« Mai te mea e nehenehe tāna e fa’ariro i te pape ’ei uaina… », Liahona, Tēnuare 2023.
Te mau semeio ’a Iesu
Mai te mea e nehenehe tāna e fa’ariro i te pape ’ei uaina…
E toru mea tā’u i ha’api’i mai nā roto mai i teie semeio tei tāu’a-pinepine-hia.
’O Ioane ana’e te ta’ata pāpa’i ’evanelia ’o tē fa’a’ite fa’ahou mai i te Fa’aora i te fa’arirora’a i te pape ’ei uaina (hi’o Ioane 2:1–11). ’Ua tae ato’a mai tōna mana’o pūai nō ni’a i te ’ohipa i tupu nō te fa’a’ite mai ia tātou ē, o te « ha’amatara’a o te mau semeio » terā a te Fa’aora (Ioane 2:11).
Nō te hīro’a tumu, e nehenehe te mau fifi o te paura’a te uaina e ha’afifi i te ti’ara’a sōtiare o te feiā i ’āmui mai. 1 ’E noa atu e ’aita vau i ti’aturi ē, e tītauhia te hō’ē temeio rahi nō te taui i te orara’a, ’ua uiui au nō te aha Ioane i mana’o ai ē e mea faufa’a rahi roa teie semeio i rotopū i te mau ta’ata e rave rahi tei taui roa i te orara’a.
Nō te aha te mau semeio ?
Nō te aha e mea faufa’a roa te mau semeio i roto i te tāvinira’a a te Fa’aora ? Pāpū roa ē, ’ua riro te reira ’ei tuha’a nō tōna aumihi nō te feiā nava’i ’ore (hi’o Mareko 1:41). Hau atu, ’ua riro te mau semeio ’ei fa’a’itera’a faufa’a rahi nō tōna pūai ’e tōna mana hanahana (hi’o Mareko 2:5, 10–11). E nehenehe ato’a te mau ’ohipa semeio e ha’apūai i te fa’aro’o ’e e ha’apa’o maita’i i tāna parau poro’i (hi’o Ioane 2:11 ; 6:2).
I muri iho, ’ua fa’a’ite mai ra te hō’ē ta’ata iā’u ē, ’aita te mau semeio a te Fa’aora i ’āfa’i noa mai i te ta’ata ia fa’aro’o i te poro’i ; ’ua tauturu te reira i te ha’api’ira’a i te parau poro’i.2 I tō’u anira’a iā’u iho e aha tā’u e nehenehe e ha’api’i mai nō ni’a ia Iesu Mesia ’e tāna misiōni hanahana mai te fa’arirora’a i te pape ’ei uaina, ’ua ha’amata vau i te ’ite i te mau mea ’āpī.
Teie e toru ha’api’ira’a tā’u i ’apo mai nā roto mai i te semeio i Kana nō ni’a i te Fa’aora ’e tōna mana nō te fa’aora.
1. « ’Aore ā i tae i tō’u ra hora »
I tō Maria anira’a ia Iesu i te tauturu, ’ua pāhono mai ’oia, « ’Aore ā i tae i tō’u ra hora » (Ioane 2:4). Ma te ’ore e ’ite hau atu, ’aita i pāpū maita’i i roto i te pāpa’a parau a Ioane te mea tā Maria e tīa’i nei ’aore rā e aha tā Iesu i parau nā roto i tāna pāhonora’a ē, ’aita ā tōna hora i tae mai.
’Ua haru tō’u mata i ni’a i taua parau ra. E mea pāpū ē, tē fa’ahiti ra Iesu i te tahi ’ohipa fātata i te mau mahana i muri nei, mai te ha’amatara’a o tāna tāvinira’a i mua i te ta’ata. I te hō’ē ā taime, tē vai nei te hō’ē tāvevo ’o tē fa’ati’a i roto i te pāpa’a parau ’a Ioane, ma te fa’atoro i te semeio hope’a o tāna tusia tāra’ehara (hi’o Ioane 4:21–23 ; 5:25–29 ; 7:30 ; 8:20). I te pae hope’a, tē fa’ahiti fa’ahou nei te parau i te hope’a o tāna tāvinira’a i te tāhuti nei « i ’ite ai Iesu ē ’ua tae i tōna hora e fa’aru’e mai ’oia i teie nei ao a reva atu ai i te Metua ra » (Ioane 13:1, reta tei fa’ahuru-’ē-hia ; hi’o ato’a Ioane 12:23, 27 ; 16:32). E hou ’oia a fa’aru’e atu ai i Getesemane, ’ua pure ’oia, « E tā’u Metua, ua tae i te hora ; ’a ha’amaita’i i tō Tamaiti, ’ia ha’amaita’i ato’a ho’i tō Tamaiti ia ’oe » (Ioane 17:1, reta tei fa’ahuru-’ē-hia).
I tō’u ’itera’a ia Ioane i te fa’ahiti-fa’ahou-ra’a i teie pereota i roto i tāna pāpa’a parau, ’ua tauturu te reira iā’u ’ia ’ite i te hope’ara’a mai te ha’amatara’a mai ā. ’A tahi, ’ua taui Iesu i te pape ’ei uaina nō te ha’amāha i te po’ihā pae tino. I muri iho, i te pae hope’a, ’ua fa’a’ohipa ’oia i te uaina ’ōro’a nō te fa’ahōho’a i tōna toto tāra’ehara, tei fa’atupu i te ora mure ’ore ’e tei fa’atupu i te feiā e ti’aturi iāna ’eiaha roa atu e po’ihā fa’ahou (hi’o Ioane 4:13–16 ; 6:35–58 ; 3 Nephi 20:8).
2. « Tāna e fa’aue mai ia ’outou na, e nā reira ’outou »
I muri a’e i tōna anira’a i te tauturu ia Iesu, ’ua parau atura Maria i te mau tāvini : « Tāna e fa’aue mai ia ’outou na, e nā reira ’outou » (Ioane 2:5). Tē vai ra hō’ē ha’api’ira’a i roto i teie fa’ahitira’a parau ’e i roto i te mau tū’atira’a māere i rotopū i teie ’ā’amu ’e te ’ā’amu o Iosepha i ’Aiphiti.
« E pohe a’era tō Aiphiti i te po’ia, ’ua pi’i noa maira te ta’ata ia Phara’o i te ma’a ; ’ua parau atura Phara’o i tō Aiphiti ato’a ra, ’a haere ia Iosepha ra; ’e ’o tāna e parau mai ia ’outou na, ’o tā ’outou ïa e rave » (Genese 41:55, reta tei fa’ahuru-’ē-hia).
Penei a’e ’aita ’o Mary i ’ōpua e rave i teie fa’atū’atira’a, ’e penei a’e ’aita ato’a ’o Ioane. I tō’u rā ’itera’a i te mau tū’atira’a, ’ua puta mai e piti mana’o i roto i tō’u ferurira’a.
’A tahi, ’ua ’ite fa’ahou vau i te tahi atu rāve’a tā Iosepha ’e te tahi atu mau hōho’a i roto i te Faufa’a Tahito i fa’ahoho’a ia Iesu Mesia ’e tāna misiōni. Hau atu rā i te faufa’a, ’ua fa’aha’amana’o mai te mau ’ā’amu nō Aiphiti ’e o Kana iā’u ē e’ita noa e nehenehe ia Iesu Mesia ’ia fa’aora ia tātou i te hara ’e i te pohe nā roto i tāna Tāra’ehara—o tāna ho’i i fa’ahōho’a i muri a’era na roto i te pāne ’e te uaina—e nehenehe ato’a rā tāna e fa’aora ia tātou i te mau tāmatara’a pae tino, pae sōtiare ’e i te tahi atu mau tāmatara’a. I tō te mau ta’ata ’ere-ra’a i te pāne, ’ua parau atu Phara’o ia rātou ’ia rave i te mau mea ato’a tā Iosepha i parau. ’Ua rave rātou ’e ’ua hōro’ahia mai te pāne ’e ’ua fa’aorahia rātou i te māuiui pae tino. I te paura’a te uaina a te mau tāvini, ’ua parau atu ra ’o Maria ia rātou ’ia rave i te mau mea ato’a tā Iesu i parau. ’Ua nā reira rātou ’e ’ua hōro’ahia mai te uaina, ’e ’ua fa’aorahia rātou i te manuia ’ore o tā rātou mau tītaura’a.
Mai te mea ’ua ineine tātou i te rave i te mau mea ato’a tā Iesu e parau, e nehenehe tāna e fa’atupu i te mau semeio i roto i tō tātou orara’a.
Balm in Gilead [Rā’au i Gileada], nā Annie Henrie Nader, e’ita e nehenehe e tāhoho’a
Mai te mea ’ua ineine tātou i te rave i te mau mea tā Iesu e parau, e nehenehe tāna e rave i te reira nō tātou ’e e fa’atupu i te mau semeio i roto i tō tātou orara’a (hi’o Hebera 10:35–36). Te fa’aorara’a, ’o te semeio rahi roa a’e ïa ’o tāna mau semeio ato’a, ’e e tītauhia ia tātou ’ia ha’apa’o (hi’o Te Ha’api’ira’a Tumu ’e te mau Fafaura’a 14:7 ; Te mau Hīro’a Fa’aro’o 1:3).
3. « ’Ua fa’a’ī ihora rātou ē tae roa a’era i te auvaha »
’Ua fa’aue ihora te Fa’aora i te mau tāvini ’ia fa’a’ī e ono fa’ari’i pape ’ōfa’i i te pape. « Ua fa’a’ī ihora rātou e tae roa a’era i te auvaha » (Ioane 2:6–7).
Noa atu ē ’ua hōro’a te feiā ’aravihi i te mau fāito ta’a ’ē, e mea pāpū paha ’ia parau ē e rave rahi tārani e vai ra i roto i te fa’ari’i tāta’itahi. E mea fifi ānei ’ia fa’ariro hō’ē tārani ’aore rā 100 tārani pape ’ei uaina, ’aita vau i ’ite. Te mea i taui i tō’u orara’a, ’o te mana’o ïa ē, e mana tō Iesu nō te taui i te hō’ē mea ’ei hō’ē mea ta’a ’ē roa. ’Aita oia i hāmani noa i te pape uaina fa’ano’ano’a ; ’ua rave ’oia i te pape, e tōna hāmanira’a ’ōhie, ’e ’ua fa’ariro i te reira ’ei uaina, hō’ē ’āno’ira’a ’ohipa rahi e rave rahi hānere rā’au.
Mai te mea e nehenehe tāna e rave i te reira, e nehenehe ïa tāna e fa’ariro i tā’u mau tāmatara’a ’ei mau ha’amaita’ira’a—’eiaha noa i te tu’ura’a i te tahi hihi tīa’ira’a i roto i te vero, i te tauira’a rā i te faufa’a o te tāmatara’a ’ei mea ’o tē ha’amaita’i iā’u (hi’o Roma 8:28 ; 2 Nephi 2:2).
’E mai te mea e nehenehe ’oia e rave i te reira nō te hō’ē tītaura’a, e nehenehe ïa tāna e rave nō te ta’ato’ara’a. Nō reira, ’ia ’ī-roa ana’e te orara’a i te mau tāmatara’a, ’a ha’amana’o ē e nehenehe tāna e taui i te pape ’ei uaina. E nehenehe tāna e taui i te rehu auahi ’ei nehenehe (hi’o Isaia 61:3). E nehenehe tāna e rave i te ’ino ’e ’ia fa’ariro ’ei maita’i (hi’o Genese 50:20). E nehenehe tāna e fa’ariro i tā’u mau hape ’ei tupura’a i te rahi ’e ’ia rave i tā’u mau hara ’e ’ia taui i te reira mai te fa’ahapara’a ’ia haere i mua.3
’E nō’u nei, ’ua riro taua ’itera’a ra ’ei ’ohipa faufa’a roa a’e i te mau mea ato’a. ’Ua ha’api’i mai teie semeio tei mo’ehia iā’u i te hō’ē taime ē nā roto i tōna mana, mai te mea e fa’aro’o tō tātou nō te rave i te mea tāna e ani mai, e nehenehe ’oia e taui ia tātou i te mea tei roto tātou i te mea tā tātou e nehenehe e riro mai—mai iāna ra te huru.