E aha te misiōni ’e te tāvinira’a a te Mesia ?

’Ua fafau Iesu Mesia i roto i te orara’a hou te tahuti nei ’ia haere mai i te fenua nei ’e ’ia riro ’ei Fa’aora nō tātou (hi’o Mose 4:2 ; Aberahama 3:27). ’Ei Fa’aora nō tātou, ’ua rave ’oia i tāna misiōni ’e tāna tāvinira’a.

’Ua fa’ata’a mai te peresideni Russell M. Nelson : « Te misiōni a te Fatu i te tāhuti nei ’o te fa’atupura’a ïa i te tāra’ehara… [’e] te fa’arirora’a i te ora mure ’ore ’ei ’ohipa e noa’a i te ta’ata ato’a e ti’a ’ia fāri’i i te reira… Tāna tāvinira’a, ’o te mau mea ato’a ïa tāna i rave—tāna mau temeio, tāna mau ha’api’ira’a, tōna here, tāna fa’atumura’a i ni’a i te mau ’ōro’a, tāna ha’api’ira’a ia tātou nāhea ’ia pure ».¹

’Ua fa’ata’ahia te mau huru o te misiōni ’e te tāvinira’a a te Mesia i te mau vāhi e rave rahi i roto i te mau pāpa’ira’a mo’a. E hi’o i te mau fa’a’itera’a tei hōro’ahia mai e tōna metua vahine, ’o Maria, i roto i te Luka 1:46–55. O Hana, te hō’ē ato’a hi’ora’a nō te aurarora’a, ’ua pūpū ’oia i te hō’ē ā huru pure nō ni’a i te tāvinira’a a te Fatu i roto i te 1 Samuela 2:1–10.

Mai tā te buka ha’api’ira’a Mai, pe’e mai e parau mai nei, e nehenehe ’outou e fa’aau i te reira i te a’ora’a a Iesu i roto i te Mataio 5:3–12.²

E nehenehe e tāpura i te tahi mau huru o te tāvinira’a a te Mesia tā teie mau pāpa’ira’a mo’a e fa’a’ite nei ; hō’ē huru tei tāpurahia ’ei hi’ora’a :

’Ua haere mai te Mesia nō te tauturu i te ha’amāha i tō tātou po’ia pae vārua (hi’o 1 Samuela 2:5 ; Luka 1:53 ; Mataio 5:6).