“Mga Bato sa Pagpangandam, Pagplano, ug Paglahutay,” Liahona, Ago. 2022.
Mga Bato sa Pagpangandam, Pagplano, ug Paglahutay
Samtang maghimo kamo og mga plano alang sa inyong kaugmaon, tukora ang inyong pundasyon diha sa labing importanteng bato—ang Manluluwas nga si Jesukristo.
Pagpangandam
Tingali nakahibalo kamo sa istorya ni David ug ni Goliat. Si Goliat usa ka dako nga manggugubat kinsa mirepresentar sa mga Filistihanon. Si David usa ka batan-on nga tigbantay og karnero kinsa mibarog alang sa Israel. Si David nasayod nga ang Dios anaa sa iyang habig. Wala siya mahadlok nga makig-away kang Goliat, tungod kay si Goliat misukol sa kasundalohan sa buhi nga Dios.
Aron sa pagpangandam sa umaabot nga pakig-away, si David mipili og lima ka hamis nga mga bato gikan sa usa ka sapa ug gibutang kini sa iyang bag alang sa pagbantay og karnero [shepherd bag]. Milakaw dayon siya aron makig-away kang Goliat. Dili kadto dugay nga pakig-away. Napatay ni David si Goliat gamit ang usa ka bato lamang. (Tan-awa sa 1 Samuel 17:40–50.)
Kon nasayod si David nga ang Dios anaa sa iyang habig ug nga nagkinahanglan lang siya og usa ka bato, nganong naglisod-lisod pa man siya sa pagpili og lima ka bato? Sumala sa istorya sa kasulatan, masaligon si David. Iyang giingnan si Goliat, “Ang Ginoo maoy makig-away ug itugyan ka niya sa among kamot” (1 Samuel 17:47). Giusikan ba ni David ang iyang panahon sa pagpangita og lima ka bato? Wala ba siyay igong hugot nga pagtuo?
Ang leksiyon nga akong nakat-onan gikan niini nga istorya mao nga kinahanglan kitang mangandam og maayo alang sa atong kaugmaon. Tingali dili nato mausab ang unsay umaabot, apan makapili kita kon unsaon nato nga makapangandam sa unsay umaabot. Samtang andamon ninyo ang inyong kaugalingon alang sa inyong dili segurado nga panarbaho, sa inyong wala pa makita nga mga hagit, ug sa inyong wala pa maplano nga umaabot nga kinabuhi, mahimong mogamit lamang kamo og usa ka bato, o mahimong magkinahanglan kamo og lima ka bato. Salig sa Ginoo ug pangandam og maayo alang sa unsay inyong atubangon sa inyong kaugmaon.
Pagplano
Diha sa basahon ni Ether, atong makat-onan ang kabahin sa panaw sa igsoon nga lalaki ni Jared ug sa iyang pamilya ug mga higala samtang mibiyahe sila padulong sa gisaad nga yuta. Human sila miabot sa baybayon, mipuyo sila diha sa mga tolda sulod sa upat ka tuig.
“Sa kataposan sa upat ka mga tuig … ang Ginoo mipakita pag-usab ngadto sa igsoon nga lalaki ni Jared, ug mibarog diha sa usa ka panganod ug nakigsulti uban kaniya. Ug sulod sa tulo ka mga takna ang Ginoo nakigsulti sa igsoon nga lalaki ni Jared, ug mipanton kaniya tungod kay siya wala makahinumdom sa pagtawag diha sa ngalan sa Ginoo” (Ether 2:14).
Ang igsoon nga lalaki ni Jared mihinulsol sa daotan nga iyang nahimo, ug ang Dios mipasaylo kaniya ug mitambag kaniya nga dili na magpakasala. Ang Dios misaad usab nga dad-on Niya ang katawhan ngadto sa usa ka “yuta nga pinili labaw sa tanan nga mga yuta” alang sa ilang kabilin (Ether 2:15).
Ang Ginoo misugo dayon sa igsoon nga lalaki ni Jared sa paghimo og mga kasko. Sa dihang nahuman ang igsoon nga lalaki ni Jared, nangayo siya og tabang sa Ginoo. Gusto siya nga makahibalo kon sa unsang paagi makaginhawa ang iyang katawhan diha sa sulod sa mga kasko (tan-awa sa Ether 2:19).
Ug ang Ginoo maluluy-on, nga mitubag, “Tan-awa, ikaw mohimo og usa ka lungag diha sa ibabaw, ug usab sa ilawom; ug samtang ikaw magkinahanglan og hangin ikaw dili motabon sa lungag ug makadawat og hangin. Ug kon kini mao nga ang tubig moabot diha kanimo, tan-awa ikaw motabon sa lungag, nga ikaw mahimo nga dili mamatay sa lunop” (Ether 2:20).
Dili kaayo kadto komplikado.
Dayon ang igsoon nga lalaki ni Jared nangutana, “Tan-awa, O Ginoo, ikaw motugot ba nga kami motabok niining dako nga tubig diha sa kangitngit?” (Ether 2:22).
Niining higayona gitabangan sa Ginoo ang igsoon nga lalaki ni Jared nga mahimong makabarog sa kinaugalingong paningkamot sa pagpangita og solusyon. “Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan? Kay tan-awa, kamo dili makabaton og mga bintana, kay sila madugmok; ni kamo magdala og kalayo uban kaninyo” (Ether 2:23; tan-awa usab sa mga bersikulo 24–25).
Nakasabot sa sitwasyon, ang igsoon nga lalaki ni Jared nangita og solusyon nga labing maayo base sa mga kahimtang nga atubangon sa iyang katawhan samtang motabok sa “dako nga lawod” (Ether 2:25).
Ang igsoon nga lalaki ni Jared mihukom sa “[pag]tunaw gikan sa usa ka bato og napulo ug unom ka gagmay nga mga bato; ug sila mga puti ug tin-aw, gani ingon sa sihag nga bildo; ug siya midala kanila diha sa iyang mga kamot diha sa tumoy sa bungtod, ug nangamuyo pag-usab ngadto sa Ginoo” (Ether 3:1).
Brother of Jared Seeing the Finger of the Lord [Igsoon nga Lalaki ni Jared nga Nakakita sa Tudlo sa Ginoo], ni Arnold Friberg
Gihangyo niya ang Dios sa paghikap sa mga bato gamit ang Iyang tudlo ug sa pag-andam niini nga kini mahimo nga “mohayag diha sa ngitngit.” Gihimo sa Dios ang gihangyo sa igsoon nga lalaki ni Jared, ug gibutang sa igsoon nga lalaki ni Jared ang napulog unom ka bato ngadto sa sulod sa walo ka kasko, usa sa matag tumoy, ug “sila mihatag og kahayag ngadto sa mga sakayan.” (Tan-awa sa Ether 3:4–6; 6:2.)
Itandi kini nga kasinatian ngadto sa pagplano alang sa inyong kaugmaon. Matag adlaw kamo nagkat-on ug nagtakda sa agianan alang sa inyong kaugmaon. Bisan kon kana nagpasabot sa mga tinguha sa edukasyon, mga desisyon sa panarbaho, o mga plano sa pamilya, ang Ginoo makahatag kaninyo og giya. Ang pagminyo alang sa kahangtoran ug pagsugod og pamilya kabahin sa dalan padulong sa gisaad nga yuta sa kahimayaan. Ang Ginoo interesado kaayo sa agianan nga inyong gikuha aron makaabot didto.
Sama lang nga ang Ginoo mitabang sa mga Jaredite pinaagi sa paghikap sa mga bato, makahatag Siya kaninyo og kahayag aron sa pagtabang kaninyo latas sa mga panahon sa pagdesisyon, kangitngit, ug pagduhaduha. Ang pagdawat sa giya sa Ginoo pinaagi sa Espiritu sama ra nga gihikap sa tudlo sa Ginoo ug nagdawat og gahom ug espirituhanon nga kahayag aron sa paggiya sa inyong pamilya ngadto sa gisaad nga yuta.
Paglahutay
Ang kataposan nga importante nga bato nga gusto nakong hisgotan narekord diha sa Doktrina ug mga Pakigsaad 50:44: “Busa, Ako anaa sa inyong taliwala, ug Ako ang maayo nga magbalantay, ug ang bato sa Israel. Siya nga nagtukod sa ibabaw niining lig-on nga sukaranan dili gayod mapukan.”
Si Jesukristo mitudlo sa iyang mga disipulo mahitungod sa usa ka maalamon nga tawo ug sa usa ka buangbuang nga tawo, nga narekord diha sa Mateo 7. Ang matag tawo gustong mohatag sa iyang pamilya og luwas ug komportable nga panimalay, ug ang matag usa nag-atubang sa susama nga hagit: “Mibundak ang ulan ug mibaha.”1
Apan, ang kalainan mao nga ang maalamon nga tawo mitukod sa iyang balay ibabaw sa bato ug ang balay nagbarog gihapon, kay sa buangbuang nga tawo nga mitukod sa iyang balay ibabaw sa balas ug ang iyang balay naanod. Sa kataposan ug sa kahangtoran, mahinungdanon ang atong pundasyon. Manghinaot ko ug mag-ampo nga kitang tanan makakaplag ug magpabilin sa segurado nga pundasyon samtang atong tukoron ang atong umaabot nga kinabuhi.
Kita gipahinumdoman diha sa Helaman 5:12: “Ug karon, akong mga anak, hinumdomi, hinumdomi nga kini diha sa lig-on nga sukaranan sa atong Manunubos, nga mao si Kristo, ang anak sa Dios, nga kamo kinahanglan gayod motukod sa inyong tukoranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahom ibabaw kaninyo sa pagbitad kaninyo ngadto sa bung-aw sa pagkauyamot ug walay kataposan nga pagkaalaot, tungod sa lig-on nga sukaranan diin kamo natukod, nga mao ang tinuod nga tukoranan, usa ka tukoranan diin kon ang mga tawo magtukod dili sila mapukan.”
Kana usa ka saad gikan sa Dios! Kon kita motukod sa atong pundasyon diha kang Jesukristo, kita dili mapukan!
Samtang magpadayon kamo sa paghimo og mga plano alang sa inyong kaugmaon, ikonsiderar kining 22 ka bato: lima ka bato sa pagpangandam, sama sa gipakita ni David; napulog unom ka bato sa pagplano, sama sa gihulagway sa igsoon nga lalaki ni Jared; ug ang labing importante nga bato—atong pundasyon nga bato, atong lig-on nga sukaranan—ang Manluluwas, si Jesukristo.
Ang atong tibuok kinabuhi kinahanglang mapuno sa ebanghelyo ni Jesukristo. Ang ebanghelyo ni Jesukristo dili lang kabahin sa atong kinabuhi; hinuon, ang atong kinabuhi kabahin sa ebanghelyo ni Jesukristo. Hunahunaa kini. Ang atong mortal nga kinabuhi kabahin sa tibuok nga plano sa kaluwasan ug kahimayaan.
Ang Dios mao ang atong Langitnong Amahan. Siya naghigugma kanatong tanan. Siya mas nakahibalo pag-ayo sa atong potensiyal kay sa kita nakahibalo sa atong kaugalingon. “Nasayod Siya dili lamang sa mga detalye sa atong mga kinabuhi. Ang Dios nakahibalo sa mga detalye sa mga detalye sa mga detalye sa atong mga kinabuhi.”2
Ako mopamatuod nga si Jesukristo moabot pag-usab, apan niining higayona pagaubanan Siya sa dakong himaya ug kaharianon. Ako manghinaot nga kita maandam sa pagdawat Kaniya.
Hangtod niana, palihog “salig sa Ginoo sa bug-os mong kasingkasing. Ayaw gayod pagsalig sa imong kaalam. “Hinumdomi siya sa tanan mong buhaton ug tultolan ka niya sa matarong nga dalan” (Mga Panultihon 3:5–6).
Gikan sa usa ka debosyonal nga pakigpulong, “22 Stones,” nga gihatag didto sa Brigham Young University–Idaho niadtong Abril 27, 2021.