Itulau i le lotoifale
O Se Olaga Mo le Lelei: O Aafiaga a se Tinā Amiotonu
Ina ua auai le toalua o Leonie i Le Ekalesia a Iesu Keriso o le Au Paia o Aso e Gata Ai i le 1965, sa itiiti lona fiafia i le faatuatua. I tausaga mulimuli ane, sa amata ona faamalūlūina ona manatu i le lotu a lona toalua, ma na talia e Leonie lesona mai tuafafine faife’autala’i faamaoni i Rockhampton, Kuiniselani.
I le 1968, e ui sa le’i tele sana molimau, sa ia filifili e papatiso i le aso fanau o lona toalua, o se meaalofa mo ia. Masalo e le o se mafuaaga lelei lea e auai ai i se lotu fou, ae fai mai Leonie o le auai i le Ekalesia o se tasi lea o filifiliga sili sa ia faia.
Ina ua maliu o ia i le 2012, sa sili atu ma le 40 tausaga o avea Leonie ma se tagata filigā o le Ekalesia. Ua faasoa mai e lana fanau, fanau a lana fanau, ma fanau a fanau a lana fanau ni manatuaga tāua o Leonie a o faaauau ona faamanuiaina i latou e ala i le talatuu o lona faatuatua.
Na fanau Leonie Schenck i Melepone, Vitolia i le 1926. Faatasi ai ma se tamā faipisinisi faamanuiaina, na maua ai e Leonie ma ona tuagane e toalua ni olaga manuia a o laiti. Sa tele ni ana uo, sa lelei tele i taaloga, fiafia e siva ma tafao i le ‘the pictures’ (fa’ili) i po uma o Aso Toonai, ae sa sili ona fiafia Leonie i tami i le aiga. “O lona aiga o mea uma ia te ia,” o le tala lea a lana tama teine o Lisa, “ma o lenei alofa mo le aiga o le a faaauau pea i lona olaga atoa.”
Sa faamemelo Leonie i ona matua. Sa agalelei ma alofa i la’ua, ma totoina a’oa’oga tāua i a la’ua fanau, lea o le a aogā mo Leonie i aso faigata o lumanai.
Na feiloai atu o ia ia Frank Bennallack i le a’oga. Na fiafia i la’ua ma Leonie i siva uosi ma avea ai o ia ma ana paga i le 18 ai o ona tausaga. E le’i umi, sa fuafuaina faatasi ai e i la’ua se lumanai.
Na lelei le amataga o le la olaga faaipoipo. Sa faaputu e Leonie ma Frank tupe e faatau ai se fanua ma fau se fale, lea na mae’a i le faato’ā uma ai o le la tafaoga i le mavae ai o le faaipoipoga. Sa fiafia le ulugalii fou e o faatasi i ni savaliga uumi, taaalo kata ma uo ma ō i patī, ma ina ua iai ni fanau aulelei se toalima i le la aiga, sa talisapaia e Leonie le avea ai ma se tinā. “I le taimi o lo matou laiti ma o matou olaga, sa matou lagonaina lava le alofaina,” o le tala lea a Lisa.
I le mavae ai o sina taimi, na suia le tamāo’āiga o le aiga. Na leai se latou fale ma sa siitia atu i le tele o taimi a o sailia e Frank se galuega faatuatuaina. Na iai taimi faigata, ae sa le’i faitio lava Leonie. “E masani lava ona faaali e Tinā le onosa’i maoa’e,” o le tala lea a Lisa. O ia o se kuka lelei tele lea na te faafiafiaina aso o lana fanau i meaai mananaia ma gaoioiga mālie. “Na ou iloa sa le’i tele so matou tamao’aiga, ae faafetai ia Tinā, sa ou leiloa le tulaga moni o le mativa na matou iai.”
O le vaitaimi lea na auai ai Leonie i le Ekalesia. O le tuputupu a’e o lona faatuatua ma le alofa i le talalelei na faatumauina ai o ia e oo lava i faigata sili atu.
I ni nai tausaga talu ona uma lona papatisoga, na avea ai o ia o se matua nofo to’atasi ma se fanau e to’afā o loo nonofo pea i le fale ma le tina o lona toalua o loo ia tausia. Mo le taimi muamua talu mai lana faaipoipoga i le pe ā ma le 30 tausaga talu ai, sa mana’omia ai ona saili se galuega a Leonie.
O taimi uma lava e faateleina ai le molimau a Leonie i le Tama Faalelagi. O ia o se soo tuuto o Iesu Keriso ma Lana talalelei toefuataiina; ma maua le faatuatua i le mana o le perisitua ma faamanuiaga matagofie na aumaia ia te ia ma lona aiga.
I le 1976, na siitia ai Leonie ma lona aiga i Adelaide ina ia latalata atu i lana tama teine matua (ua faaipoipo), lea na faapea mai ai Lisa, “sa lagolagoina i matou e se uarota lelei tele, se epikopo alofa ma faiaoga o aiga maoa’e.” Sa talia e Leonie se vala’auga iina e avea o le peresitene o le Aualofa, lea na mua’i faamata’uina o ia. Ae “sa faaalia lona faatuatua ma faia se galuega lelei tele,” o le toe tomanatu lea a Lisa. O le molimau a Leonie i le talalelei sa faaauauina ona faamalosia a o ia auauna atu i le tele o isi valaauga i le uarota a o le’i valaauina o ia o se tagata faigaluega i le Malumalu o Adelaide Ausetalia. E ala i le faatuatua sa ia te ia, sa mafai ai e Leonie ona manatua mea uma sa mana’omia ona ia manatuaina mo lena tiutetauave paia. “Sa fiafia tele o ia i tausaga o lana galuega i le malumalu,” o le tala lea a Lisa, ma sa sili ona fiafia Tinā pe a auai tagata o le aiga a o auauna atu o ia.
O nisi o manuia silisili a Leonie sa i le fale ma lona aiga. Sa ia faia se faata’ita’iga lelei o tatalo ma le faitau o tusitusiga paia i aso uma, ma sa ia tausia se ‘api tala’aga talu mai le 1981. Sa fiafia Leonie i le molimauina o lana fanau ma fanau a lana fanau o auauna atu i misiona, faamauina i o latou ta’ito’alua i le malumalu, fai a latou fanau, ma auai i le galuega a le Alii e ala i valaauga faaleta’ita’i eseese. Na atagia mai i lenei mea le mau e fiafia i ai o ia, o loo maua i le 3 Ioane 1:4 “E leai so’u fiafia e sili i lenei, pe a ou faalogo ua savavali la’u fanau i le upu moni.”
I le 50 ma ona tupu o ona tausaga sa ia siitia ai i le aiga o lana tama teine, ma na faaauau pea ona auauna atu ma le faamaoni Leonie ma alofa. E pei ona manatua e se tasi o atalii o lana tama, “E lei iai lava se Kerisimasi, se Eseta po o se aso fanau na [le] mauaina ai e fanau uma a fanau se mea mai ia Nana. E le galo lava ia te ia . . . sa matou iloa uma lava e ala i lona agalelei ma ana faatinoga sa ia alofa ia i matou uma taitoatasi.”
I se faaiuga o le tuutō faatinā, a o le’i maliu o ia, na tusia ai e Leonie ni tusi tāua faapitoa i lana fanau e toalima ma o latou aiga. O le mauaina o nei tusi ina ua maliu Leonie sa o se mea e ofo tele ai le loto i le matagofie ma le loloto na ootia ai o latou loto i se taimi mafatia.
Sa iloa o ia i le tele o igoa i lona olaga atoa: Leonie, Tinā, Nana, Tuafafine Bennallack . . . ae masalo o lona manumalo sili i le avea ai ma se tina o le “e [faaauau ona] tulai mai lana fanau, ma faafetai ia te ia.” (Faataoto 31:28)