Ngaahi Tefitoʻi Moʻoni ʻo e Ngāue Fakaetauhí
Te Tau Lava Fēfē ʻo Poupou ki he Mātuʻá ʻo Fakafou ʻi he Ngāue Fakaetauhí
ʻOku fie maʻu ʻe he mātuʻá ha ʻofa mo ha poupou ʻi honau ngaahi fatongia fakalangí ko ha ngaahi faʻē mo ha ngaahi tamai.
Ngaahi taá mei he Getty Images; tā fakatātā ʻo e fānaú meia Addison P. mo Hadley P.
ʻOku faʻa fehangahangai e mātuʻá mo ha ngaahi faingataʻa makehe mo faʻa faingataʻa. ʻE malava ke mātuʻaki mahuʻinga e poupou ʻofa ʻa e kau tangata mo e kau fefine ngāue fakaetauhí ki he lelei ʻa e ongomātuʻá mo e fānaú fakatouʻosi. ʻE faitāpuekina ʻe he ʻOtuá ʻetau ngaahi feingá ʻi heʻetau fekumi ki ha ngaahi founga ke fakamālohia ai e ngaahi mātuʻa mo e fānau ʻi heʻetau moʻuí.
Ne fakatou foʻou ʻa Ane mo Kala ki hona uōtí ʻi he taimi ne vahe ai ʻa Ane ke ngāue fakaetauhi kia Kala mo hono kiʻi fāmilí. Ne tupulaki vave ha vā fakakaungāmeʻa ʻiate kinaua. Naʻe fiefia ʻa Ane, ko ha fefine toki mali foʻou, ʻi heʻene tokoni kia Kala mo hono ʻofefine ʻe toko faá, ʻa ia ne kamata mei ha kiʻi pēpē valevale ki he taʻu fitú. ʻI ha ʻaho ʻe taha, ne ʻiloʻi ai ʻoku papā e ngeʻesi ʻulu ʻo e pēpē ʻa Kalá pea naʻe fie maʻu ke fakahoko hano tafa.
Ne loto lelei ai ʻa Ane ke tokangaʻi e toenga ʻo e fānaú kae ʻoua kuo aʻu mai ʻenau kui fefiné ke tokangaʻi kinautolu. ʻI he tūʻuta atu pē ʻenau kui fefiné, naʻe ʻeke ange ʻe Ane pe ko e hā ha tokoni te ne ala fie maʻu, peá ne ngaohi mai ha meʻatokoni efiafi maʻá e fāmilí he pō ko iá. Naʻá ne fokotuʻutuʻu foki ke ʻomi ʻe he ngaahi kaungāʻapí ha ngaahi meʻakai maʻanautolu ʻi ha ngaahi ʻaho siʻi.
ʻI he ʻaho hono hokó ʻi heʻene vakaiʻi e fāmili ʻo Kalá, ne fakatokangaʻi ʻe Ane ʻoku hohaʻa ha taha ʻo e ngaahi ʻofefine ʻo Kalá ki hono kiʻi tokoua siʻisiʻí, ko ia ne fakaafeʻi ia ʻe Ane ke ʻaluange ke na taʻo kūkisi ke tokanga makehe kiate ia. Ne fakahoko foki ʻe Ane ha pōpoaki telefoni ki he fakataha alēlea ʻa e uōtí ke nau ʻilo e meʻa kuo hokó mo talaange te ne ʻoange maʻu pē e fakamatala fakamuimui tahá. Lolotonga e uike hono hokó, ʻi hono fakahoko e faitoʻo ʻo e pēpeé, ne lipooti maʻu pē ʻa Ane ki he fakataha alēlea ʻa e uōtí mo tokangaʻi e ngaahi fiemaʻu ʻa e fāmilí. Ne hoko e tokoni ʻa Ané ke maʻu ai ʻe Kala ha taimi mo ha nonga ko ha mātuʻa lolotonga ha taimi faingataʻa mo fakamanavahē.
Ngaahi Tokoni Ngāue Fakaetauhi ʻi he Tokoni ke Poupou ki he Mātuʻá
1. Fakasiʻisiʻi e loto-hohaʻa ʻoku ongoʻi ʻe he mātuʻá. Kapau ʻoku aʻusia ʻe he fāmilí ʻa e loto-hohaʻá, ʻe lava ke fakasiʻisiʻi ʻe homou vā fetuʻutakí ʻa e loto-mafasia ʻokú ne fakafaingataʻaʻiaʻi e hoko ʻa e mātuʻá ko ha kakai nonga mo ʻofa ʻi he moʻui ʻenau fānaú. ʻE lava ke kau ʻi he ngaahi founga tokoní ʻa e:
-
Feinga ke mahino e ngaahi tupuʻanga ʻo e loto-hohaʻá. Hoko ko ha tokotaha tokoni ʻi hoʻo fakafanongo leleí. Muimuiʻi e ngaahi ongo ʻokú ke maʻú.
-
Ko hono akoʻi ʻo e ngaahi taukei kumi ngāué, tokoni ke fakaleleiʻi ʻena patisetí, pe kumi ha ngaahi faingamālie fakaako pe akoako ngāue.
-
Ko e tokoni ke fakaʻilo kiate kinaua e ngaahi maʻuʻanga tokoni ʻaongá, hangē ko e ngaahi kalasi moʻui fakafalala pē kiate kitá, pe tokoniʻi kinaua ʻi hono fakakakato ha pepa ngāue ki ha tokoni fakapaʻanga.
2. Fakamālohia e tuʻunga malava ʻa e mātuʻá ke fua e kavengá. ʻE lava ke kau heni hano:
-
ʻOange kiate kinaua ha ngaahi maʻuʻanga tokoni ʻe niʻihi ʻa e Siasí ʻe lava ʻo tokoni ʻi hono tūkungá tonu.
-
Fakataimi-tēpileʻi ha ngaahi taimi ke tokoniʻi fakaeloto ai kinaua ʻaki hoʻo fanongo mo hoko ko ha fakafiemālie.
-
Fakaʻatā ha taimi ma haʻa mātuʻa ke lava ai ʻo tokanga pē kiate ia.
3. Fakatupulaki ʻenau loto-vilitakí mo e ʻamanaki leleí ʻi haʻo:
-
Fakahaaʻi hoʻo ʻamanaki lelei mo e tui kia Kalaisí pea fakatafoki kinaua kiate Ia ki ha nonga mo ha tokoni.
-
Tokoniʻi kinaua ke fakamahuʻingaʻi e lelei ʻo e ngaahi taimi faingataʻa mo moveuveu ʻo e hoko ko ha mātuʻá pea mo fakapapauʻi ange ʻoku ʻikai ke na tuenoa ʻi he ngaahi taimi ʻo e mamahí.
-
Fakahaaʻi ange ha ʻofa mo fakahikihikiʻi kinaua ʻi he ngāue maʻongoʻonga ʻokú na fakahokó.
4. Fakafaingofuaʻi ʻa e fiefiá ʻOku kau ʻi he ngaahi faingataʻa lahi taha ki he mātuʻa ʻoku faingataʻaʻiá ʻa hono maʻu ha ivi feʻunga ke vaʻinga mo fiefia mo ʻenau fānaú. Te ke lava ʻo tokoni ʻi hoʻo:
-
Fokotuʻutuʻu ha efiafi maʻu meʻatokoni pe keimi.
-
Fakafiefiaʻi e ngaahi taimi ʻoku mahuʻinga kiate kinauá, hangē ko e ngaahi ʻaho fāʻeleʻí, ʻaho mālōloó pe ko ha ngaahi makamaile mahuʻinga kehe.
-
Fakaafeʻi kinaua ke mou kau fakataha ki ha ʻekitivitī ne palani kiate kimoutolu pē.