Na’o le Faatekinolosi
Mauaina o le Avea Ma Ni O Keriso
E alaala le tusitala i le Aai o Kanagawa Prefecture, Iapani.
A o faasolo ina soloia pa puipui o le faailoga tagata e faatatau i luitau a ou atalii, sa maua e lo‘u aiga se lagona o le avea ma ni o—ma le olioli tele lea e sau mai le talalelei a Iesu Keriso.
E masani ona tatou faalogo e faapea o le alofa e mafai ona faamaloloina ai manu‘a uma, ae ou te lei iloa pe moni lenei mea seia oo ina ua ou ola ai.
Mo le tele o tausaga, sa tauivi lo‘u aiga e sue se nofoaga e avea ai ma ni o. Sa maua la‘u fanau tama e toalua i le faaletonu o le mafaufau ma le ADHD a o laiti, ma ona o a la amioga e le pulea ma e masani ona faalavelave, o le toatele o tagata sa le malamalama i lo la tulaga. I lo‘u atunuu moni o Iapani, o le 98 pasene o le faitau aofai o tagata o Sapani. I soo se eria e maualalo ai ni eseesega, e mafai ona faigata mo tagata ona talia i latou o e ua fai si ese teisi.
A o laiti la‘u fanau, sa ou taumafai e lesitala i latou i le aoga faataitai. Sa amata ona ou talosaga i aoga i totonu o le eria, ae o talosaga taitasi, sa ou fetaiai ma le tali faigata lava e tasi: o le taimi lava na feiloai ai le aufaigaluega i o‘u atalii ma iloa ai e uiga i o la tulaga, sa logoina ai loa i matou ua le o toe i ai ni avanoa i le aoga. Mulimuli ane sa faafeiloaia i matou e se nofoaga i se taulaga tuaoi, ae faatoa uma lava ona teena i matou e aoga faataitai uma i lo matou aai.
Sa matuai tiga lava.
Sa lei faigofie ona feoai i ala o femalagaaiga lautele. O nisi taimi, pe a ou otegia tamaiti ona o le pisapisao i luga o le nofoaafi, la te faatinoina amioga le talafeagai, ma afua ai ona fai mai tagata ese sa ou sauaina . O isi taimi, ou te taofia ai lava au ia mai le faafilemuina o tamaiti ona o le fefe i ni aga e aliae mai i a la faatinoga, a ua fai mai ai isi pasese sa ou le amanaiaina.
Sa i ai foi a’u tagata faigaluega faaagafesootai na faatauanauina au e tuuina se tasi o la’u fanau i se nofoaga e tausi ai e mama’i, e na o le faatasi mo le lua tausaga ona fesootai atu iai, ona sa latou talitonu o le a le mafai lava ona ou tausia se fanau e toalua e faaletonu mafaufau ma le ADHD o se tina nofotoatasi. Peitai, i le i ai o ni aafiaga patino i tiga o le faigata o le olaga faatamaitiiti—na tetea ou matua a o ou laitiiti ma mo mafuaaga eseese sa le mafai ai ona tausia au—sa ou naunau e faia le mea sili ou te mafaia e tuuina atu ai i ou atalii le alofa loloto e tatau ai mo tamaiti uma.
Faapotopotoina Saogalemu
I ni nai tausaga ua mavae, sa ou auai ai i se semina faalegaluega, ma sa ou matauina ai nisi o taitai o le semina e piilima o latou lima ma punonou o latou ulu a o lei aai i le aoauli. O le tele lava o nei tagata e ese le lelei, sa ou mafaufau ai ia te au lava. Aisea e le lelei ai o latou lagona i soo se taimi latou te nonofo ai i lalo e aai?
Sa vave ona ou iloaina sa latou tatalo—e le o le le fiafia—ma sa le mafai ona ou taofia le fai atu o ni fesili e uiga i lo latou talitonuga. Sa lofituina i latou i le agalelei ma sa i ai se agaga tulaga ese e uiga ia i latou, ma sa ou naunau ia iloa atili. Sa ou aoaoina o i latou o ni tagata o O Le Ekalesia a Iesu Keriso o le Au Paia o Aso e Gata Ai, ma sa vave ona matou taliaina la latou valaaulia e auai faatasi ma i latou i le lotu.
Ona o lona faaletonu o le mafaufau, sa fefe ai lou atalii laitiiti i le i ai i ni vaega toatele ma feiloai i tagata fou, ae sa faafeiloai i matou e le uarota i lima mafola ma faia mea uma latou te mafaia e taulima ai o matou manaoga. Sa faataatia ese e tagata o le ekalesia se potu faapitoa i le pito i tua o le falesa mo na o lo‘u atalii, ma sa latou talia la matou talosaga e aloese mai le faia o se fesootaiga ma ia seia oo ina ia lagonaina le faigofie. E tusa lava pe faalavelaveina e se tasi o la‘u fanau le sauniga faamanatuga, sa taulimaina i matou ma le faaaloalo atoatoa ma le agalelei.
Sa ou vaaia le tatalaina mai o ou atalii i le mafanafana o le opo a le uarota. Sa vave ona la maua ni uo fou, ma sa amata ona auai ou atalii i vasega o le Peraimeri i aso sa le mafai ai ona ou auai i le lotu.
Sa iu ina matou papatiso, o se manatuaga o loo aumaia ai pea loimata i o‘u mata. I le sauniga o le papatisoga, o tagata o le uarota—i le malamalama ai i le fefefe o lau fanau pe a tumutumu tagata—na savali filemu atu i le pito i tua o le potu ina ua uma ona saofafai tama e aloese mai ai mai le faafefeina o i laua. Mulimuli ane, sa ofoina mai ia i matou le anoanoai o measuamalie o le faamālō, ma o le alofa i totonu o le potu sa matuai talisapaia lava ma sa faapea mai ai o’u atalii, “Ou te toe fia papatiso!”
E leai se mea o ia te au vagana le lotofaafetai i lo’u loto pe a ou mafaufau e uiga i le loloto o le alofa na faaalia e tagata o le matou uarota—o se alofa lea na iu ina mafai ai ona matou maua le malamalama o le talalelei. Sa atoatoa ona afifi e le uarota le uiga o le “ia lalagaina faatasi o tatou loto i le lotogatasi ma le alofa o le tasi i le isi” (Mosaea 18:21). Sa faamanuiaina moni lava lo‘u aiga i le agalelei o nei Au Paia o Aso e Gata Ai.
Mauaina o le Filemu ma le Avea Ma Ni O
Ua lua nei tausaga talu ona matou papatiso ma o‘u atalii. O ou atalii uma e toalua ua faauuina i le Perisitua Arona, ma ua ou vaai i se suiga maoae i a laua amioga.
Ou te faafetai mo le toatele o tagata agalelei o e na taliaina lo‘u aiga ma na fesoasoani i o’u atalii e faatoilalo lo la fefefe e ala i le mana o le alofa. Ou te faafetai mo le talalelei a Iesu Keriso, lea e oo lava i manua loloto o le faailoga tagata e mafai ona faamaloloina. Ma e sili atu i lo mea uma, ou te faafetai mo se Tama Faalelagi alofa, o lē sa saunia se ala mo lo‘u aiga e maua ai le filemu ma avea aii ma ni o, e tusa lava pe sa le mafai ona ou iloa po o le a lena ala.
Ua ou aoaoina a tatou faia se avanoa mo o tatou eseesega, tatou te faia se avanoa mo le alofa sili atu. O i tatou taitoatasi o se atalii/afafine faapelepele a ni matua faalelagi, ma a o tatou manatuaina lenei upumoni, e mafai e i tatou uma—e tusa lava po o fea o tatou i ai po o ai i tatou—ia tasi ia Keriso (tagai Mataupu Faavae ma Feagaiga 38:27).