Te reo o te feiā mo’a i te mau mahana hope’a nei

’Ei reira ’oe nō tā ’oe tamaiti

Nā Ross J. Davidson Jr., Texas, Fenua Marite

I muri a’e i tō te Vārua paraparaura’a i tō’u metua tāne i te taime a fa’atōro’ahia ai au i te autahu’ara’a, ’ua taui ’oia i tōna orara’a.

Four Generations [Maha u’i], nā Kwani Povi Winder

’Ua itoito fa’ahou vau i roto i te ’Ēkalesia i te taime ’a ’āfa’i ai tō’u tonton Bill i tō’u nā tuahine e piti i te paraimere. ’Ua riro tō’u ’orometua paraimere, ’o Jean Richardson, ’ei metua vahine maita’i taipe. ’Ua au roa vau iāna ’e tō’u mau hoa ’āpī nō te ’Ēkālesia, e mea maita’i a’e rātou i ni’a iā’u i te mau tamari’i i tō’u vāhi fa’aeara’a. Nō reira, ’ua fa’aoti au e fa’aea.

’A fātata mai ai te 12ra’a o tō’u mahana fanaura’a, ’ua ani mai te ’episekōpo Dal Guymon iā’u ’ia fāri’i i te autahu’ara’a a ’A’arona ’e ’ia fa’atōro’ahia ’ei diakono. ’Aita vau i pāpū e aha te aura’a ’o te reira, ’ua parau rā vau ’ē. I muri iho ’ua parau maira ’oia : « E ani ’oe i tō ’oe pāpā ’ia ’āfa’i mai ia ’oe i ’ō nei i te sābati i muri nei, ’e e fa’atōro’a māua ia ’oe ».

’Ua fa’aea ’o pāpā ’e tōna ’utuāfare i te haere i te purera’a i te 13ra’a o tōna matahiti. ’Ei ta’ata pa’ari, te rahira’a o te mau hope’a hepetoma tei roto ’oia i te mau fare inura’a ’aore rā e haere ’oia e tāi’a. ’Ua tāvini ’oia i roto i te nu’u ihitai marite i te tau nō te Tama’i Rahi II o te Ao nei ’e te Tama’i Nō Korea. E puhipuhi ’oia i te ’ava’ava, e inu i te ’ava, ’e e tapu, terā rā ’ua tu’i tōna ro’o ’ei ta’ata parau ti’a ’e te maita’i i roto i tō mātou ’oire iti na’ina’i ’o Montana.

I te ’āfa’ira’a ’o pāpā’u iā’u i te fare purera’a i te sābati i muri iho, e ’ohipa rahi mau. I te taera’a i te taime, ’ua pi’i maira te ’episekōpo Guymont iā’u, ’e ’ua ani mai iā’u ’ia pārahi i ni’a i te hō’ē pārahira’a. ’Ua tu’u a’e ra e rave rahi ta’ata—’eiaha rā tō’u pāpā—i tō rātou rima i ni’a i tō’u upo’o ’e ’ua rave a’e ra i te ’ōro’a.

’Ua ’ite au i te teimaha o te mau rima rarahi e rave rahi i ni’a iā’u. Tē pārahi ra ’o pāpā i ni’a i te hō’ē ’iri pārahira’a i te ātea ri’i noa atu, ’e ’ua fāri’i ’oia i te hō’ē teimaha ta’a ’ē—i roto i tōna ’ōuma. ’Ua paraparau mai te hō’ē reo i roto iāna, i te nā ’ō ra’a ē : « ’Ei reira ’oe nō tā ’oe tamaiti ’ia tupu fa’ahou ana’e te reira ».

I roto i te mau hepetoma i muri mai, ’ua taui ’o pāpā i tōna orara’a ’e ’ua ha’amata i te haere i te purera’a i te mau Sābati ato’a. ’Aita i maoro roa, ’ua riro mai te ’Ēkālesia ’ei rōtahira’a tumu nō tō mātou orara’a ’utuāfare.

’Ua riro mai ’o pāpā ’ei tauturu ha’amāramarama nō tā’u pupu diakono, pupu ha’api’i, ’e pupu tahu’a, ’ei ’orometua ha’api’i nō’u i te ha’api’ira’a sābati, ’e ’ei ta’ata fa’aineine nō’u nō te tāora pōpō i roto i te ’ete, nō te tā’iri pōpō, ’e te pā’ira’a pōpō. ’A riro ai māua ’ei hoa hāhaere ’utuāfare, ’ua tauturu ’o pāpā i te tahi atu mau tāne ’e te mau ’utuāfare ’ia rave fa’ahou i te ’ohipa i roto i te ’Ēkālesia.

Ma te tauturuhia e tō’u pāpā, ’ua rave au i tō’u iho fa’afāriura’a. Mai taua taime ra, ’ua tāmata vau i te ha’apa’o maita’i i te mau tāne, mai tō’u pāpā, ’o tē nehenehe e pāhono i te hō’ē anira’a ’ia riro mai ’ei metua tāne maita’i roa a’e e nehenehe ia rātou ’ia riro mai.

E vai noa tō’u māuruuru nō te ’ohipa tā tō’u tonton Bill, tā te hō’ē ’orometua paraimere maita’i, tā te hō’ē ’episekōpo tei ’ī i te pa’ari, ’e tā tō’u pāpā i rave nō’u a 60 matahiti i teie nei.