Maʻá e Ngaahi Mātuʻá

Kilisimasí, Tānaki Fakataha ʻo ʻIsilelí mo e Hisitōlia Fakafāmilí

Siʻi Ngaahi Mātuʻa,

Ko e faʻahitaʻu Kilisimasí ko ha taimi makehe ia ʻo e taʻú. Fakaʻaongaʻi e ngaahi fakamatala ʻi he ngaahi makasini ʻa e Siasí ki he māhina ní ke akoʻi ho fāmilí fekauʻaki mo hono ʻaloʻi ʻo Kalaisí pea mo e ʻamanaki lelei ʻokú Ne ʻomi ki heʻetau moʻuí, ko hono tānaki fakataha ʻo ʻIsilelí, pea mo e mālohi ʻo e ngāue hisitōlia fakafāmilí.

Fealēleaʻaki ʻi he Ongoongoleleí

Ngaahi Meʻaʻofa Kilisimasi

Kumi e fakamoʻoni ʻa ʻEletā Kasuhiko Iamasitā ʻi he peesi 30, ke lau fekauʻaki mo e ʻamanaki leleí, fakafiemālié, mo e mālohi ʻoku maʻu ʻia Kalaisí. Aleaʻi mo ho fāmilí ʻi he faʻa lotu ʻa e ngaahi meʻaʻofa kuó ke maʻu mei he Fakamoʻuí.

Ko ʻEtau Ngāue ʻa e Hisitōlia Fakafāmilí

Ako e fakamatala ʻi he peesi 12 ki ha ngaahi fakakaukau ki hono fakaʻaongaʻi ʻo e hisitōlia fakafāmilí mo e ngāue fakatemipalé ke vahevahe ʻa e ongoongoleleí. Vahevahe mo hoʻo fānaú ha talanoa kau ki ha taha ʻo hoʻo ngaahi kuí. Fehuʻi ange pe ko e fē konga ʻo e talanoá te nau lava ʻo fakafekauʻaki ki aí. Te mou lava ʻo fakakaukau fakafāmili ki ha kakai ʻoku mou ʻilo ʻoku nau fie ʻilo lahi ange ki honau hisitōlia fakafāmilí.

Tokoni ki heHaʻu, ʻo Muimui ʻIate Aú

Vakai ki he peesi 26 ki ha ngaahi naunau hangē ko ha vaʻinga kumi folofola, ke tokoni ki hoʻo ako fakauike ʻi he Haʻu, ʻo Muimui ʻIate Aú.

Vakai foki ki he makasini Kaumeʻá mo e Ki Hono Fakamālohia ʻo e Toʻu Tupú ki he māhina ní ke maʻu ha ngaahi talanoa ʻi he hisitōlia ʻo e Siasí mo e Kilisimasí.

Fiefia Fakafāmili ʻi heHaʻu, ʻo Muimui ʻIate Aú

Tukupā Fakafāmili ʻo e Ngaahi Tefito ʻo e Tuí

Tefito ʻo e Tui

1. Ako maʻuloto mo ho fāmilí ha taha ʻo e Ngaahi Tefito ʻo e Tuí pe lahi ange.

2. Kapau ʻoku ʻi ai ha fānau iiki ange ʻi homou ʻapí ʻoku teʻeki ke nau ako maʻuloto ʻa e Ngaahi Tefito ʻo e Tuí, ʻoange kiate kinautolu ha kaungāmeʻa ke tokoni kiate kinautolu.

3. ʻAhiʻahi fakahoko ʻa e ʻekitivitī ko ʻení:

   1. Tangutu takai fuopotopoto.

   2. Lau maʻuloto ha tefito ʻo e tuí, pea lea ʻaki ʻe he tokotaha takitaha ha foʻi lea pē ʻe taha he taimi (ʻe kamata ʻaki ʻe he tokotaha ʻuluakí ʻa e foʻi lea ʻuluakí, pea lea ʻaki ʻe he tokotaha hokó ʻa e foʻi lea hono uá, pea fai pehē atu ai pē).

   3. Kapau ʻe ʻi ai ha fehalaaki, fakatonutonu fakalelei ʻa e fehalaākí pea tuku leva ki he tokotaha hokó ke ne lea ʻaki ʻa e foʻi lea hono hokó.

   4. Vakai angé pe te mou lava ʻo fakakakato ʻa e tefito ʻo e tuí ʻaki ha ngaahi fehalaaki siʻisiʻi pē. Toe ʻahiʻahi lau leva ha tefito ʻo e tui ʻe taha.

Fealēleaʻakí: ʻE tokoniʻi fēfē kitautolu ʻi heʻetau moʻuí ʻi hono ako maʻuloto e ngaahi tefito ʻo e tui mahuʻinga ko ʻení? ʻE lava ke tokoniʻi kitautolu ʻi heʻetau lau e ngaahi lea mālohi ko ʻení ʻi he taimi ʻoku mafasia ai hotau ʻatamaí pe ʻi he taimi ʻoku tau feinga ai ke tauhi ke maʻa pe fakakaukau leleí. ʻE lava foki ke tokoni hono ʻiloʻi e ngaahi moʻoni ko ʻení kiate kitautolu ʻi he taimi ʻoku fai mai ai ʻe hotau ngaahi kaungāmeʻá ha fehuʻi fekauʻaki mo e ongoongoleleí.

Fakakaukau naʻe ʻomi ʻe Brenda Slade mo Mitzi Schoneman

Ko ha Meʻaʻofa maʻá e Fakamoʻuí

Ko e Kalaisi Moʻuí: Ko e Fakamoʻoni ʻa e Kau ʻAposetoló

Kuo tā ʻe Kalaisi ha sīpinga ke tau muimui kotoa ai. ʻI heʻetau fakamanatua Hono ʻaloʻí ʻi he Kilisimasi ko ʻení, tau foaki kiate Ia ʻa e meʻaʻofa ʻo e hoko ʻo hangē ko Iá. Naʻe folofola ʻa Kalaisi: “Ko e hā ʻa e anga ʻoku taau mo kimoutolú? Ko e moʻoni ʻoku ou pehē kiate kimoutolu, ke mou hangē pē ko aú” (3 Nīfai 27:27). Te ke lava nai ʻo foaki ki he Fakamoʻuí ha meʻaʻofa ʻi he Kilisimasi ko ʻení ʻaki haʻo muimui ki Heʻene sīpingá?

1. Lau fakataha ʻa e ongo ʻuluaki palakalafi ʻo e “Ko e Kalaisi Moʻuí.”

2. Aleaʻi e ngaahi meʻa naʻe fai ʻe he Fakamoʻuí ke tāpuekina ai e niʻihi kehé.

   1. Naʻá Ne “faʻa feʻaluʻaki ʻo fai lelei” (Ngāue 10:38). Te tau lava fēfē ʻo feʻaluʻaki ʻo fai lelei?

   2. Ko ʻEne ongoongoleleí ko ha pōpoaki ia ʻo e melino mo e ʻaloʻofa. Te tau lava fēfē ʻo fakahoko ha ngāue lelei ki he niʻihi kehé?

   3. Naʻá ne kōlenga ʻa e taha kotoa ke muimui ange ʻi Heʻene sīpingá. Te tau lava fēfē ʻo muimui he sīpinga ʻa Kalaisí?

3. Tohi pe tā e meʻaʻofa ʻokú ke fakakaukau ki ai maʻá e Fakamoʻuí.

4. Fokotuʻu ia ʻi ha feituʻu ko ha fakamanatu ʻo hoʻo taumuʻa he taʻu ní.

Fealēleaʻakí: Ko e hā te ke lava ʻo fai ke faitāpuekina ai e moʻui ʻa e niʻihi kehé ʻo hangē ko ia naʻe fai ʻe he Fakamoʻuí? ʻE ʻomi fēfē ʻe he sīpinga ʻo e muimui kia Kalaisí ʻa e niʻihi kehé ki he Fakamoʻuí?

Fakakaukau ne fakahū mai ʻe Lisa Thomas mo Meredith Gerard