N̄an Jinen im Jemān Ajri ro

Karōk eo an Anij Ej n̄an Kwe

Iakwe jinen im jemān ajri ro Rejitōnbōro,

Ilo ad ekkatak jekjek ko, kakōļļe ko, im katak ko an Kallim̧ur M̧okta, emaron̄ em̧m̧anļo̧k ad meļeļe karōk eo an Jemedwōj Ilan̄ n̄an kōj im jerbal eo an Jisōs Kraist ilo karōk eo.

Bwebwenato ko ilo māākjiin eo an allōn̄ in emaron̄ lewaj n̄an eok aitia ko n̄an katakin ajri ro jān Kallim̧ur M̧okta im kōn karōk eo an Anij n̄an kōj.

Jemedwōj Ilan̄ Ewōr juon An Karōk Ekwojarjar n̄an AJRI ro Nejin

Etke eaorōk n̄an m̧eļeļe karōk in Lo̧mo̧o̧r eo an Anij? Kōjerbal “Gospel Basics” ilo peij 10 n̄an katakin ajri ro nejūm̧ aorōk eo an Wōtlo̧k eo an Adam im Iv. Ippān doon, kwomaron̄ ejake juon laajrak in kōjeraam̧m̧an ko im iien ko rem̧m̧an ewōr ippād ilo mour in kōnke jaar itok n̄an laļ in.

Ālikin riiti bwebwenato eo an Elder Quentin L. Cook ilo peij 6, ekōnono āinwōt juon baam̧le kōn kōjeraam̧m̧an ko me raar itok n̄an mour eo ami jān jeļā bwe Anij ewōr juon an karōk n̄an lo̧mo̧o̧ren ajri ro Nejin.

Ekkatak Kallim̧ur M̧okta

Kōkōm̧anm̧anļo̧k ekkatak eo am̧ kōn Kallim̧ur M̧okta ilo am̧ riiti bwebwenato ko ilo peij 20 im 26. Ta eo kwoj ekkatak me ej jipan̄ eok meļeļe kōn Kallim̧ur M̧okta? Jar ilo am̧ ekōnono ippān baam̧le eo am̧ kōn ta kōttōpar ko ewōr ippam̧ n̄an Itok, Ļoor Eō ekkatak eo ilo iiō in.

Itok, Ļoor Eō Kōļmenļo̧kjeņ ko

Lale peij 30 kōn juon pija in kōmeļeļe kōn Kōm̧anm̧an eo im kein jipan̄ ko jet n̄an rejtake ekkatak eo am̧ jān Itok, Ļoor Eō bok eo.