Pagtahod sa Kabubut-on diha sa Pisikal nga Kasuod

Ni Benjamin M. Ogles, Psychologist ug Propesor, sa Brigham Young University, ug Melissa K. Goates-Jones, Psychologist ug Assistant Propesor, sa Brigham Young University

Ang pisikal nga mga aspeto sa atong suod nga mga relasyon kinahanglan nga magiyahan sa atong pasalig sa pagsunod sa balaod sa kaputli, diin gitagana ang sekswal nga kasuod alang sa bana ug asawa (tan-awa sa Doktrina ug mga Pakigsaad 42:22–23), ingon man pinaagi sa atong pasalig sa pagtahod sa kabubut-on sa uban.

Kini nga artikulo nagtutok sa kaimportante sa pagtahod sa kabubut-on diha sa pisikal nga mga aspeto sa atong mga relasyon—gikan sa pagpakig-date hangtod sa kaminyoon—aron maangkon ang kalamposan ug makahuluganon nga mga relasyon, makab-ot ang malipayon nga panaghiusa nga gisaad sa Dios ngadto sa mga bana ug mga asawa, ug malikayan ang makaguol nga mga sangpotanan sa supak sa buot nga pakighilawas.

Kon giunsa nato pagtahod ang atong kabubut-on diha sa atong pagtagad sa pisikal nga pagbati ug sekswal nga kasuod adunay importanteng papel diha sa pag-andam kanato alang sa pagpalig-on sa usa sa atong labing importanteng tawhanong mga relasyon.

Ang Katuyoan sa Pisikal nga Kasuod

Kon ang usa ka bana ug asawa andam, gawasnon, mahigugmaon nga malambigit diha sa sekswal nga kasuod, kini mahimong usa ka malipayon nga kasinatian nga makatabang sa paghiusa kanila. Ang pagmugna niana nga panaghiusa pinaagi sa paghugpong sa mga kasingkasing, mga hunahuna ug mga lawas sa usa ka bana ug usa ka asawa mao ang usa ka nag-unang mga katuyoan diin ang Dios midesinyo sa sekswal nga kasuod.¹

Si Elder Jeffrey R. Holland sa Korum sa Napulog Duha ka Apostoles mitudlo: “Ang tawhanong kasuod gitagana alang sa mga minyo tungod kay mao kini ang kataposang simbolo sa kinatibuk-ang panaghiusa, kinatibuk-an ug usa ka panaghiusa nga gi-orden ug gipasabot sa Dios. Gikan sa Tanaman sa Eden hangtod karon, ang kaminyoon giplano nga magpasabot nga kompleto nga panaghiusa sa usa ka lalaki ug sa usa ka babaye—sa ilang mga kasingkasing, mga paglaom, mga kinabuhi, gugma, pamilya, umaabot, sa tanang butang. Misulti si Adan kang Eva nga siya ang bukog sa iyang mga bukog ug unod sa iyang unod, ug kinahanglan nga sila ‘usa ka unod’ sa ilang panag-uban sa kinabuhi [tan-awa sa Genesis 2:23–24]. Mao kini ang usa ka panaghiusa sa ingon nga pagkakompleto nga kita mogamit sa pulong nga silyo sa pagpahayag sa mahangtorong saad niini.”²

Ang pagtimaan niining balaanong katuyoan makatabang kanato nga makasabot kon nganong ang Dios nagpakabana og maayo kon sa unsang paagi kita motagad sa atong pisikal nga kasuod—diin dinhi niining artikulo atong gipasabot isip naglakip sa sekswal nga kasuod ingon man sa mga buhat sa pisikal nga pagbati, sama sa pagginunitay sa mga kamot o panaggakos. (Tan-awa ang seksiyon nga “Importanteng mga Ideya” sa ubos alang sa dugang nga mga kahulogan.)

Ang Papel sa Kabubut-on

Ang abilidad ug prebilehiyo nga gihatag sa Dios kanato sa pagpili ug pagbuhat alang sa atong kaugalingon nga dili pagaaghaton mao ang mahinungdanon diha sa plano sa kaluwasan. Kon wala ang kabubut-on dili kita makakat-on, mouswag o mopili sa pagsunod sa Manluluwas. Kon adunay kabubut-on, kita mamahimong sama sa Dios samtang kita makat-on sa pagpili tali sa maayo ug sa dautan.³

Ang kabubut-on mao ang abilidad sa pagbuhat ug dili kinahanglan pagaaghaton. Sa ingon, ang pisikal nga pagbati o mga sekswal nga mga relasyon sa bisan unsang matang kinahanglan dili lamang mahitabo sumala sa pagtulon-an sa Dios ug sa balaod sa kaputli apan malambigit usab ang desisyon sa duha ka indibidwal nga andam nga mosalmot. Kon mao kini ang kahimtang, ang pisikal nga pagbati mosangpot ngadto sa kaminyoon ug ang pisikal nga pagbati ug sekswal nga kasuod sulod sa kaminyoon makapalig-on sa relasyon ug motukod og panaghiusa.

Sa sukwahi, kon ang kabubut-on gigamit sa pag-aghat sa uban, gibaliwala ang ilang katungod sa pagpili kon unsaon ug kanus-a mosalmot diha sa pisikal nga pagbati o sekswal nga kasuod, ang ingon nga kontak mahimong buhat sa pagpamugos nga walay pagtahod sa sumbanan sa Dios ug sa kabubut-on sa uban, sa mga pagbati, ug sa mga tinguha. Ang pagpakighilawas tungod sa hinakog nga pagtagbaw o isip usa ka himan sa paglupig ug pagmanipula sa ubang tawo usa ka sala nga mahimong mosangpot sa malungtaron nga kadaot ngadto sa mga indibidwal ug mga relasyon.

Ang Pagtahod sa Kabubut-on diha sa Pagpakig-date ug Pagpangulitawo

magtiayon nga nagpahiyom nga nagtan-aw sa phone

Samtang ang atong mga relasyon molambo pinaagi sa pagkig-date ug pagpangulitawo, usa sa paagi nga kita motahod sa kabubut-on sa usag usa mao ang pinaagi sa pagpangayo og pagtugot sa dili pa kita mosugod sa bisan unsang matang sa pisikal nga pagbati, sama sa paggunitay sa mga kamot, ug sa paggakos, o sa paghalok.

Ang pagpadayon sa pisikal nga pagbati o sekswal nga kasuod nga wala ang pagtugot sa indibidwal—nga andam, gawasnon, ug klaro nga ihatag—naglapas sa kabubut-on sa indibidwal. Ang supak sa buot nga pakighilawas gihulagway usab isip sekswal nga panamastamas sa daghang nasod. (Alang sa dugang pa kabahin sa pagtugot ug panamastamas, tan-awa sa kauban nga artikulo, “Mga Tubag ngadto sa mga Pangutana kabahin sa Sekswal nga Panamastamas.”)

Agig dugang, ang panglantaw sa ebanghelyo makatabang kanato nga makita ang atong mga pasalig sa pagtuman sa balaod sa kaputli ug sa atong mga pasalig sa pagtahod sa kabubut-on pinaagi sa pagtugot nga mao ang mahinungdanon sa pagtabang sa pagpalig-on, sa mahangtoron nga relasyon. Ang usa ka pasalig nga wala ang sa lain dili igo. Pananglitan, sa usa ka bahin, duha ka indibidwal nga nagtahod sa kabubut-on sa usag usa sa paagi nga nagtugot ang usag usa sa sekswal nga relasyon nga walay kaminyoon kalapasan gihapon sa balaod sa Dios. Sa laing bahin, bisan ang dili sekswal nga pakighilawas nga wala ang pagtugot sa laing indibidwal nakalapas nianang kabubut-on sa indibidwal.

Samtang kita molambo diha sa atong pagsabot sa ebanghelyo ni Jesukristo, atong makita kon sa unsang paagi ang mga balaod sa Dios ug ang pagtahod sa kabubut-on sa usag usa makatabang kanato nga molambo diha sa panaghiusa ug gugma ug moandam kanato alang sa mas lawom, malipayon nga pisikal nga relasyon diha sa kaminyoon nga makatabang kanato nga mas mahiusa ug makab-ot ang atong balaan nga potensiyal.

Pagkamalumo ug Pagtahod diha sa Kaminyoon

mas hamtong nga magtiayon nagtupad sa pagpanglingkod diha sa bukid

Ang pagtahod sa kabubut-on magpadayon nga mahinungdanon diha sa kaminyoon ug mao ang usa ka importanteng bahin sa paglambo sa sekswal nga kasuod aron matubag ang katuyoan sa paghiusa sa bana ug asawa.

Kining matang sa panaghiusa maggikan sa paghatag, dili pagkuha; gikan sa gugma, dili sa kahigal; gikan sa dugang pagpakabana kabahin sa kaayohan sa lain kay sa kaugalingon. “Ang pagkamalumo ug pagtahod—dili kahakog—kinahanglang mogiya sa [atong] relasyon sa kasuod.”⁴

Si Elder Dale G. Renlund sa Korum sa Napulog Duha ka Apostoles ug ang iyang asawa, si Ruth Lybbert Renlund, mitudlo nga: “Sa kaminyoon, ang sekswal nga kasuod kinahanglan mohiusa sa asawa ug sa bana diha sa pagsalig, debosyon, ug sa pagkonsiderar sa usag usa. Ang sekswal nga mga relasyon sulod sa kaminyoon kinahanglan nga motahod sa kabubut-on sa managpares ug kinahanglang dili gamiton aron sa pagkontrolar o pagdominar.”⁵

Ang kaminyoon usa ka sagrado nga relasyon nga magkinahanglan sa mga kapikas sa pagpaningkamot alang sa panaghiusa sa daghang paagi, lakip sa ilang sekswal nga mga relasyon. Ang kaminyoon mismo dili mopalingkawas bisan hain sa kauban kabahin sa panginahanglan sa klaro nga komunikasyon mahitungod sa ilang mga tinguha o sa pagtahod sa lebel sa kakomportable kalabot sa sekswal nga mga relasyon sa usag usa. Hinoon, kini nga panag-istorya mahinungdanon diha sa sayong bahin sa kaminyoon ug magpabilin nga importante alang sa mga kapikas aron mamahimong usa sa ilang tibuok relasyon samtang sila magkat-on ug molambo ug samtang ang ilang mga kahimtang mausab.

Subo lang, nga kita usahay makadungog og usa ka pares sa kaminyoon nga maghunahuna nga siya [nga asawa o bana] adunay katungod sa pagpwersa o pag-insister sa iyang pares [maasawa o bana] nga moapil diha sa sekswal nga pamatasan. Samtang kita motuman sa atong mga pakigsaad isip bana ug asawa, kita kinahanglan dili mobuhat og mga butang nga makapahimo sa atong kapikas nga dili komportable o makasilo sa Espiritu. Ang mga kapikas moresulba sa mga deperensiya diha sa ilang mga tinguha kabahin sa kasagunson o matang sa sekswal nga kalihokan pinaagi sa pagpakigtambagay kay sa ipaagi sa pwersa o pagpugos.

Kon kita malambigit diha sa sekswal nga kasuod sulod sa balaanong gitakda nga bugkos sa kaminyoon, inubanan sa kamabination, pagtahod, ug usa ka pasalig sa pagpasidungog sa kabubut-on sa usag usa, kita mamahimo nga mas mahisama ni Kristo ug mas mahiusa sa atong mga kapikas, motutok sa unsay labing maayo alang sa uban ug diha sa panag-uyon sa kabubut-on sa Dios.

Mahinungdanong mga Ideya

Kabubut-on “mao ang abilidad ug prebilehiyo nga gihatag sa Dios kanato aron sa pagpili ug pagbuhat alang sa atong kaugalingon. Ang atong kabubut-on mahinungdanon diha sa plano sa kaluwasan. Kon wala ang kabubut-on, kita dili makakat-on o maka-uswag o mouswag o mosunod sa Manluluwas.”⁶

Utlanan mao ang personal nga mga kinutuban nga atong gitakda sa pagpanalipod sa atong kaugalingon sa espirituwal, pisikal, emosyonal ug sa mental nga paagi.⁷

“Pagtugot mao ang boluntaryo, mahinamon, ug klaro nga kasabotan tali sa mga sumasalmot nga malambigit diha sa piho nga sekswal nga kalihokan.”⁸ Ang panginahanglan alang sa mutwal nga pagtugot magamit usab ngadto sa ubang matang sa pisikal nga kasuod, sama sa paggunitay sa mga kamot, paggaksanay, ug paghagkanay.

Pisikal nga kasuod mao ang pagpadayag sa kasuod ug pagbati pinaagi sa paggamit sa atong mga lawas, lakip sa sekswal nga kasuod ug pisikal nga pagbati, sama sa paggunitay sa kamot, paggaksanay, paghalokay. Niini nga artikulo, kita migamit sa mga termino nga sekswal nga kasuod ug pisikal nga pagbati sa pagtabang nga mahatagan og kalainan tali sa sekswal ug dili sekswal nga kontak.

Pagtahod nagpasabot ngadto sa pagtahod sa mga pagbati, kabubut-on, mga buhat, ug balaanong pagkatawo sa lain nga tawo.