Dijitol Nomo: Ol Voes blong Ol Lata-dei Sent
Lod I Soem Rod
Lod i save yumi mo wanem i stret blong yumi naoia.
Foto i kam long Cody Bell
Giselle
Bifo mitufala i mared, André i bin stap wok long PhD blong hem mo i kasem wan posisen blong wok long Yunivesiti blong Mijigan. Mitufala i mared mo muv i go long Mijigan. Long en, André i stat blong gat sam trabol long wok mo i wantem blong jenisim wok.
Mitufala i yang, mo mitufala i jes mared, mo mitufala i no bin save wanem blong mekem. Mitufala i disaed blong prea from.
André
Wan dei, mi go long yunivesiti mo mi luk wan bod we oli stap putum notis blong ol wok long hem. Mi bin aplae from tri defren wok. Long wan wik, oli askem mi blong save wok long evri trifala wok ia.
Giselle
Mitufala i tingting long wanem blong mekem. Mitufala i prea bakegen. Wan wok i stap long Inglan, be mitufala i wantem blong stap long Yunaeted Stet. Wan i stap long Teksas, mo nara wok i stap long Merilan kolosap long Wasington, D.K. Wok we i stap long Merilan i wan wok wetem NASA. André hem i wan saentis mekem se NASA i bin luk olsem wan gudfala ples blong go long hem.
André
Taem mifala i stap muv i go long Merilan, Giselle i silip taem mi stap draev. Hem i bin eli long moning taem mi luk Wasington D.K. Tempol.
“!Wekap! !Wekap! ?Yu save luk?” Mi talem long Giselle. “!I olsem haos blong wan king!”
Giselle
Mi talem long André se maet bae mifala i go visitim wan dei. Mitufala i no save nating se i wanem kaen bilding. Sam dei afta we mifala i kasem Merilan, mi bin go long laebri blong yusum intanet blong aplae from ol wok mo jekem imel blong mi.
Wan woman we i wok long we i harem tiun blong toktok blong mi mo askem se mi blong wea. Mi talem long hem se mi blong Brasil mo mitufala i stat blong toktok. Nem blong hem i Edna. Mi talem long hem se mifala i jes muvaot long Mijigan mo talem ples we mifala i stap long hem naoia.
“Mi stap long ol semmak apatmen ia,” Edna i talem.
Taem mi gobak long laebri long nekis dei, Edna i talem, “Mi glad tumas se yu kambak. Mi wantem invaetem yu mo hasban blong yu i kam long haos blong mi blong dina.”
Mi bin ting se i no nomol from hem i no save mi. Afta hem i talem: “Mi bin prea abaot yu from mi bin filim wan spesel samting abaot yu taem mi mitim yu yestedei.”
Mifala i bin go long haos blong hem mo lanem se hasban blong hem i bin ded, i no longtaem i pas. Afta long dina, hem i plei singsing ia, “Lord, I Would Follow Thee” (Hymns, no. 220) long piano. Hem i talem se, hemia i fevret hym blong hasban blong hem mo oli bin plei long hem long fenerol blong man blong hem. Afta hem i tokbaot plan blong fasin blong sevem man long mitufala mo invaetem mitufala blong go long jos wetem hem.
Mifala i bin go long jos, mo ol pipol long we oli bin welkamem mitufala. Mitufala i disaed blong go long nekis Sandei. Mitufala i agri blong gat ol misinari lesen. Edna i letem mifala blong gat ol lesen ia long haos blong hem. Blong faef manis, mifala i go long Jos evri Sandei. Hat mo spirit blong mifala i stap rere from baptaes.
André
Taem oli anaonsem baptaes blong mitufala, evriwan i sapraes. “?Wao, yufala i no ol memba?” olgeta i talem. “!Be yufala i stap ia evri wik!” Baptaes blong mitufala i bin spesel. Kolosap ful wod i bin kam.
Mitufala i sil long Wasington D.K. Tempol, wan yia afta. Taem mifala i go long tempol, mifala i luksave se !hem i haos blong king we mitufala i bin luk kolosap wan yia i pas!
Giselle
Afta we mifala i bin sil long tempol, plante samting i no bin gohed gud.
Afta long 11 Septemba, 2001, hem i bin had long mitufala blong riniu visa blong mitufala. Mi harem nogud from mi jes graduet long wan komuniti kolej mo aplae from wan ful skolasip long Yunivesiti blong Merilan. Mi no bin kasem skolasip ia, mo ples we André i stap wok long hem i stap klos daon.
Mifala i ting se maet taem ia i kam blong mifala i go bak long Brasil.
André
Bisop blong mifala i talem long mifala se bae mifala i save helpem fulap memba long Brasil mo gro long ol wei we maet bae mifala i no save gro long hem long Ol Yunaeted Stet. Hem i bin kaonselem mifala blong stap kolosap long Jos.
“Go long Brasil mo givim seves long Lod,” hem i talem.
Afta we mifala i stap laef long Brasil blong sam taem, stek presiden blong mifala i bin kam long haos mo singaotem mi blong givim seves olsem wan bisop. Mi bin filim save se bae oli singaotem mi. Blong tu naet bifo oli singaotem mi, mi no bin save silip. Mi bin stap tingting mo stadi.
Giselle
Mi stap tingting long miwan se wanem i stap hapen. Mi luk hem i jenis bifo koling blong hem.
André
Taem mi bin statem koling blong mi, wod blong mifala i gat 80 aktiv memba. Taem oli rilisim mi, fulap moa oli stap kam long jos oltaem, mo 12 misinari i bin go long ol misin aot long wod blong mifala. !Hem i gud tumas!
Samples long taem we oli rilisim mi, Presiden Dieter F. Uchtdorf i bin rilis long Fas Presidensi. Mi tingbaot we Presiden Russell M. Nelson i stap talem se Presiden Uchtdorf i gat ol niu, impoten responsabiliti insaed long Kworom blong Olgeta Twelef Aposol.
Tri manis afta, oli singaotem mi olsem fas kaonsela long misin presidensi. Mi no bin go long wan misin, be mi lavem koling blong mi. Mi lavem blong wok wetem ol misinari. Lod i save mi. Hem i save se oli nid blong rilisim mi olsem wan bisop mekem se mi save givim seves long taem mo ples we i stret long mi naoia.