“Kita Makatabang sa Uban nga Makakaplag og Kalinaw diha sa Malisod nga mga Panahon,” Liahona, Ago. 2022.
Mga Baroganan sa Pagpangalagad
Kita Makatabang sa Uban nga Makakaplag og Kalinaw diha sa Malisod nga mga Panahon
Ang Ginoo mipanton sa mga higala ni Job, nga mihukom imbis mangalagad ngadto kaniya.
Sa mga panahon nga sama niini, ang pagkaplag og kalinaw sa kahiladman mahimong usa ka hagit. Kadaghanan kanato makasinati og mga higayon diin ang pagpabilin og malinawon nga espiritu usa ka panlimbasog. Kita makatabang sa pagsuporta ug pagpanalangin sa kinabuhi sa matag usa ubanan sa kalooy ug pagsabot.
Si Mary (mga ngalan giilisan) nagdahom nga ang iyang kaminyoon magmalipayon ug magmalamposon. Gibiyaan niya ang iyang naandan nga kinabuhi aron ipahinungod ang iyang kaugalingon diha sa kinabuhi uban sa iyang bana. Apan paglabay sa panahon, siya (iyang bana) mihimo og mga pagpili nga miguba sa ilang panag-usa. Mibati siya (Mary) og kalisang, wala makaandam, ug hingpit nga nalupig samtang siya nanglimbasog sa pagsugod og laing kinabuhi alang sa iyang kaugalingon ug sa iyang upat ka anak. Nasayod siya nga gikinahanglan niyang ipatigbabaw ang Dios labaw sa tanan diha sa iyang kinabuhi ug tugotan Siya nga moalim kaniya, apan dili kadto sayon.
Ang tigpangalagad nga kaigsoonang lalaki ug babaye ni Mary, ang mga Watson, mahigugmaon nga mitabang kaniya sa pagtanyag og tabang ug suporta. Sa sinugdanan, si Mary nagmagahi ug miinsister nga wala siya nagkinahanglan og tabang. Apan ang mga Watson ug ang ubang mga miyembro sa iyang ward mipadayon sa pagtanyag sa ilang gugma ug pakighigala sa yano, natural nga mga paagi: makigpanglinkod uban sa pamilya ni Mary sa mga salo-salo, motabang sa mga trabahoon sa tugkaran, ug mangita og yano apan personal nga mga paagi sa pagpahibalo ni Mary nga sila naghunahuna kabahin niya ug seryoso sa pagtabang kaniya. Piho niya nga gipasalamatan ang daghang mga panalangin sa pagkapari nga gihatag ni Brother Watson alang ni Mary ug sa iyang mga anak, nakahatag og kalinaw sa ilang mga kasingkasing.
Nasayod si Mary nga ang mga Watson natahasan ngadto kaniya, apan wala gayod niya gibati nga ang pagserbisyo ug pakighigala tungod sa obligasyon. Nabati niya ang ilang kasinsero ug gugma tungod kay ila siyang gitratar sama sa usa ka minahal nga igsoong babaye. Nahimo sila nga iyang pamilya.
Ipatigbabaw ang Dios Labaw sa Tanan
Gilitratohan ni Jeremy Hall
Ang basahon ni Job diha sa Daang Tugon nagsulti sa inila nga sugilanon kabahin sa usa ka tawo nga nakasinati og grabe nga mga pagsulay ug kalisdanan. Ang iyang asawa nangutana kaniya kon nganong dili pa man siya moundang (tan-awa sa Job 2:9). Ang iyang mga higala, kinsa nag-unang miabot aron sa pagpangalagad kaniya (tan-awa sa Job 2:11–13), misangpot sa paghukom kaniya ug misulay sa pagkombinser kaniya nga ang iyang mga pagsulay mao ang silot tungod sa sala (tan-awa sa Job 22). Apan mipabilin siya nga determinado nga ipatigbabaw ang Dios labaw sa tanan diha sa iyang kinabuhi (tan-awa sa Job 13:15). Pinaagi sa iyang kamatinud-anon, siya nakadawat sa mga panalangin gani mas dako pa kay sa kaniadto, lakip sa panalangin sa pagkaila sa Dios diha sa mas hingpit nga paagi (tan-awa sa Job 42:1–5). Isip tigpangalagad nga mga kaigsoonang lalaki ug mga babaye, ang atong gugma ug suporta makatabang sa uban nga mobalik ngadto sa Ginoo diha sa ilang mga hagit ug mahimong maalim (Doktrina ug mga Pakigsaad 112:13).
Isip tigpangalagad nga mga kaigsoonang lalaki ug mga babaye, ang atong gugma ug suporta makatabang sa uban nga mobalik ngadto sa Ginoo diha sa ilang mga hagit ug mahimong maalim (Doktrina ug mga Pakigsaad 112:13).
Mga Baroganan nga Hunahunaon
Samtang kamo magtinguha sa pagtabang niadtong kinsa inyong gipangalagaran nga makakaplag og kalinaw, ikonsiderar ang mosunod:
-
Ang tigpangalagad nga kaigsoonang lalaki ug babaye ni Mary mitabang diha sa gugma ug milikay sa paghukom (tan-awa sa Job 42:7; Moroni 7:45–48).
-
Ang pagpangalagad sa kasagaran matuman pinaagi sa ginagmay ug yano nga mga buhat (tan-awa sa Alma 37:6).
-
Kon atong ibutang ang atong kaugalingon diha sa kahimtang sa atong higala ug mag-ampo nga masayod kon unsa ang labing makatabang, ang Dios makagiya sa atong mga lihok (tan-awa sa Mateo 7:7–11).
-
Mga panalangin sa pagkapari dili lang makahatag og pisikal nga pagkaayo apan makatanyag usab og kalinaw ug kahupay sa mga panahon sa kaugtas o kalisod.
-
Sama ni Job, kon kita magpabilin nga matinud-anon diha sa atong mga pagsulay ug itugot nga mopatigbabaw ang Dios sa atong mga kinabuhi, kita mahimong makaila sa Dios ug magmalinawon (tan-awa sa Job 22:21).
Unsa ang Atong Mabuhat?
Kon adunay tawo nga imong gipangalagaran nga nag-atubang og mga pagsulay ug mga hagit, paningkamot sa pagtanyag og sinsero nga gugma ug suporta nga walay pagpanghukom kaniya nga dili matarong sama sa gibuhat sa mga higala ni Job.