Ngaahi Tefitoʻi Meʻa Mahuʻinga ʻo e Ongoongoleleí
Ko e hā ʻa e Toluʻi ʻOtua?
ʻOku māvahevahe pē ʻa e Tamai Hēvaní, Sīsū Kalaisi mo e Laumālie Māʻoniʻoní ka ʻoku taha ʻenau taumuʻá.
Toʻohema ki he toʻomataʻu: Siosefa Sāmita ʻoku Tohi, tā ʻe Dale Kilbourn; fakaikiiki mei he ʻUluaki Mata Meʻa-Hā-Maí, tā ʻe Jon McNaughton; Kalaisi ʻOku Malanga ʻi he Maama Tataliʻanga ʻo e Ngaahi Laumālié, tā ʻe Robert T. Barrett; laʻitā ʻo e langí mei he Getty Images; ʻUluaki Mata Meʻa-Hā-Maí, tā ʻe Walter Rane; laʻitā ʻo ha fefine ʻoku laukonga tā ʻe Tyler Lewis; Ko e Fanongó, tā ʻe Michael Jarvis Nelson
Ne fehuʻi ʻe ha ʻētita nusipepa ʻe taha ki he Palōfita ko Siosefa Sāmitá pe ko e hā ʻoku tui ki ai e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he tali ʻa e Palōfitá, naʻá ne hiki ha fakamatala ʻe 13 ʻo e tuí ʻa ia ʻoku tau ui ko e Ngaahi Tefito ʻo e Tuí. ʻOku pehē ʻe he ʻuluaki fakamatalá, “ʻOku mau tui ki he ʻOtua, ko e Tamai Taʻengatá, pea ki Hono ʻAlo, ko Sīsū Kalaisí, pea ki he Laumālie Māʻoniʻoní” (Ngaahi Tefito ʻo e Tui 1:1). ʻOku faʻu ʻe he toko tolu ko ʻení ʻa e meʻa ʻoku tau ui ko e Toluʻi ʻOtuá.
ʻOtua, ko e Tamai Taʻengatá
ʻOku maʻu ʻe he ʻOtuá ha sino toetuʻu ʻo e kakano mo e hui. Ko e Ia ʻa e Tamai ʻo hotau ngaahi laumālié. ʻOkú Ne ʻofa haohaoa ʻi Heʻene fānaú takitaha. ʻOku haohaoa ʻa e ʻOtuá, maʻu e mālohi kotoa pē, mo tokaimaʻananga ki he meʻa kotoa pē. ʻOkú Ne angatonu, ʻaloʻofa, mo angaʻofa foki. Ne tau moʻui ko ha ngaahi laumālie mo e ʻOtuá kimuʻa pea fanauʻi kitautolú. Naʻá Ne ʻomi kitautolu ki he māmaní ke tau ako mo tupulaki. Ko e finangalo taupotu taha ʻa e ʻOtuá ke tau foki kotoa hake ko ʻEne fānau ʻo toe nofo fakataha mo Ia hili ʻetau maté. ʻOku akoʻi kitautolu ʻe he ʻOtuá, kuo pau ke tau muimui ʻia Sīsū Kalaisi ke tau foki hake ai ki he ʻao ʻo e ʻOtuá.
Sīsū Kalaisi
Toʻohema ki he toʻomataʻu: Siosefa Sāmita ʻoku Tohi, tā ʻe Dale Kilbourn; fakaikiiki mei he ʻUluaki Mata Meʻa-Hā-Maí, tā ʻe Jon McNaughton; Kalaisi ʻOku Malanga ʻi he Maama Tataliʻanga ʻo e Ngaahi Laumālié, tā ʻe Robert T. Barrett; laʻitā ʻo e langí mei he Getty Images; ʻUluaki Mata Meʻa-Hā-Maí, tā ʻe Walter Rane; laʻitā ʻo ha fefine ʻoku laukonga tā ʻe Tyler Lewis; Ko e Fanongó, tā ʻe Michael Jarvis Nelson
ʻOku maʻu foki ʻe Sīsū Kalaisi ha sino toetuʻu ʻo e kakano mo e hui. Ko Ia ʻa e ʻAlo Tofu Pē Taha ʻo e ʻOtuá. Kimuʻa pea fanauʻi kitautolú, ne fili Ia ʻe he ʻOtuá ke hoko ko hotau Fakamoʻuí. ʻOku ʻuhing ʻeni naʻe hāʻele mai ʻa Sīsū ki he māmaní ke hoko ko ha sīpinga kiate kitautolu, akoʻi ʻEne ongoongoleleí, fakalelei maʻa ʻetau ngaahi angahalá, mo fakahaofi kitautolu mei he maté. Koeʻuhí ko Sīsū Kalaisi, ʻe lava ke fakamolemoleʻi kitautolu mei heʻetau ngaahi angahalá ʻi he taimi ʻoku tau fakatomala aí. Naʻe fuesia foki ʻe Sīsū Kalaisi ha ngaahi meʻa lahi kae lava ke mahino kiate Ia mo tokoniʻi kitautolu. Naʻe pekia ʻa Sīsū Kalaisi peá Ne toe moʻui, ʻo malava ai ke toe moʻui ʻa e tokotaha kotoa pē.
Ko e Laumālie Māʻoniʻoní
Ko e Laumālie Māʻoniʻoní ko ha taha ia ʻo e kau mēmipa ʻo e Toluʻi ʻOtuá ʻa ia ʻoku ʻikai ke ne maʻu ha sino fakamatelie. Ko ha laumālie ia. ʻOku lava e Laumālie Māʻoniʻoní ʻo fetuʻutaki hangatonu mo hotau ngaahi laumālié. ʻOkú ne fakamoʻoniʻi kiate kitautolu ʻoku moʻoni ʻa e ʻOtuá pea ko Sīsū Kalaisi hotau Fakamoʻuí. ʻOku ngāue e Laumālie Māʻoniʻoní ko ha talafekau ʻa e ʻOtuá ke ʻomi kiate kitautolu ha ngaahi ongo ʻo e ʻofá, fakahinohinó pe fakafiemālié. ʻI he taimi ʻoku papitaiso mo hilifakinima ai kitautolú, ʻoku tau maʻu e meʻafoaki ʻo e Laumālie Māʻoniʻoní. Hili hotau papitaisó, ʻe lava ke nofoʻia maʻu pē kitautolu ʻe he Laumālie Māʻoniʻoní ʻi heʻetau tauhi e ngaahi fekau ʻa e ʻOtuá.
ʻUluaki Mata Meʻa-hā-mai ʻa Siosefa Sāmitá
ʻI he fakalau ʻa e taimí kuo puputuʻu e kakaí fekauʻaki mo e Toluʻi ʻOtuá. Kuo ʻikai tui e kakaí ki he tuʻunga moʻoni ʻo e ʻOtuá, Sīsū Kalaisí mo e Laumālie Māʻoniʻoní. Ko e ʻuhinga ʻeni ʻe taha ʻoku mātuʻaki mahuʻinga ai e ʻUluaki Mata Meʻa-Hā-Mai ne maʻu ʻe Siosefa Sāmitá. Naʻá ne mamata ʻoku maʻu ʻe he Tamai Hēvaní mo Sīsū Kalaisi ha sino pea ko ha ongo tangata māvahevahe kinaua ʻe ua.
Māvahevahe kae Uouongataha
Toʻohema ki he toʻomataʻu: Siosefa Sāmita ʻoku Tohi, tā ʻe Dale Kilbourn; fakaikiiki mei he ʻUluaki Mata Meʻa-Hā-Maí, tā ʻe Jon McNaughton; Kalaisi ʻOku Malanga ʻi he Maama Tataliʻanga ʻo e Ngaahi Laumālié, tā ʻe Robert T. Barrett; laʻitā ʻo e langí mei he Getty Images; ʻUluaki Mata Meʻa-Hā-Maí, tā ʻe Walter Rane; laʻitā ʻo ha fefine ʻoku laukonga tā ʻe Tyler Lewis; Ko e Fanongó, tā ʻe Michael Jarvis Nelson
ʻOku akoʻi kitautolu ʻe he folofolá mo e kau palōfita ʻo e onopōní ʻoku māvahevahe ʻa e ʻOtuá, Sīsū Kalaisi mo e Laumālie Māʻoniʻoní kae taha ʻi he taumuʻa: ko ʻetau moʻui taʻe-faʻa-maté mo e moʻui taʻengatá (vakai, Mōsese 1:39). Hangē ko ha kau mēmipa ʻo ha timi tatau, ʻoku Nau ngāue fakataha ke tokoniʻi kitautolu ʻi he ʻaho kotoa pē. ʻE lava ke tau ongoʻi ofi ange kiate Kinautolu ʻi he taimi ʻoku tau fakatomala ai mei heʻetau ngaahi angahalá mo fili e totonú.
Ngaahi Potufolofola fekauʻaki mo e Toluʻi ʻOtuá
-
ʻOku taha ʻa e Tamai Hēvaní mo Sīsū Kalaisi ʻi he taumuʻa (vakai, Sione 10:30).
-
Naʻe folofola e Tamai Hēvaní ki Hono ʻAló (vakai, Mātiu 3:16–17).
-
Naʻe folofola ʻa Sīsū Kalaisi ki Heʻene Tamaí (vakai, Sione 11:41).
-
Naʻe lotua ʻe Sīsū Kalaisi kitautolu ke tau hoko ʻo “taha” ʻi ha ʻaho (vakai, Sione 17:11).
-
Naʻe mamata ʻa Siosefa Sāmita ki he Tamai Hēvaní mo Sīsū Kalaisi (vakai, Siosefa Sāmita—Hisitōlia 1:17).
-
ʻOku fakamoʻoniʻi ʻe he Laumālie Māʻoniʻoní ko Sīsū Kalaisi hotau Fakamoʻuí (vakai, Sione 15:26).