Alang sa mga Ginikanan

Pagpanalipod sa Atong mga Hunahuna, mga Lawas, ug mga Espiritu

Minahal nga mga Ginikanan,

Kita gipanalanginan og kabubut-on dinhi sa kinabuhi. Mahimo natong gamiton kana nga kabubut-on alang sa dili hinakog nga mga katuyoan o sa pagpatigbabaw sa Dios labaw sa tanan, sama sa gitudlo ni Elder Dale G. Renlund diha sa pahina 4. Ang unsay atong gipili makaapekto dili lamang nato apan niadtong anaa usab sa atong palibot. Ang mga kapanguhaan nga gilista dinhi makatabang ninyo ug sa inyong pamilya nga makasabot sa abuso, ingon man kon unsaon nga mapugngan kini ug matabangan ang mga nakasugakod [survivor] nga mamaayo gikan niini.

Mga Panaghisgotan sa Ebanghelyo

Pagtahod sa mga Utlanan

Ang Langitnong Amahan mihatag nato og mga lawas ug sa atong kabubut-on, apan usahay ang mga tawo mopahimulos sa laing mga tawo diha sa mga paagi nga makapasakit nila. Mahimo ninyong gamiton ang artikulo diha sa pahina 12 aron hisgotan ang tukma nga pakigsuod ug ang artikulo diha sa pahina 16 aron hisgotan ang kaimportante sa pagtahod sa personal nga mga utlanan ug kon unsay kinahanglang buhaton sa mga anak kon nalapas ang ilang utlanan.

Mga Kapanguhaan bahin sa Pag-abuso

Ang Ginoo ug ang Iyang Simbahan lig-ong namahayag nga ang pag-abuso dili mahimong tugotan (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.6.2, ChurchofJesusChrist.org). Kita mga anak sa atong Langitnong Amahan, ug kitang tanan angay nga luwas, higugmaon, ug tagdon uban sa pagtahod. Subo lang, ang ubang tawo nakasinati og pag-abuso o adunay kaila nga giabuso. Ang Simbahan nagsangkap og pipila ka digital nga mga kapanguhaan alang sa mga tawo kinsa giabuso, kinsa miabuso sa uban, o adunay kaila nga usa ka biktima. Ang mga kapanguhaan anaa usab aron sa pagtabang sa mga tawo nga makaila sa mga timailhan sa pag-abuso.

Sa pagpangita niini nga mga kapanguhaan diha sa Gospel Library app, pilia ang Tabang sa Kinabuhi ug dayon ang Abuso. O diha sa ChurchofJesusChrist.org, i-klik ang Libraries, Gospel Library, Tabang sa Kinabuhi, ug dayon ang Abuso.

Pagsugod sa Pagpakigsultihanay mahitungod sa Seguridad sa Online

Kon kamo dili sigurado kon unsaon sa pagpakig-istorya sa inyong mga anak mahitungod sa seguridad sa online, ikonsiderar ang pagpangutana nila sama niini (gikuha gikan sa “Scams and Safety,” Federal Bureau of Investigation, fbi.gov):

• Nakadungog ko og mga hamtong nga mipugos sa mga bata diha sa online nga mopadala og litrato sa ilang mga lawas ngadto sa hamtong. Nakadungog na ba ka mahitungod sa mga butang nga sama niana?

• Aduna bay usa ka tawo diha sa eskwelahan nga mikuha og litrato nila nga gipadala sa daghang tawo? Unsay mahitabo niana nga tawo kon ang litrato makauulaw?

• Aduna bay tawo nga dili nimo kaila ang misulay sa pagkontak o pakig-istorya nimo diha sa online?

• Sa imong hunahuna ngano nga ang usa ka hamtong makig-istorya sa usa ka bata diha sa online?

Gikan sa Alang sa Kalig-on sa mga Kabatan-onan nga Magasin

Pagtakda og Maayong mga Utlanan

Ang pagkat-on sa pagtakda og sakto nga mga utlanan importante, labi na alang sa usa ka tawo nga nag-antos sa pag-abuso kaniadto. Dinhi niini nga artikulo, pangitaa ang mga baroganan sa pagtakda og mga utlanan nga makatabang nga magpabiling luwas ug himsog ang inyong mga tinedyer.

Gikan sa Higala nga Magasin

Pagpuyo nga Luwas

Ang inyong anak angay nga mobati nga gihigugma, malinawon, ug luwas, bisan unsa pay mahitabo. Gamita kini nga pahina aron makatabang sa pagtudlo sa inyong anak kon unsaon sa pagpuyo nga luwas gikan sa pag-abuso.

Pagpakig-istorya sa Inyong Anak mahitungod sa Pag-abuso

Dinhi niining digital lamang nga kapanguhaan alang sa mga ginikanan, makakita kamo og tips, mga angayng hisgotan, ug koleksiyon sa mga kapanguhaan aron makatabang ninyo sa pagsuhid sa mga panagsultihanay mahitungod sa pag-abuso uban sa inyong anak. Kini nga kapanguhaan mahimong makita diha sa Gospel Library nga bersiyon sa Agosto 2022 nga Higala.

Dali, Sunod Kanako nga Kalihokan sa Pamilya

“Mas Magpaduol Ko, Dios, Kanimo”

Mga Salmo

“Kasagaran mobati kita sa Espiritu sa hilabihan kaayo kon manganta kita og mga pagdayeg ngadto sa Dios” (Ronald A. Rasband, “Magtukod og Kuta sa Pagkaespirituhanon ug Proteksiyon,” Liahona, Mayo 2019, 107).

1. Pagbutang og hulagway sa Manluluwas sa usa ka bahin sa lawak ug palingkora ang tanan sa atbang nga bahin diha sa lawak.

2. Pagpili og usa ka himno o kanta sa Primary mahitungod ni Jesukristo aron kantahon og dungan.

3. Samtang gikanta ang matag bersikulo, ang tanan mopaduol ngadto sa hulagway ni Jesus.

4. Sa higayon nga ang tanan maduol na ngadto sa hulagway, mopaambit og mga pagmatuod bahin sa Manluluwas ug kon unsa Siya ka mahinungdanon sa inyong mga kinabuhi.

5. Ang pipila ka mga salmo gihimo nga musika. Mahimo kamo nga maminaw sa Mga Salmo 23 ug 150 sa Tabernacle Choir sa Temple Square isip kabahin sa inyong kalihokan. Sunda ang mga pulong gikan sa inyong mga kasulatan.

Panaghisgotan: Unsa nga mga bersikulo gikan sa Mga Salmo o uban pang mga basahon sa kasulatan ang makapahinumdom nato sa unsay gihimo ni Jesukristo alang nato ug makatabang nato nga mabati ang Iyang gahom ug gugma sa atong mga kinabuhi?

Gisumiter ni Mitzi Schoneman