Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOua ʻe Manavahē
Naʻá ku kaila fakalongolongo pē, “Naʻá Ke haʻu moʻoni nai ki māmani ʻi he taʻu ʻe 2,000 tupu kuo hilí ko ha pēpē valevale?”
Naʻá ku maʻu meʻatokoni efiafi fakataha mo hoku fāmilí ʻi ha ʻapi hoku kaungāmeʻa ʻi he Efiafi kimuʻa he Kilisimasí ʻi he taimi ne u maʻu ai ha fetuʻutaki telefoni mei he faʻē ʻo ha taha ʻo ʻeku kau mahakí. Kuo foua ʻe hono foha taʻu 19 ha fononga lōloa mo faingataʻa ʻi he kanisā totó ʻa ia naʻe kau ai ha ngaahi palopalema lahi mei he mahakí mo hono faitoʻó.
Fāifai, hili ha toe takai ʻe taha ʻo e faitoʻo kimó, naʻá ne fakakaukau ke ʻoua te ne toe hoko atu peá ne foki ki ʻapi. Naʻá ne nonga ʻi heʻene ʻiloʻi ʻe vavé ni pē haʻane maté.
ʻI he liliu ʻene mānavá he efiafi ko iá pea mo ha mofi lahi, naʻe tā ʻene faʻeé ki ha meʻalele ʻa e falemahakí. Hili ʻena aʻu ki he loki fakatuʻutāmaki he falemahakí, naʻá ne tā mai kiate au.
Naʻá ne tangi mai, “ʻOku ʻikai te u ʻilo e meʻa ke faí.
Naʻe ʻikai ʻamanaki e kau toketaá ʻe moʻui hono fohá ʻi he ngaahi houa siʻi ka hokó. Ne ma talanoa ki ha ngaahi founga ke fakafiemālieʻi ai iá peá u fakahaaʻi ange ʻeku fie tokoni ki he fāmilí ʻo ka fie maʻú.
Naʻe ʻosi ʻeku maʻu meʻatokoni efiafí, pea kamata ʻe he fānaú ʻenau fakafaivaʻi e ʻAloʻi ʻo Sīsuú. ʻI he kamata laukonga ʻa e fāmili kaungāmeʻá mei he Luke vahe 2, naʻe toe tatangi ʻeku telefoní peá u hū ki tuʻa.
Kuo mālōlō ʻeku mahakí. Naʻá ku tangi ʻi heʻeku talaange ki he fāmilí ʻa e mahuʻinga lahi ʻa honau fohá kiate aú. Ne u fakahaaʻi ange ʻeku fehiʻa he kanisā ʻa e kakai kei talavoú pea naʻá ku fakaʻamu ne u lava ʻo fai ha meʻa lahi ange maʻana.
Hili ʻeku holoholoʻi hoku loʻimatá, naʻá ku toe foki ki he fale homau kaungāmeʻá. Naʻe fakatātaaʻi ʻe hoku foha lahi tahá ʻa Siosefa, ʻo tuʻu he tafaʻaki ʻo e ʻaiʻangakai ʻo e manú, pea naʻe fakafanongo fakamātoato hoku foha siʻi tahá, ki he fakahā ʻe he ʻāngeló:
“ʻOua ʻe manavahē; he ʻoku ou ʻomi ʻa e ongoongo lelei ʻo e fiefia lahi. …
He kuo ʻaloʻi kiate kimoutolu ʻi he ʻahó ni, ʻi he kolo ʻo Tēvitá, ʻa e Fakamoʻui, ʻa ia ko Kalaisi ko e ʻEikí” (Luke 2:10–11).
ʻI he mōmeniti ko iá, naʻá ku tangi fakalongolongo pē, “ʻOkú Ke ʻi ai moʻoni nai? Naʻá Ke haʻu moʻoni nai ki he māmaní he taʻu ʻe 2,000 tupu kuo hilí ko ha pēpē valevale? Naʻá Ke kātekina moʻoni nai ʻemau ngaahi mamahí mo e faingataʻaʻia ʻo e faʻahinga kotoa pē?”
ʻI heʻeku vakai ki he fānaú ʻi heʻenau fakaʻapaʻapa loto fakatōkilalo mo loto mamalu ki he Fakamoʻuí, ne u fanongo ki he talí: “ʻIo, ʻoku ou ʻi heni. Naʻá ku hāʻele hifo ʻo ikunaʻi. ‘Kuó u tohi tongi koe ʻi hoku ʻaofi nimá’” (vakai, ʻĪsaia 49:16).
ʻOku ʻikai ha taha ʻiate kitautolu ʻe hao mei he mamahí, tengihiá mo e lotomamahí. Ka ʻi he ngaahi mōmeniti ko iá, ʻe lava ke hiki hake kitautolu ʻe he ngaahi lea ʻa e ʻāngeló: “ʻOua ʻe manavahē” (Luke 2:10). Pea ʻe lava ke fakamālohia kitautolu ʻi he folofola ʻa e ʻEikí, “Te mou maʻu ʻa e mamahí ʻi mamani: ka mou loto toʻa ; kuó u ikuʻi ʻa māmani.” (Sione 16:33).
Talu mei ai, mo e ʻi ai ha ʻuhinga foʻou kiate au ʻo e Efiafi kimuʻa he Kilisimasí. ʻOku ou manatu ai ki heʻeku mahakí, hono fāmilí, mo e fakafiemālie ʻo hono ʻiloʻi te tau ikunaʻi ʻa e māmaní ʻo fakafou ʻi he feilaulau ʻa e Fakamoʻuí.