« Te rāterera’a nā roto i te mau fifi e tupu i roto i tō tātou mau tā’amura’a », Liahona, Tēnuare 2023.
Te rāterera’a nā roto i te mau fifi e tupu i roto i tō tātou mau tā’amura’a
E nehenehe te mau tāmatara’a o te ’utuāfare e upo’oti’ahia mai te mea e hina’aro tātou e ’imi i te tauturu a te Fatu nō te taui ’e nō te ha’amaita’i ia tātou.
Fa’ahōho’ara’a nā Ale+Ale
Te rāterera’a nā roto i te mau fifi e tupu i roto i tō tātou mau tā’amura’a ’utuāfare, e nehenehe te reira e tāmata rahi ia tātou, i te mau hope roa o te manava. ’Ei taote rapa’au, ’ua ’ite au e rave rahi huru fifi o te ’ā’au. ’Ua ’ite ato’a rā vau i te mau ha’amaita’ira’a i roto i te orara’a o te feiā tei fa’aruru i tō rātou mau tāmatara’a ’utuāfare nā roto i te ’imira’a i te tauturu a te Fatu nō te ha’amaita’i i tā rātou ’āparaura’a, nō te fa’arahi i tō rātou here ’e tō rātou hāro’aro’a, ’e nō te rave ’āmui i te mau tauira’a faufa’a rahi. Nā roto i te tauturu a te Fatu, ’ua ’itehia ia rātou te pūai nō te tupu i te rahi i roto i tō rātou mau fifi.
E nehenehe te ’āparaura’a huru Mesia e hōpoi mai i te here ’e te hāro’aro’a
’Ua reva nā hoa fa’aipoipo o Tom ’e o Joan (’ua tauihia te i’oa). ’Ua fa’aru’e mai te vahine a Tom nō te ma’i māriri ’aita’ata, ’e te tāne a Joan ra, e mau tā’amura’a ’ē ïa tāna i ’imi atu, nō te ma’i fa’atītī. ’Ua fārerei Tom ’e Joan i te hō’ē ’āmuira’a ta’ata ’ōtahi ’e tē tīa’i ra rāua i te fa’aipoipora’a.
E tamari’i tā rāua tāta’itahi, 15 matahiti ’e i raro a’e. ’Ua haere ’āmui tō rāua ’utuāfare e rave rahi tere orihaere, ’e ’ua ti’a ia Tom ’e ia Joan ’ia ’ite i te mau fifi e nehenehe e tupu mai i roto i te ’amuira’a i teie nā ’utuāfare. ’Ua farerei rāua i te tahi ta’ata fa’aa’o nō te tuatāpapa i te tahi mau mana’o e nāhea ’ia paraparau ma te maita’i nō te rātere i teie pene ’āpī o tō rāua orara’a.
’Ua fa’aitoito atu vau ia rāua ’ia hi’o i te a’ora’a nō ni’a i te mau ’āpo’ora’a ’utuāfare, a te peresideni M. Russell Ballard, mono peresideni nō te pupu nō te Tino ’Ahuru Ma Piti ’āpōsetolo. « E hina’aro rahi tō te tamari’i i te mau metua ’o tē fa’aro’o ia rātou », tāna ïa i ha’api’i « ’e e nehenehe te ’āpo’ora’a ’utuāfare e hōro’a i te hō’ē taime i reira te mau melo o te ’utuāfare e nehenehe ai e ha’api’i i te haro’aro’a ’e i te here i te tahi ’e te tahi ».1
Nō tā rāua mau ’āpo’ora’a ’utuāfare, ’ua fa’aoti rāua i te tārena i muri nei :
-
Fa’ata’a e aha te fifi.
-
Feruri i te mau rāve’a.
-
Mā’iti i te hō’ē fa’anahora’a.
-
Fa’a’ohipa i te reira.
-
Hi’opo’a i te manuiara’a o te fa’anahora’a i te hepetoma i muri iho ’e e fa’aau i te fa’anahora’a mai te mea e tītauhia.
Ta’a ’ē atu te ’āparaura’a ’āmui ’ei ’utuāfare, ’ua ha’api’i mai ’o Tom ’e ’o Joan ē, ’ia ’ume’ume rahi roa ana’e te mau tā’amura’a, e tītauhia ’ia ha’api’i e nāhea i te ha’amaita’i i te mau ’āparaura’a hō’ē hō’ē.
’Ua ha’api’i mai ’o Tom ’e ’o Joan e rave rahi rāve’a ’o tei tauturu ia rāua ’ia ha’amaita’i i tā rāua ’āparaura’a, nā reira ato’a tō rāua tā’amura’a i tā rāua mau tamari’i.
-
’Ua ti’a ’āmui nā metua nō te ’imi i te mau rāve’a nō te mau fifi ’e te mau tamari’i.
-
Mai te mea ē, ’ua fifi te hō’ē tamari’i i te fa’aoti i tāna mau ’ohipa i te mau mahana ato’a, e haere te hō’ē o nā metua nā muri iāna, e paraparau rāua ’a ha’a ai nō te fa’aoti i terā mau ’ohipa.
-
’Ua rave rāua i te taime i te mau hepetoma ato’a nō te fa’ahōhonu atu ā i tō rāua tā’amura’a ’e te mau tamari’i ato’a.
-
’Ua fa’aoti a’ena rātou e hio i te taime fa’afa’aeara’a ’ia nā ni’a a’e te roro nō te « ’āehuehu » (tuōra’a) i te roro ’imi rāve’a nō te « ferurira’a » (’āparaura’a).
-
I te mau taime ato’a e tupu mai te tātama’i i rotopū i te metua ’e te tamari’i, ’ia fa’auruhia te metua, e fa’aātea mai ’oia ’e e ho’i mai i muri iho nō te tuatāpapa i te hō’ē rāve’a ’āpī.
’A ’imi ai te ’utuāfare i te mau rāve’a maita’i ato’a nō te pāhono i te mau fifi e tupu i roto i tō rātou mau tā’amura’a ma te ti’a ’e te maita’i—ma te paraparau i ni’a i tō rātou mau fifi ’e te ’ohipa-’āmui-ra’a nō te fa’a’āfaro i te reira—’ua ’ite Tom ’e Joan i te tupura’a faufa’a rahi i roto i tā rāua mau tamari’i ’e tae noa atu ia rāua iho.
E ha’afātata atu ā te hāro’aro’ara’a ’e te here ia tātou pā’āto’a
’Ia pa’ari ana’e te mau tamari’i, e’ita rātou e rave noa i te mau mā’itira’a tā tātou e hina’aro. Nāhea tātou i te fa’aruru i te reira ? Nāhea tātou e tāpe’a ai ’e e ha’apūai ato’a ai i tō tātou mau tā’amura’a ’ia nehenehe ia tātou ’ia tāmau noa i te riro ’ei fa’aurura’a pāturu ’e te parauti’a i roto i tō rātou orara’a ?
’Ua tomo mai ’o Terry ’e ’o Bruce i roto i tō’u piha tōro’a, i muri noa a’e i tō Terry ’e tā rāua tamaiti, ’o Seth, mānianiara’a nā ni’a i te niuniu. E toru matahiti tō Seth revara’a i te ha’api’ira’a. E ma’i rahi tōna ’e ’aita ā ’oia i matara i rāpae i te utuutura’a a te taote. Nō tōna ma’i, ’aita ’oia i tāvini i te hō’ē misiōni. ’Aita ’o Terry ’e ’o Bruce i ’ite tei hea tōna ’itera’a pāpū ’aore rā, ’ua haere ānei ’oia i te purera’a. ’Ua pe’ape’a rāua ē e ’ere ’o Jolyn, te hoa tamāhine ’āpī o Seth, i te huru hoa tā rāua i hina’aro i roto i te orara’a o Seth. ’Ua pe’ape’a roa nā metua to’opiti nō ni’a i te ’ē’a tāna e pe’e ra.
’A paraparau ai mātou nō ni’a i te mea tā rāua e nehenehe e rave, ’ua paraparau mātou i te parabole nō te māmoe i mo’e. ’Ua fa’aro’o paha te tīa’i māmoe i te ta’i a te māmoe hou ’oia ’a ’ite atu ai, ’a here ai, ’e ’a fa’aho’i mai ai iāna i roto i te nana (hi’o Luka 15:6). ’Ua ’ite Terry ’e ’o Bruce ē, e’ita tā rāua e nehenehe e taui ia Seth, ’ua fa’aoti rā rāua e tāmata i te fa’aro’o iāna, i te here iāna, ’e i te ani iāna ’ia haere mai i te fare. E’ita tā rāua e nehenehe e mā’iti i tāna vahine fa’aipoipo ’aore rā tōna ’ē’a orara’a nōna, e nehenehe rā tā rāua e fa’aha’amana’o iāna i te here o tō rātou ’utuāfare nōna ’e nō te ’evanelia.
’Ua pi’i Terry ia Seth ’e ’ua tātarahapa nō te mārōra’a. ’Ua fa’aro’o noa ’oia i tōna paraura’a iāna ē ’ua huru ’ē ri’i ’oia nō te mea ’aita ’oia i tāvini i te hō’ē misiōni. ’Ua uiui ’oia nāhea e ti’a ai iāna ’ia arapae i te hō’ē tamāhine nō te ’ēkalesia. ’Ua ani manihini rāua ia Seth ’e ia Jolyn ’ia haere mai i te fare i te hō’ē taime fa’afa’aeara’a ha’api’ira’a.
’Ua haere mai ’o Seth ’e ’o Jolyn. ’Ua tauahi te mau tuahine o Seth i nā ta’ata. ’Ua au nā metua to’opiti i te ho’ira’a mai ’o Seth i te fare ’e ’ua parau atu iāna i te reira. ’Ua tū’ati pinepine Terry ’e ’o Bruce ia Seth. ’Ua pāpa’i Terry e rave rahi taime i te hepetoma. E paraparaura’a video tā te ’utuāfare i te mau sābati ato’a. ’Ua rave te pāpā o Seth i te taime nō te ha’uti i te huira’a pōpō ’e nō te tāi’a nā muri iāna. ’Ua tupu marū noa te reira, terā rā, ’ua ho’i fa’ahou ’o Seth i roto i te ’utuāfare. I te pae hope’a, ’ua fa’aoti a’era ’o Seth ē e ’ere te ’ē’a i mā’itihia nā muri ia Jolyn nōna. I muri a’e ’ua fa’aipoipo ’oia i te hō’ē vahine fa’ahiahia tāna i bāpetizo.
’Ua ’itehia mai ia Terry ’e Bruce tā rāua māmoe i mo’e nā roto i te fa’aro’ora’a, te herera’a ’e te anira’a iāna ’ia ho’i mai i roto i te ’āua.
E nehenehe te ’ohipa-’āmui-ra’a i ni’a i te tauira’a e ha’apūai i tō tātou mau tā’amura’a, ’e e fa’aitoito i te tupura’a i te rahi
’Ua fa’aipoipohia Marie ’e tāna tāne, ’o Davida, e rave rahi matahiti ’e e mau melo fa’aturahia rāua nō tō rāua ’oire. I te hō’ē rā mahana, ’ua ’ite ’ōmo’e a’e ra ’o Marie ē, tē vai ra tō Davida tā’amura’a i te tahi atu vahine.
’Ua haere mai ’o Marie i roto i tō’u piha tōro’a, ma te riri rahi, te māuiui ’e te ’oto. ’A ta’i noa ai ’e ’a fa’ati’a noa ai i tōna ’ā’amu, ’ua ’ite ’oia ē, e ti’a iāna ’ia parau ia Davida i tōna mana’o, ’eiaha rā nā roto i te riri, ’ia pārahi mai te Vārua i pīha’i iho ia rāua.
I muri a’e i te fa’aineinera’a nā roto i te pure, ’ua parau ’oia ia Davida ē ’ua here ’oia iāna, ’ua māuiui roa rā ’oia i te ’itera’a i tōna tā’amura’a i te tahi atu vahine. E ti’a ia rāua ’ia fārerei i te ’episekōpo ’e ’ia feruri i te hope’a o tō rāua fa’aipoipora’a. ’Aita Davida i hina’aro ’ia ’ere ’oia i tāna vahine fa’aipoipo ’aore rā i tōna ’utuāfare. Nā roto i te tauturu a te ’episekōpo, ’ua ha’amata ’oia i te ’ohipa nō te tātarahapara’a.
’Ua ’ite Marie ē, tē vai ra te mau mea e tītauhia ia rāua tāta’itahi ’ia rave nō te ’imi i te fa’aorara’a, nō te ta’ata hō’ē ’e nō nā ta’ata fa’aipoipo. ’Ua ani Marie ia Davida ’ia fa’aea i pīha’i iho i tōna nā metua nō te hō’ē taime ’ia nehenehe iāna ’ia fa’a’āfaro i tōna mau mana’o. ’Ua haere ’oia i te hiero nō te ani i te tauturu a te Fatu. ’Ua haere ’oia i te rapa’aura’a, nō te ha’apūai i tōna ’aravihi nō te ’āparaura’a ’e nō te ha’api’i i te ha’amau i te mau ’ōti’a tano.
Marie rāua Davida :
-
’Ua tai’o rāua i te mau pāpa’ira’a mo’a i te mau pō ato’a.
-
’Ua pure.
-
’Ua fa’a’ite i te mau ’ohipa i tupu i te mahana tāta’itahi.
-
’Ua arapae i te pō hō’ē taime i te hepetoma.
’Ua matara rahi atu ā tā rāua mau ’āparaura’a. ’Ua parau Marie i tōna mana’o, ’e ’ua fa’aro’o Davida. ’Ua ha’amata rāua i te paraparau te tahi i te tahi mai tā rāua i nā reira i te taime mātāmua ’a fa’aipoipohia ai rāua.
’Ua fa’a’ite mai ’o Marie ē, e ’ere ’o Davida ana’e tei taui ; ’ua taui ato’a ’oia. ’Ua rahi atu ā tōna pūai ’e tōna ti’aturi iāna iho. ’Ua vai tātarahapa noa Davida ’e ’ua ho’i mai i te fare.
Ma te Fatu i roto i tō rāua orara’a i te mau mahana ato’a, ’ua rahi atu ā te ti’aturira’a ’e te here i roto i tō rāua tā’amura’a. I ’ite rāua to’opiti ē, ’ua ha’apūai te tauto’ora’a nō te ha’avī i teie tītaura’a, nā roto i te tauturura’a a te Fatu, ia rāua.
E arata’i te mau parau a te Mesia ia tātou
’Ia fa’aruru ana’e tātou i te mau fifi i roto i tō tātou mau tā’amura’a ’utuāfare, e ha’amana’o na tātou pā’āto’a i te pārahi ’ei ’āpo’ora’a ’e te Fatu. I te tahi taime e parau mai ’oia ia tātou e aha tē rave. I te tahi taime e nehenehe tātou e mā’iti. « E ’ere i te mea ti’a iā’u ’ia fa’aue atu i te mau mea ato’a » (Te Ha’api’ira’a Tumu ’e te mau Fafaura’a 58:26). Tē vai ra rā te tahi atu mau taime e ti’a ia tātou ’ia fāriu atu i ni’a i te Fatu. Mai te mea e tāpe’a tātou i te hi’ora’a ātea mure ’ore, e riro ïa te mau tao’a rahi nō te tau mure ’ore ’ei maita’i nō tātou, « ’e e ’ohipa ’āmui mai te mau mea ato’a ’ei maita’i nō [tātou] » (Te Ha’api’ira’a Tumu ’e te mau Fafaura’a 90:24).