Ua Silafia e Iesu Keriso le Tiga Tatou te Lagonaina mai le Faailoga Tagata
E alala le tusitala i Gauteng Province, Aferika i Saute.
O la’u sailiga o le vaai lea i tagata e pei ona silasila i ai le Faaola.
I le fale tatala o le Malumalu o Roma Italia, e siomia ai e tagata o le Ekalesia ma uo le faatagata o le Christus , e pei ona vaaia i le faamalama o le nofoaga autu mo tagata asiasi mai.
Sa ou oo i aafiaga o le faailoga tagata po o le faaituau mo le toeitiiti 20 tausaga.
Ina ua auai i le Ekalesia i Mozambique, sa ou siitia atu i Aferika i Saute. O se atunuu matagofie, o se tasi o nuu e sili ona faamanuiaina i Aferika. O lona matagofie e mataalia i le eseesega o ona tagata ma se tamaoaiga i le aganuu.
O Aferika i Saute o se atunuu o loo faamaloloina pea mai se talafaasolopito na faapogisaina ai e le tuueseeseina o ituaiga ona o le faailogalanu. E ui ina sa aveesea aloaia le faailogalanu i le 1994, ae o loo tumau pea ia ma’ila o lenei aiaiga faavae o le faailogalanu na faatinoina e le malo.
I le avea ai ma se tamaitai Mozambique uliuli o le Au Paia o Aso e Gata Ai o loo nofo i Aferika i Saute mo le 18 tausaga ua mavae, sa ou faafoeina ma le faaeteete le faailoga tagata ma le faaesea, e tele ina faaalia i nai vaaiga maualalo laiti. O le faailogalanu, faivaega, faaituau, faailoga tagata o itupa, ma faailogaina o isi tagatanuu o ni nai faataitaiga o faafitauli o le tuueseeseina o ituaiga o loo feagai pea ma tagata lautele. O loo i ai se mea i totonu o le tagata natura e foliga mai e manao e vaevaeina tagata lautele ma faia ia tatou talitonu o le ese o le tagata e leaga.
O Mea Tatou te Taumafai e Fai
E mafai e tagata o le Ekalesia ona aafia i nei ituaiga manatunatuga? Sao lelei lava. E tatau ia i tatou uma ona tuu ese le tagata natura i a tatou taumafaiga i le olaga atoa ia avea ma tagata paia e ala i le Togiola a Keriso (tagai Mosaea 3:19).
Soo se taimi lava matou te lagona ai ma la’u fanau le faaesea, le amanaiaina, faafoliga, po o le vaai mai ona o le fiailoa, matou te o mai i le fale ma talanoa e uiga i ai. Matou te faapea atu, “O le a lena mea na tupu? Tatou iloiloina lenei mea. Sei o tatou talanoa i le mafuaaga e ala ai nei amioga a tagata.” O le talanoa e uiga i ai e fesoasoani e taofi ai o tatou lagona mai le faateleina i totonu o i tatou.
Ou te taumafai e aoao atu i la’u fanau, o lo tatou maoae e fuafuaina i le ala tatou te taulimaina ai tagata e taufaatauvaaina pe tuliese i le lalolagi (tagai Mataio 25:40). O lona uiga e mafai ona vaai mo ni auala e aapa atu ai i isi ina ia aua nei o tatou faaesea ai i latou.
O Loo Ou Taumafai e Avea e Pei o Iesu
E tusa ai ma le tiga o nisi o aafiaga, o lesona o loo tatou aoaoina o loo avea ai la’u fanau ma ni tagata e sili atu ona lelei. Ma a’u foi. O o matou faanoanoaga na fesoasoani ia i matou e atiinae ai le agaalofa ma le finagalo malamalama mo isi.
O aafiaga o se faailoga tagata ou te maua ai se avanoa e filifili ai. Pe o le a ou tiga ma tauimasui, pe o le a ou tuuina atu i lena tagata e le gata o se isi avanoa ae o se avanoa lona lua, lona tolu, ma le lona fa? Pe o le a ou vaai i le sosaiete o se nofoaga e le lelei, pe o le a avea a’u ma se tagata mo se suiga lelei?
Sa feagai foi le Faaola ma tulaga o le faailoga tagata ona o Lona tagata, o le mea sa Ia talitonu i ai, ma le nuu na afio mai ai o Ia (tagai Ioane 1:46). Ae Na te le’i tali atu i sauaga, ita, tiga, po o le inoino. Sa Ia a’oa’o e tetee atu i nei mea uma ma galue i le alofa ma le upumoni. Sa Ia a’oa’o mai o le mana ma le uunaiga e oo mai e ala i le faatauanau, tali-tiga, agamaualalo, agamalu, ma le alofa (tagai i le Mataupu Faavae ma Feagaiga 121:41). Sa Ia a’oa’o mai afai tatou te tiga, e tatau ona tatou o atu i lo tatou uso ma talanoaina faatasi (tagai Mataio 18:15). Sa Ia a’oa’o mai i tatou e tatalo mo i latou o e sauaina i tatou (tagai Mataio 5:38–48). Ma ina ua faamasinoina ma le le tonu o Ia ma tautau i luga o se satauro ia oti, sa Ia a’oa’oina i tatou ia faamagalo atu (tagai i le Luka 23:34).
I le iuga, o Lona alofa o le a suia ai i tatou ma le lalolagi (tagai i le 2 Nifae 26:24).
Ma o Le a Ou Taumafai Pea
E le o a’u o se tagata ua atoatoa; ou te le vave faamagalo atu i taimi uma i le mavae ai ona taufaifai mai se tasi ia te a’u. E alu ai le taimi, e manaomia ai le faamalologa, ma e manaomia ai le Agaga Paia e galue faatasi ma a’u. O nisi taimi ou te filifili ai ina ia tiga, ma ou te le vave taliaina Ana musumusuga. Ae afai ou te gauai atu ia te Ia, o le a galue ma le onosai le Agaga ia te a’u seia mafai ona ou malamalama i le mea e finagalo le Tama Faalelagi ou te faia i le tulaga.
O la’u sailiga ia vaai moni lava i tagata e pei ona silasila i ai le Faaola. Ina ia faia lena mea, e tatau ona tatou naunau e faailoa atu e le o ia i tatou tali uma. Pe a tatou naunau e fai atu, “Ou te le atoatoa; E tele mea e tatau ona ou a’oa’oina. O le a se mea e mafai ona ou a’oa’o mai i manatu o isi? “ —o le taimi lena e mafai ai ona tatou faalogo moni lava. O le taimi lena tatou te mafai moni ai ona vaai.
O lo’u i ai i lenei malaga, e fesoasoani e manatua ai o loo o’u i ai iinei mo se faamoemoega, o tofotofoga o le olaga e le tumau — o se vaega taua o le olaga faaletino — ma e le o tuua na o a’u. I mea uma lava, o loo ou taumafai e avea e pei o Iesu! O le taumafai e aoga, ma pe a tatou toilalo, e mafai ona tatou toe taumafai.