Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Liahona Naʻe Fakahā Mai ʻe he ʻOtuá Kiate Aú
ʻI he kamataʻangá, hangē ne ngali takuanoá kiate au hono pehē kuo fakafoki mai e Siasi ʻo Sīsū Kalaisí.
Laʻitā ʻo e nimá mei he Getty Images; laʻitā ʻo e ʻātakaí mei muí meia Clebher Tex
ʻI heʻeku hoko ko ha tokotaha ako PhD ʻi ʻAositelēliá, ne u faʻa fononga mei hoku nofoʻangá ki ha ngaahi falekai ofi mai ʻi he vahefonua fakapisinisi ʻo loto Melipoané. Lolotonga haʻaku heka veeni ʻe taha, ne u fakatokangaʻi ʻi he falikí ha kaati ne ʻasi ai e ʻīmisi ʻo Sīsū Kalaisí. Ne ʻi ai ha leʻo ʻi loto ʻiate au ne pehē mai ke u toʻo hake ia.
Ne u talangofua ʻo toʻo fakalelei hake e kātí ki ʻolunga. Ne u fakasio leva ha feituʻu lelei ange ke tuku ai e laʻi ʻīmisi ʻo e Fakamoʻuí ka ne ʻikai ke u maʻu ha feituʻu lelei. ʻI heʻene peheé, ne u iku ʻalu mo e laʻi kātí ki ʻapi ʻo hili ʻi he funga laupapa tukuʻanga tohí.
Hili ha ʻaho ʻe tolu mei ai, ne u fetaulaki mo ha ongo faifekau ʻi heʻeku ʻalu ke maʻu meʻatokoni hoʻataá. Ne mau fokotuʻu ha taimi pau ke na akoʻi au, peá na ʻomi kiate au ʻa e kaati tatau mo ia ne u maʻu kimuʻá. ʻI heʻeku foki ki ʻapí, ne u fakahoa e ongo laʻi kātí. Ko ha ongo laʻikaati fakatouʻosi mei he siasi ʻo e ongo faifekaú.
ʻI he taimi ne ʻaʻahi mai ai e ongo faifekaú, ne na fakahoko ʻena fakamoʻoni fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he kamataʻangá, ne ʻikai ke u ongoʻi fiemālie ʻi heʻena fakamoʻoní. Kiate au, hangē ne ngali takuanoa ke te pehē kuo fakafoki mai e Siasi ʻo Sīsū Kalaisí pea ko e siasi moʻoni pē ia ʻe taha ʻi he māmaní, ka ne ʻi ai ha meʻa ʻe ua naʻá ne maʻu ʻeku tokangá.
ʻUluakí, ne u lau mei he folofolá ko e “manavahē [ki he ʻEikí] ko e kamataʻanga ia ʻo e potó” (Saame 111:10). Ne u fie maʻu ʻa e potó pea ne u fie manavahē ki he ʻEikí kae lava ke u maʻu ʻa e potó. Ne u pehē he ʻikai ke u manavahē ki he ʻEikí taʻe te u ʻilo Ia. Ko ia ai, ne mahuʻinga e meʻa ne akoʻi mai ʻe he ongo faifekaú koeʻuhí ne fie maʻu ke u maʻu ha ʻilo fekauʻaki mo e ʻEikí.
Ko hono uá, ne u aofangatuku naʻe tataki au ʻe he ʻEikí ke u maʻu e laʻi kaati ne u maʻú. ʻI he kotoa ʻo e ngaahi taʻu ʻeku nofo ʻi Melipoané, kuo teʻeki ke u sio ha laʻi kaati pehē ʻi he falikí. Ne u pehē ai ne ʻikai lī noaʻia pē ai e laʻi kātí.
ʻI heʻeku fanongo ki he ngaahi lēsoni ʻa e ongo faifekaú, ne fakaʻau ke u fiefia ange mo fakafonu ʻe ha ʻilo ne u maʻu mei he ako foʻou ne fakahoko mai kiate aú. ʻI ha taimi siʻi mei ai, ne u papitaiso. Kuó u sila ʻeni ki hoku uaifí mo ʻeku fānaú ki taimi mo ʻitāniti, pea ʻi he ʻaho ní ʻoku ou maʻu ʻa e fakamoʻoni tatau mo ia ne fakahoko mai ʻe he ongo faifekaú kiate aú: Kuo fakafoki mai e Siasi ʻo Sīsū Kalaisí ʻo fakafou ʻi he Palōfita ko Siosefa Sāmitá. Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e siasi moʻoni pē taha ʻi he māmaní pea ʻoku tataki ia ʻe ha palōfita moʻui.