Leʻo ʻo e Kau Māʻoniʻoni ʻi he Ngaahi ʻAho Kimui Ní
Nati Kilisimasí
Naʻe fakamanatu mai ʻe he meʻaʻofa ʻa hoku kaungāmeʻá ki ha tokotaha ʻe taha ʻoku nofo ʻi he senitā tokoni ki he moʻuí, ʻoku maʻu ʻa e fiefia moʻoní ʻi he ʻofa faka-Kalaisí.
I he kamata ʻeku houa ngāué pea kamata ke u talitali e ʻū tēpilé, naʻe hū mai ha taha ʻo e kau nofo ʻi he senitaá ne u saiʻia taha aí, Sitani (ʻikai ko hono hingoa totonú ia), ki he loki kaí. ʻOku ou ngāue ʻi ha senitā tokoni ki he moʻuí pea kuó u fakaʻaongaʻi ha ngaahi houa lahi ke feohi ai mo e tangata leleí ni. Ko ha taha faʻu tohi mo ha palōfesa mālōlō ʻeni naʻe hoko ko ha palesiteni fakamisiona, pēteliake fakasiteiki, mo ha tokotaha faisila ʻi he temipalé.
Naʻá ku fakaʻamu ʻi heʻeku feohi mo iá, ke maʻu ha konga ʻo hono tuʻunga fakalaumālié mo hono ʻulungāngá. Naʻá ku mālieʻia maʻu pē ʻi heʻene loto fakatōkilaló mo ʻene holi faivelenga ke tokoniʻi e niʻihi kehé. Naʻe toki mālōlō siʻono uaifi ʻi ha taʻu ʻe onongofulu mā tolú, pea neongo naʻá ne loto mamahi, naʻe lava ke ne maʻu ʻa e fiefiá ʻi heʻene fekumi ki ha ngaahi founga ke ongoʻi ai ʻe he niʻihi kehé ʻoku ʻofaʻi mo fakafiemālieʻi kinautolú.
ʻI he tō ʻa e mahaki fakaʻauha COVID-19, kuo mātuʻaki faingataʻaʻia ʻaupito ʻa e senitā tokoni ki he moʻuí ʻi he 2020. Ka naʻe ʻomi ʻe he hoko mai ʻa e faʻahitaʻu Kilisimasí ha ʻamanaki lelei foʻou ki he kahaʻú.
ʻI he efiafi ko iá, naʻe tangutu ʻa Sitani mo ha tangata ʻe taha ʻi he tēpile naʻá ku tokangaʻí. ʻI he ʻosi e maʻu meʻatokoni ʻa e tangata ko iá, naʻá ne kole mai ha fanga kiʻi fakaneifua ke foki mo ia ki hono lokí. Ne u ʻalu ke ʻomi, ka ko e meʻapangó, ne ʻosi e fakaneifua naʻá ne fie maʻú. ʻI heʻeku foki ki heʻene tēpilé ʻo talaange kuo ʻosí, naʻá ne loto mamahi. Naʻá ku ʻoange ha fanga kiʻi fakaneifua kehe ke fili mei ai, ka naʻe loto lelei pē ke ʻoua ʻe tali ia.
ʻI he fanongo mai ʻa Sitani ki heʻema talanoá, naʻá ne tuʻu hake mei hono nofoʻangá. Naʻá ne lue māmālie atu he holó ʻi heʻene kiʻi saliote teketeké. Naʻá ne foki mai hili ha ngaahi miniti siʻi mei ai mo ha niʻihi ʻo e fanga kiʻi fakaneifua naʻá ne saiʻia taha aí—ko ha fanga kiʻi lole sokoleti nati. Naʻá ne foaki ange ia ki he tangatá, fakamālō ange ʻi heʻena tangutu fakatahá, pea foki ki hono lokí.
ʻI heʻeku fakakaukau ki he fehangahangai hoku kaungāmeʻá mo e mole hono uaifí pea mo e fefaʻuhi ʻemau nofó mo e kolonitini ʻo e COVID-19, naʻe ongo kiate au e folofola ʻa e Fakamoʻuí. Naʻá Ne folofola ʻo pehē, “He ko ia ia ʻoku loto ke kalofaki ʻene moʻuí, ʻe mole ia; ka ko ia ia ʻe mole ʻene moʻuí koeʻuhí ko au mo e ongoongoleleí, ʻe maʻu ʻe ia ia” (Maʻake 8:35).
Naʻe fiefia ʻa Sitani ʻi he hokohoko atu ʻene ngāué. ʻOku ou manatuʻi ʻeku fakakaukau, “Ko e moʻoni, ko ha tangata ʻeni ʻa e ʻOtuá.”
Te u manatua maʻu pē e meʻa ko ʻeni ne u aʻusiá. Naʻá ne tokoniʻi au ke u fokotuʻu ha taumuʻa he kotoa ʻeku moʻuí ke u hoko ko ha ākonga mateaki ʻo Sīsū Kalaisi, hangē ko Sitaní. Naʻá ne fakahaaʻi mai ʻoku maʻu ʻa e fiefia moʻoní ʻi he hokohoko atu hono foaki ʻo e fanga kiʻi meʻa īkí, ʻo hangē ko e fanga kiʻi nati Kilisimasí.