Mau hoho’a nō te faʼaroʼo

Te mana o te hi’ora’a

Nā Agim Deda, Tiranë, Alabania

’Ua ’ite au ē te rāve’a ana’e e nehenehe ai iā’u ’ia ’āfa’i mai i tā’u vahine fa’aipoipo i roto i te ’Ēkālesia nā roto ïa i tō’u hi’ora’a. I tō’u tauira’a i tā’u peu, ’ua ha’amata ’oia i te fāri’i i te Vārua o te Atua.

Hōho’a nā Cody Bell

I te hō’ē mahana, ’a tere ai au nō te haere e rave i te ’ohipa, ’ua ’ite au e piti nā taure’are’a e poro ra i te parau a te Atua i ni’a i te purūmu. ’Ua tāpe’a mai rāua iā’u ’e ’ua ani mai ē ’ua hina’aro ānei au e ’ite hau atu ā nō ni’a i te ’Ēkālesia a Iesu Mesia i te Feiā Mo’a i te mau Mahana Hope’a nei. I taua taime ra, ’aita vau i ’ite teihea tō’u ’utuāfare. ’Aita e ’avei’a pae vārua tā māua nō te ’ite mai i tō māua ’ē’a.

’Ua inu vau i te ’ava i taua po’ipo’i ra, nō reira ’aita vau e ha’amana’o rahi ra i te mea tā te mau misiōnare i parau mai iā’u. ’Ua hōro’a mai rā rāua iā’u i te hō’ē Buka a Moromona ’e te hō’ē buka iti nō ni’a i te peropheta Iosepha Semita, ’e tā rāua nūmera niuniu. I muri a’e i taua mahana ra, ’ua ha’amata vau i te tai’o. ’Ua ha’aputapū te hō’ē mea i tō’u vārua ’a tai’o ai au i te Buka a Moromona, ’e ’ua māere au nāhea te hō’ē tamaiti 14 matahiti i te fāri’i i te hō’ē ’ōrama rahi.

’Ua ’imi au i te parau mau, nō reira ’ua ha’amata vau i te fārerei i te mau misiōnare. I muri a’e i tō’u ravera’a i te rahira’a o te mau ha’api’ira’a, ’ua ’ite au e ti’a iā’u ’ia bāpetizohia. Terā rā, ’a fātata mai ai te mahana o tō’u bāpetizora’a, ’ua fa’atupu māua i te hō’ē ha’api’ira’a e mea fifi roa nō’u ’ia fa’aro’o. Tei ni’a te ha’api’ira’a i te ture nō te Parau Pa’ari.

E mea fifi roa taua ha’api’ira’a ra nō’u nō te mea ’ua inu rahi au. E mea fifi roa tā’u vāhi ravera’a ’ohipa. E feiā inu te mau ta’ata i piha’i au e rave ai i te ’ohipa, ’e nō reira ’ua nā reira ato’a vau. E mea pinepine au i te haere i rāpae ’au nō te inu i muri a’e i te ’ohipa ’e e ho’i au i te fare i te maorora’a pō.

E ’ohipa rahi rā tā te mau misiōnare i rave. Tē here noa nei au ia rāua nō te reira. ’Ua ha’api’i mai rāua iā’u ē, tē hina’aro nei te Atua ’ia pūai tātou ’e ’ua hōro’a mai ’oia ia tātou i te Parau Pa’ari nō te ha’amaita’i ia tātou. E mea fifi roa nō’u ’ia ha’apa’o i teie ture, ’āre’a rā, ’ua ha’amata vau i te ha’apa’o i te reira. Tē ha’amana’o nei au i tō’u pi’ira’a i te mau misiōnare i te mau mahana ato’a, ma te fa’ananea i te reira i ni’a i tō’u haerera’a i mua, ’e ma te parau ia rāua ē, ’aita vau i inu i taua mahana ra. ’Ua ’oa’oa roa rāua i tō’u haerera’a i mua.

Nā roto i tā rāua tauturu, ’ua bāpetizohia vau ’e ’ua tomo vau i roto i te nana ’a Iesu Mesia. ’Ua putapū vau i te Vārua i taua mahana nehenehe ra ! ’O vau ana’e rā i te taime a tomo ai au i roto i te ’Ēkālesia. ’Ua hina’aro vau ’ia pārahi tō’u ’utuāfare i pīha’i iho iā’u.

I tō’u paraparaura’a i tā’u vahine fa’aipoipo, Clirime, nō ni’a i te ’Ēkālesia, ’aita ’oia i fa’aro’o i te ha’amatara’a. Nō te tahi atu ha’apa’ora’a fa’aro’o tōna pāpā ru’au, ’e ’ua uiui noa ’oia ē nō te aha Te ’Ēkālesia a Iesu Mesia i te Feiā Mo‘a i te Mau Mahana Hope’a Nei i haere mai ai i Alabania. ’Ua ’ite au ē te rāve’a ana’e e nehenehe ai iā’u ’ia ’āfa’i mai iāna i roto i te ’evanelia, e mea nā roto ïa i tō’u hi’ora’a. Nā roto i tā tātou mau ’ohipa, e nehenehe te ta’ata e ’ite ’o vai mau tātou.

’Ua ’ite ’o Clirime i te mau tauira’a i ni’a iā’u ’a fa’aru’e ai au i te ’ava ’e ’a ha’amata ai au i te ho’i ’oi’oi i te fare nā te ’ohipa. Nō te mau tauira’a tā’u i rave, ’ua ha’amata ’oia i te fāri’i i te Vārua o te Atua ’a fa’ati’a ai au iāna nō ni’a i te ’Ēkālesia. E’ita tā’u e nehenehe e fa’ata’a i te mana’o ’oa’oa tā’u i fāri’i ’a parau mai ai ’oia iā’u ē, i te hō’ē mahana e bāpetizo-ato’a-hia ’oia. ’Aita i maoro ’ua ha’amata oia i te fa’aro’o i te mau ha’api’ira’a misiōnare, o tā’u i tauturu i te mau misiōnare ’ia ha’api’i. ’Ua ’oa’oa ta’a ’ē au ’a fa’ata’a ai ’oia i te hō’ē tai’o mahana nō tōna bāpetizora’a, e ono ’āva’e i muri a’e i tō’u bāpetizora’ahia.

Nā roto i tōna bāpetizora’a, ’e te bāpetizora’a o tā māua nā tamari’i e piti i te va’ura’a o tō rāua matahiti, ’ua mana’o vau ē, e nehenehe mātou e riro ’ei ’utuāfare mure ’ore. E ha’amatara’a noa rā te bāpetizoraʼa. Nō te fa’aineine nō te haere i te hiero, ’ua ’ite mātou ē, tītauhia ia mātou ’ia pe’e i te Atua e tae noa atu i te hope’a o tō mātou orara’a, te ha’apa’ora’a i te mau fa’auera’a, te haerera’a i te purera’a, te ravera’a i te ’ōro’a mo’a, te tāvinira’a i roto i te mau pi’ira’a, te tai’ora’a i te mau pāpa’ira’a mo’a, ’e te ha’api’ira’a hau atu nō ni’a i te mau fafaura’a ’e te ’ōpuara’a nō te fa’aorara’a.

Te mahana a tā’atihia ai mātou ’ei ’utuāfare i roto i te hiero nō Frankfurt (Heremani), ’ua riro ïa ’ei mahana nehenehe roa. I roto i te hiero, ’ua māramarama rahi atu ā vau nō ni’a i te fa’anahora’a nō te ’oa’oa tā tō tātou Atua nō tātou, ’e ’ua fāri’i au i tōna here.

Tē ha’amana’o noa nei ā vau i te mau ’euhe tā Clirime ’e ’o vau i rave i roto i te hiero. I te mau taime ato’a e tupu te hō’ē ’ohipa hape ’aore rā tē fifi ra mātou, e ho’i fa’ahou tō’u ferurira’a i terā mau ’euhe.

’Ei ’utuāfare, tē tāmata nei mātou i te ora ma te au maita’i e te tahi e te tahi nō te mea o te reira tā mātou i fāri’i i roto i te hiero. I te mau taime ato’a e feruri au i te hiero, e ’oa’oa vau ’e e ha’amaita’ihia vau. ’Ua ’ite au ē e mea mau te Atua ’e tē here nei ’oia ia tātou ’e tē hina’aro nei ’oia ’ia ’oa’oa tātou.