Ngaahi Founga ʻe Fā ke Fakatupulaki e Ngaahi Fakataha Alēlea Fakafāmilí
Te mou lava fēfē ʻo ngāue fakataha ko ha fāmili ke fakaleleiʻi e ngaahi palopalemá mo feinga ke toe uouongataha ange ai?
Tā fakatātaaʻi ʻe David Green
ʻOku lahi ha ngaahi meʻa ʻoku hoko he ngaahi fāmilí. ʻOku puke e fānaú. ʻOku fie maʻu ke fakahoko ha ngaahi monomono. ʻOku feʻauʻauhi e ngāué, ngaahi ʻekitivitií mo e lotú ki ho taimí. ʻE malava pē ke fakatupu lōmekina.
ʻOku anga fēfē leva hoʻo ʻunuki mai ho fāmilí ke toe ofi ange ʻi he ngaahi meʻa kotoa ʻoku hokó?
Meʻamālié, kuo ʻomi ʻe he Tamai Hēvaní ha sīpinga maʻá e moʻui mo e fetuʻutaki fakafāmilí ʻa ia ʻoku ui ko e ngaahi fakataha alēlea fakafāmilí. Ko ha founga ʻeni ʻe fā ke ngāue ai e ngaahi meʻa ko iá ʻi homou fāmilí.
1. Ko e Ngaahi Fakataha Alēleá ko ha Ngaahi Fepōtalanoaʻaki Ia, Kae ʻIkai ko ha Ngaahi Ako Fakahinohino
Naʻe akoʻi ʻe Palesiteni M. Lāsolo Pālati, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “ʻOku fie maʻu ke ʻi ai maʻu pē ha fakataha alēlea fakafāmili. Ko hono moʻoní, ʻoku nau taʻengata. Ne tau kau ki ha fakataha alēlea fakafāmili ʻi he maama fakalaumālié, ʻi heʻetau nofo mo ʻetau mātuʻa fakalangí, ko ʻena fānau fakalaumālié.”1
ʻOku fakatatau ʻetau ngaahi fakataha alēlea fakafāmilí ki he fakataha alēlea fakalangi ko ʻení. ʻOku fealēleaʻaki e ngaahi faʻeé mo e ngaahi tamaí pea mo ʻenau fānaú. ʻE lava ke alēlea e kakai lalahi kei talavoú mo hanau fāmili pe ngaahi kaungāmeʻa falalaʻanga. Ko e fakataha alēleá ko ha ngaahi tefitoʻi moʻoni ia te ne ʻomi ha mālohi lahi ange ki homou fāmilí ki hono fakaleleiʻi ʻo e ngaahi palopalemá. Mahalo te mou fakakaukau, “Te u fakahoko fēfē nai ʻena mo ʻeku fānaú? ʻOku ʻikai fuʻu mahuʻinga ia kiate kinautolu e meʻa te u lea ange ʻakí.”
Kapau te ke fakahoko ha fakataha alēlea ʻo hangē ha ako fakahinohinó, he ʻikai te ke aʻusia e tuʻunga aʻusia totonú. Ka ʻe lava ke maʻu ha ʻātakai fakafiefia ʻi he taimi ʻoku ongoʻi ai ʻe he tokotaha kotoa ne nau kau ʻi hono fakaleleiʻi e palopalemá.
2. ʻOku Faʻu ʻe he Ngaahi Fakataha Alēleá ha Vā Fehokotaki
ʻE tokoni e toutou fehokotaki ʻi he ngaahi fakataha alēleá ke mou vakai ai ki he meʻa ʻoku hoko ki he mēmipa takitaha ʻo e fāmilí. ʻOku totonu ke kau e tokotaha kotoa he tokoni ki hono faʻu ha ngaahi founga ʻoku leleí mo fokotuʻu ʻenau ngaahi taumuʻá takitaha. ʻI he fealēleaʻaki ʻa e fāmilí ʻi hono fakahoko ha ngaahi filí, te nau tupulaki fakafoʻituitui pea ʻe toe uouongataha ange e fāmilí fakalukufua.
Mahalo ʻe palaniʻi ha ngaahi fakataha alēlea ʻe niʻihi, kae hoko fakanatula pē ha niʻihi. Fili pe ko e hā ʻe lelei taha ki he fāmilí.
3. ʻE Lava ke Mou Fakahoko ha Fakafiefia mo Ngāue Fakataha
ʻOku ʻikai fakataumuʻa pē e ngaahi fakataha alēlea fakafāmilí ki hono fakaleleiʻi ha ngaahi palopalemá. Fēfē kapau ne toki maʻu pē ʻe hoʻo uaifí ha tuʻunga māʻolunga ʻi heʻene ngāueʻangá. ʻE lava ke mou fakafiefiaʻi ʻene lavameʻá ʻi hoʻomou fakataha alēlea fakafāmili hokó. ʻE lava ke fakatupulaki ʻe homou fāmilí ha ʻulungaanga ʻo hono fakahaaʻi ʻo e houngaʻiá. Tuku ke taufetongi e tokotaha kotoa ʻi hono fakahaaʻi ha meʻa ʻoku nau houngaʻia ai.
Fokotuʻu e ngaahi fakataha alēlea fakafāmilí ko ha meʻa ʻe ʻamanaki lelei atu ki ai e tokotaha kotoa. Kapau ʻe ʻilo ʻe he mēmipa takitaha ʻo e fāmilí, ʻo aʻu ki he siʻisiʻi tahá, ʻe ongona honau leʻó mo fakamahuʻingaʻi kinautolu, te nau fiefia ke kau atu.
4. ʻOku ʻUhinga e Siʻisiʻi Ange ʻa e Wi-Fi, ki he Lahi Ange ha Faingamālie Maʻa Koe mo Au
Fakakaukau ke tuku ʻe he tokotaha kotoa ʻenau ngaahi naunau fakaʻilekitulōniká ki he tafaʻakí lolotonga e ngaahi fakataha alēleá. ʻI he taimi ʻokú ke talanoa mata-ki he-mata ai mo e fānaú ʻikai ʻi ai ha fakahohaʻá, te nau ongoʻi ʻoku fakamahuʻingaʻi kinautolu. ʻE fakaafeʻi ʻe hoʻomou lotu fakataha pea mo hoʻomou lotu maʻá e niʻihi kehé ʻa e Laumālié ki homou ʻapí. ʻOku ʻikai fie maʻu ke solova tokotaha ʻe ha taha ha palopalema. ʻOkú ke fokotuʻu ʻa e sīpinga ke fekumi ai ki he tokoni ʻa e ʻOtuá ʻi he taimi ʻoku faingataʻa ai e ngaahi meʻá.
Kapau kuo mou ʻosi fakahoko ʻa e fakataha alēlea fakafāmilí, fakakaukau ki ha ngaahi founga ke fakaleleiʻi ai. Kapau ʻoku teʻeki ke mou fakahoko ia, ʻe lava ke hoko e ʻahó ni ko ha ʻaho lelei ke mou ʻahiʻahiʻi ai. Kamata siʻisiʻi pē, mo vakaiʻi e tupulaki ʻa e ngaahi fakataha alēlea fakafāmilí ki ha meʻa fakafiefia ʻoku ako mo fepoupouʻaki ai e kau mēmipa ʻo e fāmilí.