Kakai Lalahi Kei Talavoú
Naʻe ʻi Fē ʻEku Mana Hoko he Taimi Pē Ko Iá?
ʻOku nofo ʻa e tokotaha naʻá ne faʻú ʻi ʻIutā, USA.
ʻI he taimi ne u lau ai fekauʻaki mo e founga fakamoʻui ʻe he Fakamoʻuí ʻa e niʻihi kehé ʻi he taimi pē ko iá, ne u ongoʻi loto-foʻi koeʻuhí kuo teʻeki keu sio au ʻi ha tāpuaki pehē ʻi heʻeku moʻuí.
Kuó u lotua ha mana ʻi ha ngaahi māhina lahi.
ʻI Sepitema ʻo e 2019, ne u ʻalu atu ai ke fakahoko haku tafa ihu, pea ne ʻi ai ha palopalema taʻe-ʻamanekina ʻo mole ai ʻeku vakaí ʻi ha mata ʻe taha. Ne fakahoko haku tafa fakavavevave ke feinga ke fakaleleiʻi e maumau ki he foʻi matá, pea naʻe ongoʻi fakapapau ʻe heʻeku toketā tafá ʻe sai ia ʻi loto ʻi ha māhina pē ʻe tolu. Ne u maʻu foki mo ha ngaahi tāpuaki lakanga fakataulaʻeiki, ʻa ia naʻe talaʻofa mai ai, ʻi he taimi kotoa pē, ʻe fakamoʻui kakato atu.
Ka ne hoko mai pea ʻosi e ngaahi māhina ʻe tolu ko iá mo e ʻikai pē ha liliu.
Kuo talaʻofa kiate au ʻa e fakamoʻuí. ʻI ha ngaahi taimi lahi. Ka kuo ʻi ai ha ngaahi ʻaho tafa ne ʻikai hoko ia pea mo ha ngaahi faingataʻa mo ha ngaahi meʻa fakalotomamahi, pea ʻoku kei tuai ke sai hoku matá.
Kuo ʻomi ʻe he aʻusia ko ʻení kiate au ha ngaahi māhina ʻo e faingataʻaʻia fakaʻatamai, fakaeloto, fakalaumālie mo fakatuʻasino. Ka ʻi he taimi kotoa pē ʻoku toe fakahoko ai haku tāpuaki, ʻoku talaʻofa maʻu mai pē ʻe fakamoʻui au.
Kuo tupu ai ʻeku fakakaukau. Ko e hā ʻoku tau fai ʻi he taimi ʻoku tau tatali ai ki he ngaahi mana ʻoku hangē he ʻikai hokó pe ʻi he taimi hangē ʻoku fakalongolongo ai ʻa e langí? ʻE lava fēfē ke tau fakalakalaka ki muʻa ʻi he taimi ʻoku tau tūkia ai ʻi ha taha ʻo e ngaahi meʻa ko ʻeni ʻoku faʻa hoko ʻi he moʻuí?
Kuó u fakakaukau ki he foʻi fehuʻi ko ʻení ʻi ha taimi lahi, ʻo feinga ke mahino kiate au hoku tūkungá. Kuó u fakakaukau foki ki he kotoa ʻo e ngaahi mana kuó u lau fekauʻaki mo ia ʻi he folofolá.
Ne u ako e ngaahi taimi kotoa pē naʻe fakahoko ai ʻe Sīsū ha mana pe fakamoʻui ha tokotaha lolotonga ʻEne ngāue fakafaifekaú. Pea, ko hono moʻoní, ne u loto mamahi ʻi he kamataʻangá, koeʻuhí ko e taimi kotoa pē ne ʻomi ai ha taha kia Kalaisi, naʻá ne fakamoʻui kinautolu ʻi he taimi pē ko iá.
-
Naʻe ala e fefine naʻe moʻua ʻi he ʻau totó ki he kapa Hono kofú, pea naʻe fakamoʻui ia ʻi he taimi pē ko iá. (Vakai, Maʻake 5.)
-
Naʻe kole e tangata ne fānauʻi kuí ki ha fakamoʻui, ko ia ne folofola ange ʻe Kalaisi ke kaukau ʻi he vai ko Seiloamí. Pea ʻi he taimi naʻá ne fai ai iá, naʻá ne sai. (Vakai, Sione 9.)
-
Ko e fekumi ʻa e tangata kiliá ke fakamoʻui iá—ʻi he taimi pē ko iá—naʻe fakamaʻa kakato ia. (Vakai, Mātiu 8.)
-
Ne talaange ki he ʻofefine ʻo Sailosi kuo maté ke tuʻu hake mei he maté, pea naʻá ne tuʻu hake. ʻI he taimi pē ko iá! (Vakai, Maʻake 5.)
-
Naʻe fakatauʻatāinaʻi ʻa e tangata naʻe ʻiate ia ha laumālie ʻo e tēvolo ʻulí ʻi he taimi pē ko iá, ʻi he folofola atu ʻa Kalaisi kiate Iá. (Vakai, Luke 4.)
Naʻe ʻikai ʻuhingamālie ʻeni kiate au. Naʻe hoko e ngaahi mana ko ʻení ʻi he taimi pē ko iá, ko e hā leva ne u kei tatali ai aú? Naʻe hangē ʻoku ʻikai totonu iá.
Ka ʻi he hili haʻaku fakalaulauloto ki ai, ne haʻu kiate au ʻa e moʻoní: neongo ne hoko ʻa e ngaahi mana ko ʻení ʻi he taimi pē ko iá, ka ne ʻosi fefaʻuhi ʻa kinautolu ne fakamoʻuí mo honau ngaahi faingataʻaʻiá ʻi ha taimi fuoloa kimuʻa ai.
-
Naʻe faingataʻaʻia e fefine ʻau totó ʻi ha taʻu ʻe 12 pea mole kotoa hono ivi fakaelotó mo e fakapaʻangá kimuʻa pea toki hoko kiate ia e maná.
-
Ne ʻikai ʻilo ʻe he tangata kuí ha meʻa ʻi he kotoa ʻene moʻuí kimuʻa pea toki tāpuekina ia ke ne lava ʻo sió.
-
Naʻe fefaʻuhi e tangata kiliá mo e fakalilifu ʻo e mahaki kiliá mo e mamahi ʻo e mahakí, ʻo fehiʻanekinaʻi pea ʻoku ʻikai ke tau ʻilo pe ko e hā hono fuoloa pea toki fakamoʻuí.
-
Naʻe fuoloa e faingataʻaʻia e ʻofefine ʻo Sailosí ʻo aʻu ki he maté kimuʻa pea toki hoko ʻa e maná.
-
Naʻe haʻi ʻe he ngaahi laumālie ʻulí e tangatá ʻi ha taimi fuoloa kimuʻa pea toki ʻi ai ha faingamālie ke fakatauʻatāinaʻi iá.
Naʻe fakahā mai heni kiate au, taimi ʻe niʻihi, ʻoku ʻikai hoko e ngaahi maná ʻi he taimi pē ʻoku kamata ai e faingataʻaʻiá. Naʻe fefaʻuhi e tokotaha kotoa pē mo hono mamahí mo e faingataʻaʻiá kimuʻa pea toki fakamoʻui kinautolú. Pea neongo ne fuoloa e faingataʻaʻia ʻa ha niʻihi, ka ʻoku hoko maʻu pē e ngaahi mana ʻo e fakamoʻuí.
ʻOku ou fakaʻamu ne u ʻiloʻi e fuoloa ʻo e taimi te u feʻao ai mo e faingataʻá ni, kae mahalo ko e meʻa mahuʻingá ʻa e ʻikai ke u ʻiló. ʻOku ʻomi ʻe he ngaahi faingataʻá ha ngaahi faingamālie. Te tau lava ʻo fili ke tuku ʻetau ngaahi faingataʻaʻiá ke ne oʻi mo akoʻi kitautolu ki he tuʻunga lelei taha te tau ala lava ʻo aʻusiá. Te tau lava ʻo fakaʻaongaʻi e taimi ko ʻeni ʻo ʻetau tatalí ke ʻunu ofi ange ai ki he ʻOtua naʻá Ne fakatupu kitautolú. Te tau lava ʻo fakafehokotaki mo kau fakataha mo e niʻihi kehé ʻi honau faingataʻaʻiá.
ʻOku tau maʻu maʻu pē ha faingamālie ke tau fai lelei, tupulaki mo fakalakalaka ai ʻi he taimi ʻoku tau tatali ai ki ha maná.
ʻOku ou pikitai ki he ʻamanaki leleí mo e tui ʻe hoko mai e mana ki hoku fakamoʻuí pea ʻe ʻi ai ha ʻaho ʻe fakakakato ai e ngaahi talaʻofa kuó u maʻú. Ka ʻi he taimi tatau, te u lava pē ʻo hoko atu ʻi heʻeku fonongá mo e faingataʻa ko ʻení. Te u lava ʻo fakaʻaongaʻi e taimi tatali ko ʻení ke u hoko ʻo toe lelei ange, fakapotopoto ange, mālohi, angaʻofa mo faʻa kātaki ange, pea mo toe loto-fakatōkilalo ange. Te u lava ʻo fakamālohia hoku vā fetuʻutaki mo e Tamai Hēvaní mo hoku Fakamoʻui ko Sīsū Kalaisí.
Neongo pe ko e hā ha mana pe talaʻofa ʻokú ke tatali ki ai he taimí ni, neongo pe ko e hā hono fuoloa hoʻo tatalí, ʻoua naʻa siva hoʻo ʻamanakí. Ko e hā pē kuo talaʻofa atu ʻe he Tamai Hēvaní, ʻe hoko ia. Ka ʻe hoko mai e ngaahi maná ʻi Heʻene taimí kae ʻikai ʻatautolú. ʻOua naʻa mole hoʻo falala kiate Iá. ʻOua naʻá ke pehē ʻoku fakalongolongo hifo ʻa langi. ʻOkú Ne teuteu ʻa e halá maʻau. Tokanga taha ki he lolotongá pea fakahoko ʻa ia te ke lava ʻo fai ke ke fakalakalaka ai ʻi he ʻahó ni ʻi hoʻo fonongá. Foʻi sitepu ʻe taha ʻi he taimi. Tauhi maʻu ai pē hoʻo ʻamanaki leleí ʻi hoʻo tatali ki ho maná.
ʻE hoko mai ia.