Talitali Lelei Kimoutolu ki he Makasini ko ʻEní

Ko e Founga ʻOku Fakamālohia ai ʻe he Ongoongoleleí Hotau Ngaahi Fāmilí

Photograph courtesy of the author

ʻI he ngaahi taʻu lahi kuo hilí, ne loto homau fāmilí ke fakamaau ʻemau ʻū kató, mavahe mei homau ʻapí, pea mau ʻalu ʻo vakaiʻi ha meʻa foʻou ʻi tuʻa mei homau fonua tupuʻangá. ʻI heʻemau teuteu ki he fononga ko ʻení, ne mau toutou alēlea fakataha ke fakapapauʻi ʻoku mau faaitaha ʻi heʻemau filí koeʻuhí te ne uesia kimautolu takitaha ʻi ha ngaahi founga kehekehe.

ʻIkai ngata ʻi hono fakamaau ʻemau ngaahi fiemaʻu fakatuʻasinó, ne mau aleaʻi e founga ʻe lava ke “fakamāʻopoʻopo” ai ʻemau ngaahi fiemaʻu fakalaumālié ʻaki hono hokohoko atu ʻemau lotú, ako folofolá mo e maʻu lotú. ʻI heʻemau nofo ʻi ha ngaahi feituʻu kehekehé, ne ʻaonga lahi kiate kimautolu ʻemau maʻu lotu ʻi ha ngaahi feituʻu ne mātuʻaki kehe mei he meʻa ne mau anga ki aí pea mo fetuʻutaki mo e Kau Maʻoniʻoni ne nofo he feituʻu ko iá. ʻI he peesi 22, te ke lava ʻo lau ai fekauʻaki mo e taha ʻo e ngaahi feituʻu ko iá, Tupai, pea mo e ngaahi faitatau taʻeʻamanekina ʻi he ngaahi ʻulungaanga lelei ne mau mātā ʻi homau ngaahi kaungāʻapi Mosilemí.

ʻOku fakatupu ʻe heʻemau mēmipa ʻi he Siasí ha fehokotaki ʻo e ʻofá mo e poupoú, ko ha fāmili ʻo e ongoongoleleí ʻoku tau kau kotoa ki ai. Ko hoku kaungāʻapi ko Seimí ko ha sīpinga lelei ia ʻo e ngāue fakaetauhí ki heʻeku fānaú. Hangē ko ʻení, ʻi he taimi ne tatali ai hoku ʻofefiné ke hū ki he senitā akoʻanga fakafaifekaú peá u ngāue lolotonga e ʻahó, ne faʻa ʻave ia ʻe Seimi ki he temipalé ʻi he ngaahi taimi ne ʻikai ke u lava aí.

• ʻI he peesi 16, te ke lau ai fekauʻaki mo ha ngaahi founga kehe ke poupouʻi e ngaahi mātuʻá ʻo fakafou ʻi he ngāue fakaetauhí.

• ʻI he peesi 8, te ke lau fekauʻaki mo e faleʻi ʻa ʻEletā Sefilī R. Hōlani fekauʻaki mo hono ʻai ʻetau fānaú ke tau vāofí.

• ʻI he peesi 12, te ke lau ai fekauʻaki mo e ngaahi founga ke fakatupulaki hoʻomou ngaahi fakataha alēlea fakafāmilí.

Fiefia ʻi he makasini ko ʻení ʻi hoʻo fakakaukau ki he founga te ke lava ai ʻo fakaʻaongaʻi e ngaahi tefitoʻi moʻoni ʻo e ongoongoleleí ke tokoni ki hono ohi hake hoʻo fānaú mo e niʻihi kehe ʻoku mou feohí.

Fakaʻapaʻapa atu,

Carol Chomjak