ʻOku Tokoni e Hisitōlia Fakafāmilí ki Heʻetau Ngaahi Kuí

Ko e hisitōlia fakafāmilí ʻa hono ʻiloʻi mo e ako fekauʻaki mo e kau mēmipa hotau fāmilí. ʻOku tau tānaki foki ha fakamatala fekauʻaki mo ʻetau ngaahi kuí koeʻuhí ke tau lava ʻo fakahoko ha ngāue fakatemipale maʻanautolu.

Ko e ngaahi fāmilí ʻa e uho ʻo e palani ʻo e fiefia ʻa e Tamai Hēvaní. Kuó Ne teuteu ha hala ke hokohoko atu ai e ngaahi vā fetuʻutaki fakafāmilí ʻo taʻengata. ʻI heʻetau fakahoko ʻetau hisitōlia fakafāmilí mo e ngāue fakatemipalé, ʻoku tau tokoni ai ke fakatahatahaʻi mai e kau mēmipa hotau fāmilí, ʻa e moʻuí mo e pekiá fakatouʻosi. (ʻOku ʻuhinga ʻa e “ngāue fakatemipalé” ki hono maʻu ʻo e ngaahi ouau fakatemipalé maʻatautolú, hangē ko e sila ki hotau malí, pea pehē ki hono fakahoko ʻo e ngaahi ouau ʻi he temipalé maʻa ʻetau ngaahi kuí. Ke maʻu ha fakamatala lahi ange fekauʻaki mo e ngaahi ouau fakatemipalé, vakai ki he fakamatala ki he Ngaahi Tefitoʻi Meʻa Mahuʻinga ʻo e Ongoongoleleí ʻi he makasini Liahonaʻo ʻOkatopa 2021.)

Ko e Hisitōlia Fakafāmilí mo e Ngāue Fakatemipalé

ʻOku fie maʻu ʻe he tokotaha kotoa pē kuo moʻui pe ʻe moʻui ʻi he māmaní ʻa e ngaahi ouau ʻo e ongoongoleleí. Kapau naʻe ʻikai maʻu ʻe heʻetau ngaahi kuí ʻa e faingamālie ko iá, te tau lava ʻo fakahoko e ngaahi ouaú maʻanautolu ʻi he temipalé. ʻOku kau ʻi he ngaahi ouau ko iá hono silaʻi kita ki he kau mēmipa ʻo e fāmilí. ʻOku ʻuhinga ʻa e “silá” ke tau lava ʻo nofo mo hotau ngaahi fāmilí ʻo taʻengata kapau te tau angatonu. Ko e temipalé pē ʻe toki lava ke silaʻi ai kitautolu ki hotau ngaahi fāmilí.

Ngaahi Tāpuaki ʻo e Hisitōlia Fakafāmilí

‘E lava ke tokoniʻi kitautolu ʻe he hisitōlia fakafāmilí ke fakamālohia hotau vā fetuʻutaki mo e kau mēmipa hotau fāmilí ʻoku kei moʻuí. ʻI heʻetau fevahevaheʻaki e ngaahi talanoá, ngaahi taá, mo e ngaahi manatu melie kehé, ʻoku tau fokotuʻu ai ha ngaahi haʻi fakafāmili. ʻOku tau fakamālohia foki ai mo ʻetau feʻofaʻakí. Kuo talaʻofa mai foki ʻe he kau palōfitá te tau ofi ange kia Sīsū Kalaisi ʻi heʻetau ngāue ki heʻetau hisitōlia fakafāmilí.

Ko Hono Kumi ʻEtau Ngaahi Kuí

ʻOku finangalo e Tamai Hēvaní ke silaʻi kitautolu ki hotau ngaahi fāmili lolotongá pea ki heʻetau ngaahi kuí. Kimuʻa pea lava ke silaʻi kitautolu ki heʻetau ngaahi kuí, ʻoku fie maʻu ke tau kumi pea seivi ʻa e fakamatala fekauʻaki mo kinautolú. Ka ʻoku mahulu atu e hisitōlia fakafāmili ʻi ha fekumi pē ki ha ngaahi hingoa, fakamatala pe ngaahi feituʻu. ʻI heʻetau ako fekauʻaki mo ʻetau ngaahi kuí, te tau ongoʻi vāofi ange ai kiate kinautolu.

FamilySearch

Ko e FamilySearch ko ha polokalama fakakomipiuta taʻetotongi ia ʻoku ʻoatu ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku tokoni ia ki he kakaí ke kumi honau ngaahi fāmilí. Te ke lava ʻo kamataʻi hoʻo hisitōlia fakafāmilí ʻi he FamilySearch.org pe ʻi he polokalama ʻAkau Fakafāmili ʻa e FamilySearch. ʻE lava foki ke maʻu ʻi ho uōtí pe koló ha taha ke ne tokoniʻi koe.