“Ngaahi Kapakau ʻo e Tuí,” Liahona, Tīsema 2021.
Fakaʻilekitulōnika Pē: Ngaahi ʻAta ʻo e Tuí
Ngaahi Kapakau ʻo e Tuí
Naʻá ku loto ke ʻai ke hoko ʻo moʻoni ʻene fakaʻamú mo mamata ki hono fofonga fiefia ne u fakaʻamua maʻakú.
Laʻitā mei he Getty Images
“Ha pepe lanu melomelo ke tuʻula ʻi hoku nimá,” ko e kaila fiefia ia ʻa hoku kiʻi foha taʻu tolú. Ko ʻene talí ko ha tali tauʻatāina ia ki heʻeku fehuʻi fakatuʻupakeé, “Ko e hā ʻokú ke fie maʻu ki he Kilisimasí?”
ʻOku ou lea momou pē “Tau toki sio” kimuʻa peá u fakatokoto ia ki hono mohengá, ʻo u fiefia ʻi he ngaahi momeniti hāhāmolofia ʻoku ou maʻu ke feohi mo iá. ʻOku ʻikai ke u ongoʻi moʻui lelei ke u feohi mo ia he meimei taimi kotoa pē.
Naʻe hanga ʻe he tangi taʻe tuku ʻa hono kiʻi tuofefiné, ʻa ia naʻe fefaʻuhi mo e taʻefiemālié, ʻo fusi au ki he vanu ʻo e kulukia tamakí hili ʻa e fāʻelé. ʻOku ou ongoʻi hangē ha konga peleti maka kuo mafoa ʻoku puke fakataha ʻaki ha tepi—māsila, maumau, pea mālō ʻene kei pipiki fakatahá. ʻOku ʻikai ke u loto ke hanga ʻe heʻeku ngaahi ongoʻi lotomamahí ʻo maumauʻi e fiefia hoku fohá ʻi he faʻahitaʻu fakafiefiá.
ʻOku ou ongoʻi ʻa e mafatukituki ʻo ʻene talí ʻi hoku umá. Naʻe ʻi ai ha kiʻi pepe lanu melomelo naʻe tuʻula ʻi hono nimá lolotonga ʻema fakahoko ʻa e taha ʻo ʻema lue fakaʻaho ʻi he haufano ʻo e ʻea mokomoko ʻo e kamata ʻo e faʻahitaʻu failaú. Naʻá ne talanoa ki ai ʻi ha ngaahi uike lahi. ʻOku kei hoko pē ia ko e meʻa mahuʻinga taha ʻi heʻene moʻui fuonounoú.
Naʻá ku loto ke ʻai ke hoko ʻo moʻoni ʻene fakaʻamú mo mamata ki hono fofonga fiefia ne u fakaʻamua maʻakú. ʻOku ou ʻalu ʻo mohe ʻo lotua ha nonga mo ha fakafiemālie, mo ongoʻi ʻe hoko ʻeni ko ha Kilisimasi faingataʻaʻia kiate kimaua fakatouʻosi.
ʻI he pongipongi hono hokó, naʻa mau ʻā hake ki ha ʻaho fakaʻofoʻofa— haohaoa ki heʻemau fononga lalo fakataʻu ʻi he Efiafi kimuʻa he Kilisimasí. ʻOku teuteu loto vēkeveke lahi ange hoku fohá ʻi he tuʻunga angamahení, ʻo talatalanoa fekauʻaki mo e taimi mo e founga ʻe aʻu mai ai ʻene kiʻi pepé.
“ʻOku kiʻi fuʻu momoko,” ko ʻeku leá ia ʻi heʻeku sipaʻi hono koté mo fakatui hono tataá ki hono ʻulú. “Mahalo ʻe nofo māfana pē ʻa e fanga kiʻi pepé ʻi honau ngaahi falé.”
Naʻá ne kata mo ʻikai manavasiʻi, “Ka ʻoku ʻikai ko ʻeku kiʻi pepé.”
Naʻá ku tuku hoku ʻofefiné ki he kato pēpeé mo fakahoko ha lotu fakalongolongo: “Kātaki muʻa ʻo ʻoua ʻe tuku ke fuʻu loto mamahi.”
ʻI heʻemau luelué, ʻoku sio ki mui mo muʻa hoku fohá ʻi he lotolotonga ʻo e ʻuluʻakaú, vēkeveke ange ʻi he foʻi laka kotoa pē. ʻOku luluʻi ʻe he havili momokó ʻa e lauʻiʻakaú. ʻOkú ne takamilo ʻi heʻenau tō ki he kelekele ʻo e vaotaá, ʻa ia naʻá ne malamalaki kinautolu ʻo longoaʻa ʻaki hono putí. Kiate iá, ʻoku fonu ʻa māmani ʻi he faimaná, ʻo tatali pē ki heʻene fakaʻamú ke hoko ʻo moʻoni. Ka ʻoku ʻikai ke u sio ki ha fanga pepe.
Ne mau ofi ki he ngataʻanga ʻo e halá. ʻI he kamata ke u ui ia ke mau foki ki ʻapí, ʻoku ou fanongo ki heʻene kata fiefiá. ʻOku ou sio kiate ia ofi ki ha fuʻu ʻakau, ʻoku mafao atu hono tuhú kae punopuna takatakai ha kiʻi pepe lanu melomelo ʻiate ia. ʻI ha fepikitaki maʻamaʻa ʻaupito, ʻokú na feʻiloaki, pea okú ne malimali. ʻOkú ma fesiofaki, peá u ongoʻi ha māfana ʻoku mafola ʻi hoku sinó, fakaofoofo ʻi he kiʻi mana kuó u toki mamata ki aí.
ʻOku ou pasipasi ʻi he fakafiefia mo e fakahīkihiki. Naʻe fanongo mai ʻa e ʻOtuá. ʻOku fakamaʻamaʻa atu ʻa e mafatukituki ʻo ʻeku mamahí, pea ʻoku fakamoʻoni ʻa e Laumālié ʻokú Ne ʻafioʻi au. Naʻá Ne fanongo ki heʻeku lotu ʻo kole ha ivi mo ha fakafiemālié lolotonga e ngaahi pō ongosiá mo e ngaahi ʻaho faingataʻá.
Naʻa mo e fanga kiʻi meʻa īkí, hangē ko hono kumi ha kiʻi pepe ʻi ha ʻaho ʻi Tīsemá, ʻokú ne fakamoʻoniʻi ʻoku tokangaʻi ʻe he Tamai Hēvaní hoku fāmilí—ʻo fakamanatu mai kiate au ʻoku kei hoko pē ʻa e ngaahi maná ʻi he taimi ʻoku tau maʻu ai ʻa e tui ʻa ha kiʻi tamasiʻí.