Digital Lamang: Mga Young Adult
Sa Unsang Paagi ang Pagkat-on gikan sa Uban nga mga Tinuohan Nakatabang Kanako nga Mas Masunod ang Akong Kaugalingong Pagtuo
Ang pagkat-on kabahin sa uban nga mga relihiyon wala lang nakabukas sa akong mga mata apan nakatabang usab sa akong kaugalingong pagtuo ug midasig kanako sa usa ka mas lawom nga debosyon sa akong relihiyon.
Init ug alimuot kadto nga adlaw sa Hunyo didto sa Brooklyn, New York, USA. Akong gilibot ang usa ka komunidad nga Hasidic Jewish uban sa pipila ka mga estudyante sa komunikasyon sa Brigham Young University. Bisan pa man sa panahon, ang tawo nga naglibot namo naputos og itom nga sapot gikan sa ulo hangtod sa tiil—gikan sa iyang itom nga kalo hangtod sa iyang itom nga suit ngadto sa iyang pormal nga sapatos. Samtang naglakaw kami libot sa kasilinganan, milabay kami sa ubang mga sakop sa komunidad, ang tanan susama og gisul-ob nga sinina. Dayon mibiyahe kami ngadto sa tindahan sa peloka [wig] diin nakat-on kami nga ang Hasidic Jewish nga kababayen-an magsul-ob og mga peloka ug tag-as nga sinina.
Makahunahuna lang gyod ko kon unsa ka init ug dili komportable kaha nianang tanan, ilabina atol sa maalimuot nga ting-init sa New York. Ug gani mao kini ang ilang mga kinabuhi—sa matag adlaw. Magsinina sila og ingon niini isip kabahin sa ilang relihiyon aron ipakita ang ilang debosyon ngadto sa Dios.
Sa ingon nga paagi, makasabot ko sa ilang pasalig. Kita aduna niadtong taliwala kanato kinsa natugahan diha sa templo ug nagsul-ob og mga garment sa templo ilalom sa ilang mga sinina. Kitang tanan mihimo og mga pakigsaad sa Dios pinaagi sa bunyag ug mihimo og mga butang sa kanunay nga mipakita sa atong debosyon ngadto sa Dios ug sa atong mga gituohan. Apan makapainteresado nga makita ang debosyon nga gipakita sa lahi nga paagi kay sa akong naandan.
Ug kini nakapahunahuna gayod nako kabahin sa paagi kon unsa ka dako ang akong makat-onan gikan sa mga relihiyosong buhat sa ubang mga tawo—ug sa unsang paagi nga kana makatabang kanako nga mahimong mas adunay intensiyon sa paagi nga ako mosimba ug mopakita sa akong debosyon ngadto sa Dios.
Pagkuha og Inspirasyon gikan sa Pagpangandam
Misulod kami sa panimalay sa naggiya sa among paglibot ug nakita ang kusinang kosher sa iyang pamilya, nga naglangkob sa duha ka oven, duha ka stovetop, ug duha ka lababo. Kini aron ang karne ug ang mga pagkaon gama sa gatas [dairy] malahi samtang magluto, gumikan kay ang duha ka grupo sa pagkaon dili mahimong magkasagol.
Usa ka Biyernes sa gabii, miapil kami sa pamilya nga Jewish alang sa Shabbat nga panihapon, nga gipahigayon sa pag-ila sa pagsugod sa ilang Igpapahulay nga mao ang Sabado. Ako miobserbar samtang sila mihalad og tradisyonal nga Jewish nga mga pag-ampo ug dayon nakigsalo sa nagkadaiyang pagkaon, lakip ang bino, diin mibalibad kami. Ang pipila niadtong mga nanambong naikag nga kami, isip mga miyembro sa Simbahan, adunay among kaugalingong lagda sa kahimsog nga sundon ug dili moinom og ilimnong makahubog, kape, o tsaa.
Pagkahuman sa among kasinatian nianang Shabbat nga panihapon, ako namalandong sa ubang mga butang nga gipakita sa pagpahinungod ug sa debosyon sa among kahigalaang Jewish sa ilang relihiyon. Naghunahuna ko nga pagkadako kaha nga sakripisyo ang paghatag sa akong mga gabii sa Biyernes. Apan nadasig usab ako sa ilang pagpangandam alang sa Igpapahulay. Unsa kaha kon akong gahinan og mas dakong panahon sa mga Sabado sa pagpangandam alang sa Igpapahulay? Unsaon nako sa paghatag og dugang nga paghunahuna ug paningkamot ngadto sa akong pagsunod sa adlaw nga Igpapahulay?
Mga Ehemplo sa Debosyon ug Pagpahinungod
Ako adunay daghan pang mga kasinatian atol sa akong panahon didto sa New York diin ako nadasig pinaagi sa debosyon ug kamapahinunguron sa mga tawo sa uban nga mga pagtuo. Ang ilang mga ehemplo nakapahimo nakong pamalandongan ang akong kamapahinungoron ngadto sa akong relihiyon.
Nakig-istorya ko sa usa ka tawo nga Sikh kinsa, bisan pa man sa pagkabiktima sa mga krimen sa kasilag human sa 9/11 tungod sa iyang pamostura, mipabilin nga tinuod ngadto sa iyang mga gituohan. Mibisita ko sa usa ka mosque ug misaksi sa pipila ka mga tigsimba nga Muslim nga migahin og panahon sa tunga-tunga sa ilang adlaw sa pagsalmot diha sa mga pag-ampo. Miagi ako ngadto sa maanindot kaayo nga katedral ug mas nakasabot kon sa unsang paagi ang tanan, lakip sa mga nagtukod ug mga arkitekto, nga nakapahinungod sa ilang panahon ug mga talento ngadto sa Dios.
Ug ako misugod sa pagpangutana sa akong kaugalingon, Sa unsang paagi ako mopanalipod sa akong kaugalingong pagtuo? Unsa ka sagad nga ako migahin og panahon sa akong adlaw sa pagsimba ug mopadayag og mga pasalamat ngadto sa Langitnong Amahan? Unsa nga mga talento ang akong mapahinungod alang sa pagpanalangin sa uban?
Kanunay nakong gipamalandongan kanang init ug alimuot nga adlaw didto sa New York. Ako nadasig kaayo sa debosyon sa among Jewish nga giya sa paglibot sa pagsunod sa iyang relihiyon dili lang sa Igpapahulay apan sa matag adlaw. Kana nga kasinatian, ug ang uban pa, nakatugot nako nga maghunahuna kon unsaon nako nga mas makapakita sa Dios sa akong debosyon ngadto Kaniya ug sa Iyang ebanghelyo sa tibuok nako nga mga lihok sa matag adlaw.
Pinaagi sa pag-obserbar sa mga tawo sa uban nga mga tinuohan, akong nakat-onan kon unsaon nga mas mainampoon, unsaon nga mas maayong mopasidungog sa mga pakigsaad nga akong gihimo uban sa Dios, unsaon sa pagpanalipod sa akong tinuohan nga mas maisogon, ug unsaon sa pagrespeto niadtong kinsa lahi sa akong pagtuo. Kitang tanan adunay mas daghang komon nga butang kay sa ato tingali nga mahunahunaan.