E Mafai Faapefea ona ou Fesoasoani e Faatoilalo le Faailoga Tagata?

O auala nei e ono e mafai ona tatou lafoaia ai le faailoga tagata ae faalauiloa le faaaloalo.

women sitting in circle enjoying sharing stories in group meeting

O Le A Se Mea e Mafai Ona Ou Faia e Faatoilalo ai le Faailoga Tagata?

1. Tagai muamua i totonu. E mafai ona tatou tuuto atu ia iloa i totonu o i tatou lava ma lafoai soo se “uiga faaalia ma amioga o le faailoga tagata.”¹

Na saunoa mai Peresitene Russell M. Nelson, “Soo se tasi o i tatou e i ai le faailoga tagata i isi e manaomia ona salamo!”²

2. Saili ina ia Malamalama. Faaalu le taimi e faalogologo ai ia i latou o e ua oo i aafiaga o le faailoga tagata. O lenei mea e mafai ona aofia ai tusi faatuatuaina, ata tifaga, ma lipoti o talafou e uiga i le autu.³

O Darius Gray, o se tagata lauiloa Aferika Amerika ma se taitai o le Ekalesia, sa matauina, “Afai tatou te taumafai e faalogo moni ia i latou tatou te mafaufau i ai ‘o le isi,’ ma afai o lo tatou taulaiga faamaoni o le tuu atu lea ia i latou e faasoa mai o latou olaga, o latou talafaasolopito, o latou aiga, o latou faamoemoega, ma o latou tiga, e le gata o le a tatou maua ai se malamalama sili atu, ae o lenei faataitaiga o le a fesoasoani e faamalolo ai manuʻa o le faailogalanu.⁴

3. Tautala i ai. Afai e te faalogo i se tagata o faasoa mai se manatu sese pe le lelei e uiga i se ituaiga tagata, tautala i se auala agaalofa ae manino.

Na saunoa mai Peresitene Dallin H. Oaks, Fesoasoani Muamua i le Au Peresitene Sili, “I le avea ai o ni tagatanuu ma tagata O Le Ekalesia a Iesu Keriso o le Au Paia o Aso e Gata Ai, e tatau ona tatou faia mea e sili atu e fesoasoani ai e tafiese atoa le faailoga lanu.”⁵

Na a’oa’o mai Elder Gerrit W. Gong o le Korama a Aposetolo e Toasefululua, “Ua valaaulia ai i tatou e sui le lalolagi mo le lelei atu, mai i totonu i fafo, e tasi le tagata, tasi le aiga, tasi le pitonuu i le taimi.”⁶

O Le a Se Mea e Mafai Ona Ou Faia Pe Afai Ua Ou oo i Aafiaga o le Faailoga Tagata?

man in wheelchair communicates cheerfully with employees at the office

1. Faamagalo atu, ma maua se uo. Pe a tiga i tatou i amioga a isi, e mafai ona tatou a’oa’o atu ma faamagalo atu ma saili e fausia se sootaga.

A o auauna ai o se Fitugafulu Eria, sa saunoa ai Elder Fred A. ‘Tony” Parker: “Ina ua aafia a’u i le faailogalanu, ua ou mauaina le alualu i luma i le tetee atu i ai, faamagalo le tagata ma talanoaina le mataupu. Afai e fai mai e se tasi se mea e faatiga ai o’u lagona, e tatau ona ou sailia se auala e fesoasoani ai ia te ia ia malamalama i le mafuaaga e tiga ai lena mea. O se avanoa e le gata i le faamagalo atu ae o le fausia o se sootaga ina ia le na ona vaai i ai le tagata ia Tony Parker o se Amerika Aferika ae o se atalii o le Atua. Na a’oa’o atu e Iesu le faamagaloga (tagai Mataio 18:21–35), ma sa Ia aoao mai i tatou afai e agaleagaina i tatou e tatau ona tatou o atu i lea tagata ma faalelei ma ia (tagai i le Mataio 18:15). “⁷

2. A’oa’o ni lesona aoga mai aafiaga tiga (tagai i le Mataupu Faavae ma Feagaiga 122:7).

Ua faamatala mai e le Faifeau Amosa C. Brown se tala e uiga ia Howard Washington Thurman. Sa nofo Howard i autafa o se fafine o le sa agaleaga i lona aiga ona o i latou o ni tagata Uli—e oo lava i le tauai o otaota o moa mai lana pa moa i le fanua o le au Thurman.

Ina ua gasegase le fafine, sa ave e le tina o Howard ia te ia se supo ma ni fuarosa. Faatasi ai ma le agaga faafetai, sa fesili atu ai le fafine po o fea e aumai ai fugalaau. Sa faamalamalama mai e Mrs. Thurman, “A o e togiina mai otaota o moa, sa saunia e le Atua le eleele.”

“O le mea lena e tatau ona tatou faia i le totonugalemu o le leaga,” o le tala lea a Faifeau Brown. “Ave le otaota ae ia i ai le faatuatua i le Atua e faaaoga ai e tupu ai se togalaau o rosa.”⁸

3. Liliu atu ia Keriso mo le faamalologa ma le taitaiga. O le faatuatuaina o le Faaola i ou tiga ma mulimuli ia te Ia e mafai ona aumaia ai le filemu.

Na a’oa’o mai Elder D. Todd Christofferson o le Korama a Aposetolo e Toasefululua e faapea, i le faaopoopo atu i le togiolaina o i tatou mai le agasala e ala i le faamalieina o manaoga o le faamasinotonu i o tatou luga, o Iesu Keriso “ua faamalieina foi le aitalafu o nofoaitalafu ai le faamasinotonu ia i tatou e ala i le faamaloloina ma le tausia o i tatou mo soo se mafatiaga tatou te onosaia ma le taumamaina.”⁹

Ua saunia e le Faaola le faataitaiga atoatoa mo i tatou e mulimuli ai. Sa Ia a’oa’o mai ia i tatou le mea e fai pe a agaleagaina (tagai Mataio 18:15), sauaina (tagai Mataio 5:38–48), ma e oo lava i faamasinoga le tonu e faasalaina i le oti (tagai Luka 23:34).

Suesue Atili

A’oa’o atili e uiga i le mea ua a’oa’o mai e le talalelei a Iesu Keriso e uiga i le faatoilaloina o le faailoga tagata:

A’oa’o po o a mea o a’oa’o mai e perofeta a le Alii i lenei autu. Faitau le tusiga o Autu o le Talalelei “Racial and Cultural Prejudice” i le topics.ChurchofJesusChrist.org.
A’oa’o mai i taitai o le Ekalesia le ala e mafai ai ona tatou maua le lotogatasi i eseesega. Faitau “E Mafai Ona Lelei Atu Ona Tatou Faia: Faafeiloaiina o Isi i totonu o le Lafu Liahona, Set. 2017, 22-27.
Tagai i fuaitau ma vitio mai se talanoaga i le va o Elder Jack N. Gerard o le Fitugafulu ma le Faifeau Amosa C. Brown o le Ekalesia Papatiso Lona Tolu o San Francisco. Alu i le lomiga faaeletonika o le Liahona o Setema 2021 i le liahona.ChurchofJesusChrist.org po o le Gospel Library app.