“Unsa Ang Home Evening?” Liahona, Ago. 2022.
Mga Sukaranan sa Ebanghelyo
Unsa Ang Home Evening?
Ang home evening usa ka panahon nga igahin atol sa semana aron magpundok ang inyong pamilya. Atol niining panahona, kamo mahimong “makat-on sa ebanghelyo, makapalig-on sa mga pagpamatuod, makatukod og panaghiusa, ug malingaw sa usag usa” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 2.2.4, ChurchofJesusChrist.org). Ang home evening managlahi alang sa matag pamilya. Apan ang tumong mao ang paggamit niini nga panahon aron mas magpaduol sa usag usa ug mas magpaduol ngadto sa Manluluwas.
Pagpangandam
Paghunahuna og usa ka kalihokan nga malingaw ang inyong pamilya ug usa ka hilisgotan sa ebanghelyo nga ganahan ninyong hisgotan ug magkauban nga kat-onan. Usab, pagpili og adlaw ug panahon matag semana nga kadaghanan sa mga sakop sa pamilya mahimong magtagbo. Ang Simbahan nag-awhag sa mga miyembro sa pagpahigayon og home evening sa Lunes sa gabii. Apan ang mga pamilya mahimong magtagbo kon kanus-a ang labing maayo alang kanila.
Pag-ampo
Daghang pamilya mosugod ug motapos sa home evening uban sa pag-ampo. Magdapit kini sa Espiritu Santo ngadto sa ilang panimalay. Ang home evening usa ka nindot kaayo nga panahon alang sa mga bata ug mga hamtong nga magkat-on sa pag-ampo diha sa ginagmay nga grupo.
Musika
Daghang pamilya usab adunay pangbukas ug panapos nga awit. Kasagaran mopili sila og awit gikan sa hymnbook o sa songbook sa Primary. Ang Simbahan adunay piano nga mga rekording sa mga himno diha sa music.ChurchofJesusChrist.org. Makatan-aw usab kamo og mga bidyo sa Tabernacle Choir at Temple Square. Ang pagkanta atol sa home evening makatabang sa mga miyembro nga makat-on sa mga himno nga gikanta sa simbahan.
Leksiyon
Ang Simbahan adunay daghang kapanguhaan nga makatabang sa home evening. Mahimong mogahin kamo og pipila ka minuto sa pagbasa ug paghisgot og usa ka artikulo gikan sa Liahona, sa Higala, o sa Alang sa Kalig-on sa mga Kabatan-onan. Mahimong usa ka panahon usab kini sa pagtan-aw ug paghisgot sa mga bidyo sa Simbahan. O mahimong magbasa kamo og pakigpulong gikan sa kinatibuk-ang komperensiya, magbasa og mga kasulatan, o maghisgot sa basahonon niana nga semana sa Dali, Sunod Kanako.
Pag-apil sa Pamilya
Litrato sa mga bata nga naghimo og mga biskwit pinaagi ni Michelle Loynes
Ang mga bata mahimong adunay tahas sa home evening. Makatabang sila sa pagplano og mga kalihokan, mag-ampo, o mopili ug mangulo sa mga awit. Makatudlo gani sila og mga leksiyon. Sa dili pa ang home evening, matabangan ninyo ang inyong anak nga mobasa og istorya diha sa ang Higala nga magasin o sa ilang paborito nga istorya sa kasulatan. Ang anak makasugilon dayon niana nga istorya ngadto sa pamilya isip ang leksiyon. Daghang bata ganahan usab nga modrama-drama sa mga istorya sa kasulatan alang sa home evening. Tugoti ang mas magulang nga mga bata sa pagplano sa leksiyon o sa pagpili og pakigpulong sa kinatibuk-ang komperensiya nga ganahan nilang basahon. Dayon tugoti sila nga mangulo sa panaghisgotan.
Mga Kalihokan
Malingaw ang daghang pamilya sa pagbuhat og mga kalihokan isip kabahin sa home evening. Ang mga kalihokan sa sulod sa balay mahimong maglakip sa pagdula, paghimo og mga binuhat sa kamot [crafts], o magkaubang magluto.
Alang sa kalihokan sa gawas sa balay mahimo kamong maglakaw-lakaw, mag-hike uban ang pamilya, o magkaubang magdula og paugnat sa kusog [sport] sa gawas. Pangita og kalihokan nga mabuhat sa tanang sakop sa pamilya, ug magkauban nga maglingaw-lingaw. Likayi ang mga gutlo nga mag-indigay nga mahimong moabog sa Espiritu.
Pagserbisyo
Ang home evening usa ka nindot kaayo nga panahon alang sa mga pamilya sa pagserbisyo sa uban. Sama pananglit, mahimo kamong motabang sa pipila ka mas tigulang nga mga silingan, modalit og pagkaon diha sa usa ka kapasilongan sa mga walay balay [homeless shelter], mosulat ngadto sa mga misyonaryo, o mamunit og mga basura. Ang JustServe.org adunay mga ideya usab kon asa kamo makatabang.