Ko ʻEmau Moihū ʻi Tupaí
ʻOku nofo ʻa e tokotaha naʻá ne faʻú ʻi ʻIutā, USA.
Kuo teʻeki ke u ongoʻi taʻefiemālie ʻi heʻeku hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha fonua Mosilemi.
Ngaahi tā ʻo e puipuituʻa ʻo Tupaí mei he Getty Images
Ne u tūʻuta atu mo hoku fāmilí ki Tupai, ʻi he Ngaahi Fonua Fakatahataha ʻo ʻAlepeá, ʻi he faʻahitaʻu fakatōlau ʻo e 2013, pea ne mau fiefia ke ʻalu ki he lotú. Naʻe lelei maʻu pē ʻemau ngaahi aʻusia ʻi heʻemau ʻalu ki he lotú ʻi he ngaahi feituʻu kehé. ʻOku mau saiʻia ʻi heʻemau lava he fuofua taimi ʻoku mau hū atu he ngaahi matapaá kuo mahino ʻa e meʻa ʻe hokó pea mo ʻemau ʻosi kau fakataha mo ha falukunga kakai ne teʻeki ke mau maheni kimuʻa.
Ne feau ʻemau ngaahi ʻamanakí ʻi heʻemau hoko ko ha konga ʻo e kulupu ʻofa ko ʻeni ʻo ha Kau Maʻoniʻoni he Ngaahi ʻAho Ki Mui Ní mei ha ngaahi fonua kehekehe, pea naʻe tupulaki ʻemau tuí mo e tukupaá lolotonga ʻemau kei ʻi Tupaí. He ʻikai toe ngalo e taimi ne u ʻi Tupai aí mo e kakai fakaʻofoʻofa ne u feʻiloaki mo iá ko ha ola ʻo ʻete lava ʻo ʻalu ki he lotú mo moihū ʻi he founga kuó u fakahoko mo monūʻia ke fakahoko maʻu ai pē iá. ʻOku ou fakaʻamu ʻe mahino ki he kau taki ʻo e UAE ʻa e meʻaʻofa kuo nau foaki maʻamautolu ʻo mau lava ai ke moihuú.
Ko ʻemau senitā fakasiteikí ʻi ʻApu Tapi.
Ngaahi laʻitā ʻo e fāmili Chomjak, ʻi he angalelei ʻa e tokotaha faʻu tohí
Ko e meʻa ne taʻeʻamanekiná ko e lahi ʻo e tupulaki ʻeku tuí, ko ha ola ʻo hono moʻui ʻaki mo e feohi mo ha kakai ne ʻikai ko ha kau mēmipa ʻo ʻeku tui fakalotú. Kuo teʻeki ke u nofo ʻi ha feituʻu ne fakamāmani lahi ai e mahuʻinga ʻo e ʻOtuá ʻi he moʻui ʻa e kakaí.
Ko Hono Fevahevaheʻaki ʻo e Falala ki he ʻOtuá
Kuó u ʻiloʻi ko ha meʻa fakafiefia mo lelei ʻeku lava ke lea fekauʻaki mo e tākiekina ʻa e ʻOtuá mo e tui fakalotú ʻi heʻeku moʻuí taʻe hanga ʻe he niʻihi kehé ʻo fakasiʻia e meʻa ne u lea ʻakí pe fakatupu fakamamahi. Ne u ongoʻi peheni koeʻuhí ne lea e tokotaha kotoa ne u fetaulaki mo ia ʻi Tupaí ʻo hangē ko ia ne u faí, ʻo fakatupu ha vā fetuʻutaki he taimi pē ko iá ʻi heʻemau talanoá.
ʻI heʻeku tangutu he veʻe vai kaukaú ʻo ofi ki ha faʻē ʻe taha ʻo tatali ki heʻemau fānaú ke ʻosi ʻenau ako kakaú, ne u vahevahe ange e founga ne u fefaʻuhi ai mo ha ngaahi faingataʻa peá u ongoʻi loto-foʻí. Ne hoko atu e faʻē Mosilemí ʻo fakahoko maʻaku ha ngaahi lea fakalotolahi mo ʻomi ʻene fakapapau ʻoku ʻafio mai e ʻOtuá kiate kitautolu pea te Ne tokoniʻi kitautolu ʻi hotau ngaahi faingataʻaʻiá. ʻIkai ko hono ʻOtuá. ʻIkai ko hoku ʻOtuá. Ko hotau ʻOtuá.
Ne u lue mo hoku ʻofefiné ʻi ha ʻaho ʻe taha ki he tauʻanga lēlué pea ne angaʻofa mai ha fefine ʻEmilati ʻo fakaheka kimaua ʻa ia naʻá ne vahevahe mai ai ʻene aʻusia fekauʻaki mo hono foha naʻá ne foua ha ngaahi faingataʻa fakaefaitoʻo ʻa ia ne fie maʻu ai ke nau folau ki he ʻIunaiteti Siteití ke faitoʻo ai. ʻI he hoko atu ʻene talanoá, ne huluni fakataha ʻene tuí mo ʻene falala ki he finangalo ʻo e Otuá mo ʻEne tauhi ʻofá. Ne u talaange kiate ia te u lotua ia mo hono fāmilí, ʻa ia naʻá ne tali ʻi he loto mahino mo e ʻofa.
Loto Mahino mo e Tali Lelei
ʻI heʻemau fetaulaki mo e ngaahi fāmili ʻa ia ʻoku ako pē ʻenau fānaú ʻi ʻapí, ne hoko maʻu pē ia ko ha ʻātakai malu mo tauʻatāina. Ne ʻi ai ha fakafofonga ʻo e meimei tui fakalotu kotoa pē ʻi he kulupu ko iá. ʻI he taimi ne mau talanoa ai fekauʻaki mo e ʻOtuá, lotú mo e moihuú, ne ongoʻi ʻe he tokotaha takitaha ʻoku mahino mo tali ia ʻe he tokotaha kotoa. Naʻa mo e lotolotonga ʻo e kakai Kalisitiané, ʻoku ʻi ai mo ha ngaahi tui fakalotu kehekehe. ʻI he taimi te u fetaulaki ai mo e kakai Kalisitiane kehe ʻoku ako ʻenau fānaú ʻi ʻapí, naʻe fakaʻofoʻofa hono talitali lelei kita, neongo pe ko e hā ʻete tui fakalotú mo e meʻa ʻokú te tui ki aí. Ne mau maʻu ha ngaahi ʻulungaanga mo ha ngaahi founga tatau tuʻunga mei heʻemau moʻui līʻoa ki he ʻOtuá.
ʻI he taimi ne u talanoa ai mo ha faʻē Hinitū ʻa ia ne faiako hoku ʻofefiné ki heʻene fānaú, ne u fanongo ki he mahuʻinga ʻene tuí kiate iá ʻi heʻene fakamatala mai fekauʻaki mo ʻene fakaʻaongaʻi hono taimí he ʻahó ke fakalaulauloto mo moihuú.
Ne u ʻaʻahi mo hoku husepānití, ʻĒlone, mo ʻema fānaú ki he Matātahi Sumeilá, ʻi he matāfanga ʻo e Teleʻa Pēsiá.
Ngaahi Tuʻunga Mahuʻinga Tatau
Pea fakaʻosí, ʻoku ou fie lave ki heʻeku houngaʻia lahi ke nofo ʻi ha feituʻu naʻá ne poupouʻi e ngaahi tuʻunga mahuʻinga ʻoku ou akoʻi mo hoku husepānití ki heʻema fānaú. ʻOkú ma akoʻi ʻema fānaú ke nau tokanga ki heʻenau moʻui leleí ʻaki ʻenau fakamamaʻo mei he kava mālohí pe ko hono fakaʻaongaʻi ʻo e faitoʻo konatapú. ʻOkú ma akoʻi ʻema fānaú ke nau moʻui taau mo molumalu ʻi honau teungá mo e fōtungá. Ko e taha ʻo e ngaahi meʻa ne mau aʻusia ʻi he ngaahi fuofua ʻaho siʻi ʻemau tūʻuta ki Tupaí ko e tohi ʻi he matapā ʻo e falekoloa fakatauʻangá (mall) ʻa e tuʻunga ʻoku fie maʻu ke ʻi ai e valá mo e ʻulungāngá. Ne mau fepehēʻaki he taimi pē ko iá ne hangē ia ha konga ne toʻo mei he kiʻi tohi Ki Hono Fakamālohia ʻo e Toʻu Tupú. Ne mau saiʻia ʻaupito ai!
Kuo teʻeki ai tuʻo taha haʻaku ongoʻi momou ʻi Tupai, ʻi heʻeku hoko ko ha fefine tui kia Kalaisi, mo manavahē ki he ʻOtuá. ʻI he tafaʻaki ʻe tahá, ne u ongoʻi ha loto-toʻa pea fakamālohia ʻeku tuí ʻe kinautolu ne u feohi mo iá. Kuo teʻeki ke u aʻusia e tuʻunga fakaemāmani lahi ko ʻení ʻi ha toe feituʻu kuó u nofo ai kumuʻa.
ʻI he taimi ne fanongo ai homau fāmilí hono fanongonongo ʻo e Temipale Dubai United Arab Emirates ʻi he konifelenisi lahi ʻi ʻEpeleli 2020, ne mau ʻohovale lahi, pea ne mau fesiofaki pē ʻi heʻemau ofó. Ne mau fuʻu fiefia lahi ʻe fokotuʻu ha temipale ʻi he Hahake Lotolotó! ʻOku fiefia lahi hoku lotó ʻi he tokolahi ʻo e kau mēmipa ʻo e Siasí ʻoku nau nofo ʻi he feituʻu ko iá. ʻOku ou houngaʻia he kau taki ʻo UAE ʻi hono fakaʻatā e fale toputapú ni ke tuʻu ʻi he lotolotonga ʻo honau ngaahi fale toputapú—ʻa honau ngaahi falelotu ʻoku mofele ʻi he funga ʻo e fonuá. Ko ha taimi mātuʻaki mahuʻinga mo fakangalongataʻa ʻeni.