helpem famli blong mifala. Samtaem, blong stap lukluk olgeta, i mekem mi mi krangke smol, from se oli stap lanem samting yet mo oli stap mestem plante ples. Be mi lego olgeta blong mekem, wetem sam moa evri dei haoswok, from se visen blong mi long saed blong olgeta i bigwan moa. Mi save se tru long ol praktis ia we oli no stret evriwan, bae oli lanem mo bae oli groap. Long en, bae oli save mekem i kwik nomo, mo i stret nomo olsem mi. Visen ia we mi gat, we mi luk olgeta oli kam responsibol mo indipenden, i givim moa praes long mi bitim we sapos bae mi mekem miwan. Mi no stap lukaotem ol pikinini blong gat wan sakses blong sot taem—mi stap traem blong helpem olgeta blong gat sakses blong wan longfala taem i go.
Mo mi stap askem miwan sapos wan samting olsem, i tru tu long saed blong papa mo mama blong yumi long heven. Papa long Heven i save se yumi no save mekem wan wok we i stret evriwan blong stap olsem papa mo mama. Sam samting we yumi stap mekem, ating i stap mekem Hem i krangke smol tu, be Hem i letem olsem from se Hem i save se yumi stap lanem samting mo stap groap. Hem i gat bigfala longtaem lukluk ia. Long visen blong Hem, Hem i luk se, wan dei, bae yumi kam wan papa olsem Hem, we i save lavem pikinini fulwan, tij gud, mo stap olsem eksampol we i stret gud. Taem yumi mekem samting olbaot, Hem i save se yumi stap developem ol kwaliti olsem fasin blong save wet longtaem, mo jareti. Mo long wei ia, long waes blong Hem, Hem i letem yumi wok mo foldaon, mo traem bakegen.
!O mi wantem tumas se mi mi wan gudfala mama evriwan finis! Olsem Josef Smit i bin raetem, plante taem mi stap, mi stap foldaon long “plante krangke rong” (Josef Smit—Histri 1:28). Be mi harem gud blong save se God i stap andastanem hat blong mi, we i minim se Hem i save se mi mi stap traem blong letem Hem i tijim mi. Mi harem mi glad taem ol pikinini oli askem: “?Hao mi mekem samting ia i gud moa?” mo luk se oli wantem mekem i gud moa. Be mi tu, mi save mekem olsem wetem Papa long Heven.
Taem we evri tingting ia oli stap pleiplei insaed long maen blong mi, tingting blong mi i go nogud bakegen. “?Be olsem wanem sapos ol rong blong mi taem mi traem blong stap wan mama i mekem ol pikinini blong mi oli harem nogud?” mi askem. “Mi no wantem holembak olgeta, iven sapos mi kam wan gud samting long rod ia.”
Bakegen, pikja blong ol pikinini blong mi we oli stap klinap i kam long maen blong mi. Afta we gel blong mi i traem bes blong mopem floa, mo afta, i hariap i go pleiplei o finisim wan nara wok, plante taem, mi stap wasem ol sospen we oli stap. Mo mi tingting long sore ia we i no gat en, mo paoa ia blong Jisas Kraes, we Atonmen blong Hem i kavremap evri nogud situesen blong laef. Gladhat blong Hem i kavremap hol blong mi long wok blong mi olsem mama, semmak nomo olsem gladhat blong Hem i kavremap sobodi blong ol pikinini blong mi from se mi mi gat sam rong. Long wan wei we i no gat wan long yumi i save andastanem, Atonmen blong Hem i save hilim evri samting ia.
Tingting blong mi i harem gud tumas long revelesen we i kam blong miwan tedei. Mi bin filim Spirit i tijim mi se, ol bes hadwok blong mi, we mi mekem wetem Lod olsem patna, oli inaf. Mi save se Papa long Heven bae i gohed blong wok insaed long laef blong ol pikinini blong mi, smol smol i go, blong mekem i stret gud ol samting ia we mi mi no mekem i stret gud. Wetem help blong Hem, ol pikinini blong mi, sam dei, oli save saenem raet blong olgeta, i saen gud semmak olsem se Papa long Heven i bin lukaotem olgeta i kam bigwan. Be hemia nomo, plan blong Hem i mekem tu se mi tu mi jenis long sem taem—i mekem mi mi kam klin gud mo i mekem mi mi kam moa olsem Hem. !O tabu fasin blong God blong yumi i bigwan tumas!