Kilisimasí mo e Tānaki Fakataha ʻo ʻIsilelí

ʻOku fakamanatu mai ʻe he Kilisimasí ʻa e ʻofa haohaoa mo tuʻuloa ʻa e Tamai Hēvaní. He ʻikai ha toe meʻaʻofa te ne lava ʻo fakatataua ʻa e foaki fakalangi naʻe fai ʻe he ʻOtuá ke fakahaofi ʻEne fānaú: ʻa Hono ʻAlo pē Taha naʻe Fakatupú, ʻa Sīsū Kalaisi. ʻOku haʻu mei he Fakamoʻuí ʻa e “meʻa kotoa pē ʻoku leleí” (Molonai 7:22), kau ai ʻa e malava ke nofo taʻengata mo e niʻihi ʻoku tau ʻofa aí ʻi hono fakahoko e palani lahi ʻa e Tamai Hēvaní ki he fiefiá.

Ko e hā te tau lava ʻo fakahoko ke fakahaaʻi ʻetau fakafetaʻi ki he Tamai Hēvaní koeʻuhí ko e ngaahi meʻafoaki maʻongoʻonga ko ʻení? Ko e meʻa ʻe taha te tau lava ʻo faí ko e tokoni kiate Ia ke fakahoko ʻEne ngāué. Naʻe folofola ʻa e ʻEikí kia Mōsese, “He vakai, ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39). Pea ʻoku fakaafeʻi kitautolu ke tau tokoni.

Kuo faʻa lea ʻaki ʻe Palesiteni Lāsolo M. Nalesoni, ko hono tānaki fakataha ʻo ʻIsilelí ʻa e ngāue mahuʻinga taha ʻoku fakahoko ʻi he māmaní he ʻaho ní. Pea kuó ne fakamatala ʻo pehē, “Ko e taimi ʻoku tau lea ai kau ki he tānaki fakataha ʻo ʻIsileli ʻi he ongo tafaʻaki fakatouʻosi ʻo e veilí, ko ʻetau ʻuhingá ki he ngāue fakafaifekaú, ngāue fakatemipalé, mo e hisitōlia fakafāmilí” (“Tuku ke Lāngilangiʻia ʻa e ʻOtuá,” Liahona, Nōvema 2020, 92).

ʻI hoʻo fakalaulauloto ki he ʻuhinga totonu ʻo e faʻahitaʻu makehe ko ʻení, ʻoku ou fakaafeʻi koe ke ke lau ʻa e “Hisitōlia Fakafāmilí, Temipalé, mo e Ngāue Fakafaifekaú: Ngaahi Hoa Ngāue Mālohi ʻi Hono Tānaki Fakataha ʻo ʻIsilelí” (peesi 12). Fakakaukau leva ki he meʻa te ke lava ʻo fakahoko ke tokoni ai ki hono fakafoki ʻo e fānau pelepelengesi ʻa ʻetau Tamaí kiate Iá.

Ke Mou Maʻu ha Kilisimasi Fiefia!

Mike Judson

Potungāue Hisitōlia Fakafāmilí