Ko ha Fili Mahuʻinga

Fai ʻe Irene Soderquist Larsen

ʻOku nofo ʻa e tokotaha naʻá ne faʻú ʻi ʻAitahō, USA.

Ne ma fakakaukau ke ma tā fakataha ʻa e pianó. Ko ʻema founga ki hono ʻomi e fiefiá ki he māmaní.

photo of Irene and Alice playing a piano duet

ʻI ha ʻaho ʻe taha ʻi he taʻu ʻe tolu kuohilí, ʻi hoku taʻu 87, naʻá ku ʻi ha polokalama fakasōsiale ai. Naʻe ʻi ai ha fefine naʻe tā piano; naʻe hangē ʻene taá ko aú. ʻI heʻeku ʻeke ange hono hingoá, ne u ʻiloʻi ai ko ʻĀlisi Potilī, ko e faʻē ʻeku pīsopé. Naʻá ne taʻu 90 he taimi ko iá.

Naʻá ku ʻeke ki heʻeku pīsopé pe ʻokú ne pehē ʻe fie tā piano fakataha ʻene faʻeé mo au. Naʻá ne ʻeke ange, peá ne pehē te ne fiefia ai. ʻI he taʻu ʻe tolu kuo hilí, ne ma kamata tā piano fakataha ai ʻi he pongipongi Pulelulu kotoa pē ʻi ha houa ʻe taha ke ma fiefia ai.

Naʻá ma hiki mei he ngaahi hiva faingofua ʻa e fānaú ki ha ngaahi foʻi hiva tā toko ua ne u faʻa tā mo ʻeku faʻeé. Ka ko e meʻa ne ma manako taha aí ko hono tā fakataha e ngaahi himi toputapu ʻa e Siasí. Ko e ongo himi ne ma saiʻia taha aí ko e “Ko e Fua Lotu ʻa Siosefá” (Ngaahi Himí, fika 14) mo e “ʻOfa ʻi ʻApí” (Ngaahi Himí, fika 187).

ʻI heʻema tā piano he Pulelulu kotoa pē mo akoako ʻi he lolotonga e uiké, ne lelei ʻaupito ʻema taá pea ma fakafiefiaʻi ʻema fānaú ʻaki ha kiʻi koniseti. Naʻe talamai ʻe heʻeku pīsopé ʻokú ne loto ke ma tā e pianó ʻi he houalotu sākalamēnití, ko ia ne ma ako ai ʻa e “Ko e Laumālie ʻo e ʻOtuá” (Ngaahi Himí, fika 2). Ko ha pole faingataʻa moʻoni ia kiate kimaua, ka naʻá ma akoako fakahoko ia ʻi ha ngaahi māhina lahi ʻo ma fakaʻohovaleʻi ai kimaua mo ʻema fānaú pea mahalo mo e kāingalotu foki homau uōtí. Kimuʻa pea tō ʻa e COVID-19, ne ma tā e himi ko ʻení ʻi ha uooti ʻe nima ʻoku kau ki ai e uooti ʻema fānaú.

ʻOku lahi ha ngaahi himi fakaʻofoʻofa ʻokú ma manako ke tā, hangē ko e “Muimui ʻIate Aú” (Ngaahi Himí, fika 57), “Come, Thou Fount of Every Blessing” (ʻikai ʻi he tohi himi lolotongá ka ʻoku faingofua pē ke maʻu), mo e “Fanongo ko e ʻEiki ʻOku Ui” (Ngaahi Himí, fika 153). ʻE ʻi ai ha ngaahi taimi ʻe niʻihi, ko e fie maʻu ko ia ke fai ha tā toko uá, ʻe ala fie maʻu ai ke te kole tokoni, ka ʻoku fiefia maʻu pē ha mēmipa ʻo e fāmilí, fineʻofa ngāue fakaetauhí, pe faihiva fakauōtí ke tokoni.

Naʻe aʻu ʻo ma maʻu ha ngaahi hiva Kilisimasi kuo fakatahatahaʻi peá ma teuteuʻi ha polokalama miniti ʻe 40 ke fakaʻaliʻali ʻi he senitā tokoni ki he moʻuí ʻi Tīsema. Ne kau mai mo ha tokotaha mūsika ʻe taha ʻo tā ha sailofouni mo ha ngaahi fafangu ke tānaki ha ngaahi ongo kehekehe ki heʻema fakaʻaliʻalí.

Naʻe fakafou ʻi heʻema mūsiká, ʻi homa taʻu 90 mo e 93, ʻema ongoʻi ʻokú ma ʻomi ʻa e “Fiefiá ki Māmani”(Ngaahi Himí, fika 110) ʻo ʻikai ngata pē ʻi he Kilisimasí ka ʻi he taʻú kotoa foki. Kuó ma tā piano fakataha maʻu pē he taimí ni ʻi ha taʻu ʻeni ʻe tolu. Ko e fili ko ia ke ma tā piano fakatahá ko ha fili mahuʻinga ia kiate kimaua fakatouʻosi!

Ngāue Tokoni mei he Kakai Matuʻotuʻá

Ko ha ngaahi founga ʻeni naʻe maʻu ʻe he kāingalotu matuʻotuʻa ʻe niʻihi ʻo e Siasí ke tāpuekina ai ʻa kinautolu ʻoku nau feohí:

ʻI he ngaahi taʻu siʻi kuo hilí, naʻe pulusi ai ʻe Ueini Luisi, ʻo Uāsingatoni, USA, ʻa e talanoa ki heʻene moʻuí. Naʻá ne ʻoange ha ngaahi tatau ki heʻene fānaú mo e makapuná kotoa. ʻOkú ne pehē, “Naʻe ʻikai fai ʻeni koeʻuhí ke ʻaonga ki ha taha ka ko hoku fāmilí pē, ke poupouʻi kinautolu ke nau tohi fekauʻaki mo ʻenau ngaahi aʻusia ʻi he moʻuí.” Naʻe ʻikai fuoloa mei ai, kuo toutou pākalava ʻa Ueini. “Hili e ngaahi pākalavá, naʻe ʻiloʻi ʻe heʻeku faifaleʻí naʻe tokoni hono tohi e ngaahi talanoa fekauʻaki mo ʻeku moʻuí ke fakasiʻisiʻi e ngaahi mafasia ʻoku hoko ʻi he lavea ʻo e ʻutó, ko ia ne hokohoko atu ʻeku tohi fekauʻaki mo ʻeku moʻuí. Ko hono taʻu 88 ʻení, ʻoku toe pehē ʻe Ueini, “ʻOku ou poupouʻi e tokotaha kotoa pē ke hiki e talanoa ʻo ʻenau moʻuí. Ngāue he taimí ni, pea fakaʻaongaʻi ha faʻahinga fokotuʻutuʻu pē ʻokú ke pehē ʻe lau ʻe kinautolu ʻokú ke ʻofa aí.”
ʻI he taimi ne kau ai ʻa Mele ko e uaifi ʻo Ueiní ki ha ngāue naʻe fakapaʻanga ʻe he Siasí, naʻe ʻikai ke ne teitei misi ʻi ha taʻu ʻe 15 mei ai te ne kei ngaohi pē ha sipi kafu maʻá e falemahaki fakalotofonuá. ʻOku taʻu 84 ʻa Mele he taimí ni, pea ʻokú ne ʻave ha fanga kiʻi haʻinga sipi kafu maʻá e fānau valevale toki fāʻeleʻí mo ha sipi kafu ki he fānaú, ʻa ia ʻoku “ngaohi ʻaki ʻa e ʻofa kiate kinautolu ʻoku nau fie maʻu iá.”
ʻOku tā ʻe Sūsana Pasitou, taʻu 74, ʻo Minesota, USA, ha sīpinga ʻo e ngāue tokoní ʻaki ʻene niti ha fanga kiʻi kofunima mo ha fanga kiʻi sitōkeini pea foaki atu kinautolu. ʻOkú ne pehē, “ʻOku nau fakamāfanaʻi mo fakafiemālieʻi e kakaí.” ʻOkú ne hoko foki ko e taki ngāue ʻofa ʻo e Fineʻofa hono uōtí. ʻOkú ne pehē, “Ko ha uiuiʻi maʻongoʻonga ia kiate au koeʻuhí he ʻoku ou lava ʻo tokoni ki he kakaí ʻi he taimi ʻoku nau faingataʻaʻia aí mo tokoniʻi e niʻihi kehé ke nau fakahoko e meʻa tatau.”