« Nō te aha pa’i e’ita e nehenehe iā’u ’ia fa’a’ore i te hapa ? », Liahona, Tēnuare 2023.
Te reo o te feiā mo’a i te mau mahana hope’a nei
Nō te aha pa’i e’ita e nehenehe iā’u ’ia fa’a’ore i te hapa ?
’Ua pure au ’ia tauturu mai te Metua i te ao ra iā’u ’ia upo’oti’a i ni’a i tō’u mau mana’o ’ino ’e ’ia fa’a’ore i te hapa.
Faʼahōho’araʼa nā Allen Garns
’Ua ’āmui atu vau i te tahi atu mau taea’e nō tā’u pāroita nō te tauturu i te hō’ē tuahine ’ia taui te fa’aeara’a. Terā rā, i tō mātou taera’a atu i tōna fare fa’aeara’a, ’aita e nehenehe e tāpiri atu i tō mātou pere’o’o i tōna fare nō te mea tē vai ra hō’ē pere’o’o ’aita i ha’apa’o-maita’i-hia te tāpe’ara’a.
’Ua niuniu atu vau i te nūmera niuniu i ni’a i te pere’o’o nō te ani i te hō’ē ta’ata ’ia haere mai e fa’anu’u i te pere’o’o. ’Ua pāhono mai te hō’ē ta’ata ’e ’ua parau mai ē, e haere ’oi’oi mai ’oia.
15 minuti i muri mai, ’ua niuniu fa’ahou vau, ’aita rā ’oia i pāhono mai. I te pae hope’a, i muri a’e i te hō’ē fa’ahou pi’ira’a, ’ua fā mai ’oia ’e e piti tamari’i. ’Ua riri ’oia ’e ’ua parau mai ’oia i te hō’ē parau tei puta roa i roto iā’u. ’Ua tāmata vau i te ha’amo’e i te reira a fa’anu’u ai mātou i te pere’o’o.
I terā pō, ’ua feruri au i terā ’ohipa i tupu. ’Ua pure au ’ia tauturu mai te Metua i te ao ra iā’u ’ia ha’amo’e i tō’u mau mana’o ’e ’ia fa’a’ore i te hapa a terā ta’ata. ’Ua pāhono mai ’oia i tā’u pure.
Terā rā, ’aita i maoro roa, tē tai’o ra vau i te hō’ē ve’a nō te fenua iho ’e ’ua ’ite au i te hō’ē pāpa’ira’a i roto i te ve’a nō ni’a i teie ta’ata. Tei roto ato’a tōna hōho’a. ’Ua ho’i fa’ahou mai tō’u mau mana’o ’ino iāna. Nō reira, ’ua rave fa’ahou ā vau mai tā’u i rave ra. ’Ua ani au i te Fatu ’eiaha teie mea faufa’a ’ore ’ia ha’ape’ape’a fa’ahou mai iā’u, ’e ’ia tauturu mai ’oia iā’u ’ia fa’a’ore i te hapa a te reira ta’ata. ’Ua tupu mai te mana’o maita’i.
’Aita i maoro roa ’ua fārerei au i teie ā ta’ata i roto i te hō’ē fare toa. ’Ua ho’i fa’ahou mai ā tō’u mau mana’o ’ino’ino. ’Ua maere au. ’Ua ui au i te Fatu nō te aha ’aita i ti’a iā’u ’ia fa’aruru i teie ’ohipa i tupu. Tau mahana i muri mai, ’ua ha’api’i mai ’oia iā’u i te hō’ē ha’api’ira’a.
Tē fa’aru’e ra vau i te ’āua o te hiero nō Helsinki (Firirane), ’ite atura vau i teie ā ta’ata tē rave ra i te ’ohipa i roto i te ’āua o te hiero. ’Ua māere roa vau. ’Ua matara tō’u ferurira’a ’e ’ua ta’a a’era iā’u ē, mai iā’u nei, te tāvini ato’a ra ’oia i te Fatu ’e, mai iā’u nei, e mau mahana fifi ato’a tōna ’ia ’ore ana’e te mau ’ohipa e tere maita’i. ’Ua ti’a a’era iā’u ’ia hi’o i teie ta’ata mai te hō’ē taea’e nō’u. Ma te mata ’āpī, ’ua tupu i roto iā’u te fa’atura ’e te here iāna. I muri a’e i te reira, ’ua ’ore roa te mau mana’o tahito, ’aore roa i ho’i fa’ahou mai.
’Ia hi’o ana’e tātou ia vetahi ’ē mai tā te Fatu e hi’o nei ia tātou, e nehenehe tātou e pe’e i tāna fa’auera’a ’ia fa’a’ore hope roa i te hapa (hi’o Mataio 6:14–15 ; Te Ha’api’ira’aTumu ’e te mau Fafaura’a 64:9–10). ’Ua riro teie ’ohipa ’ei aroha mau o te Fatu, e ’ore e mo’ehia, ’o tā’u e tāmau noa nei ā i te feruri i roto i tō’u ’ā’au.