Te mau niu o te ’evanelia

E mea mure ’ore te mau ’utuāfare

Te ’utuāfare te niu mau o te sōtaiete ’e te ’Ēkālesia. Tē ti’aturi nei te mau melo o Te ’Ēkālesia a Iesu Mesia i te Feiā Mo’a i te Mau Mahana Hope’a Nei ē e nehenehe te mau ’utuāfare e riro ’ei mea mure ’ore. Tē ha’a nei tātou nō te ha’apūai i tō tātou mau ’utuāfare i ni’a i te fenua nei. E fa’aro’o ato’a tō tātou ē, e nehenehe tātou e fāri’i i te ha’amaita’ira’a o te hō’ē ’utuāfare mure ’ore.

Te ’utuāfare o te Atua

E mau tamaiti ’aore rā e mau tamāhine vārua te mau ta’ata ato’a nā te mau metua i te ra’i ra. E tuha’a tātou pā’āto’a nō te ’utuāfare o te Atua. E huru hanahana ’e e hope’a tō tātou pā’āto’a. Mai te mea e ora parau ti’a tātou, e nehenehe tātou e ho’i e ora i pīha’i iho i tō tātou Metua i te ao ra ’ei tuha’a nō tōna ’utuāfare ē a muri noa atu.

Hōho’a nō te fa’aipoipora’a nā Joseph Kaluba

Te mau ’utuāfare mure ’ore

’Ia fa’aipoipo-ana’e-hia te hō’ē tāne ’e te hō’ē vahine i roto i te hiero ’e ’ia ha’apa’o i tā rāua mau fafaura’a, e vai noa tō rāua fa’aipoipora’a ē a muri noa atu. ’Ua pi’ihia teie ’ōro’a hiero tē tā’atira’a. Te mau tamari’i fānauhia i muri mai i te tā’atira’ahia tō rātou nā metua, ’ua fānauhia ïa i roto i taua fafaura’a ra. Te mau tamari’i fānauhia hou tō rātou nā metua e tā’atihia ai, e nehenehe rātou e tā’atihia ia rātou i roto i te hiero ’ia nehenehe ia rātou ’ia riro ’ei ’utuāfare ē a muri noa atu. E rave te mau melo o te ’Ēkālesia i te ’ā’amu ’utuāfare ’e te ’ohipa hiero ’ia ti’a ia rātou ’ia tā’ati ’āmui i tō rātou ’utuāfare i roto i te mau u’i ato’a. E noa’a te ha’amaita’ira’a o te hō’ē ’utuāfare mure ’ore maoti Iesu Mesia ’e tāna tāra’ehara.

Fa’aipoipora’a

’Ua ha’apa’ohia te fa’aipoipora’a i rotopū i te tāne ’e te vahine e te Atua. Tē ha’api’i nei te ’evanelia a Iesu Mesia i te mau tāne ’e te mau vahine fa’aipoipo ’ia ha’apa’o maita’i i te tahi ’e te tahi ’e ’ia ha’apa’o maita’i i te mau fafaura’a o te fa’aipoipora’a. E mea ti’a ia rāua ’ia vai pāpū noa i roto i te mana’o, te parau ’e te ’ohipa. E auhoara’a ’aifāito te fa’aipoipora’a, ’e e ti’a i nā hoa fa’aipoipo ’ia fa’aitoito, ’ia tāmāhanahana, ’e ’ia tauturu te tahi i te tahi.

Te mau metua ’e te mau tamari’i

’Ua fa’aue te Atua ia Adamu ’e ia Eva ’ia fānau i te mau tamari’i. ’Ua ha’api’i te feiā fa’atere o te ’Ēkālesia ē, tē pūai noa nei ā teie fa’auera’a. E ’ohipa ’āmui te mau metua vahine ’e te mau metua tāne nō te aupuru i tā rātou mau tamari’i nā roto i te here ’e te parau ti’a (hi’o Te Ha’api’ira’a Tumu ’e te mau Fafaura’a 68:25–28). E ha’api’ihia te mau tamari’i ’ia fa’atura ’e ’ia fa’aro’o i tō rātou mau metua (hi’o Exodo 20:12).

Te hōro’ara’a ’e te ’apora’a i te ha’api’ira’a

E ha’api’i te mau metua i tā rātou mau tamari’i ’ia here i te Atua ’e ’ia ha’apa’o i tāna mau fa’auera’a. E hōro’a mai te orara’a ’utuāfare ia tātou i te mau rāve’a nō te fāri’i i te ’oa’oa ’e nō te ha’api’i mai i te fa’a’oroma’i ’e te nounou ’ore. E tauturu teie mau huru ia tātou ’ia riro hau atu mai te Atua te huru ’e ’ia fa’aineine ia tātou ’ia ora ma te ’oa’oa ’ei ’utuāfare ē a muri noa atu.

Ha’apūai i te mau ’utuāfare

Tītauhia te ’ohipa, te ha’amo’ara’a ’e te fa’a’oroma’i nō te patu i te hō’ē ’utuāfare manuia. E nehenehe te mau parau tumu o te ’evanelia mai te fa’aro’o, te pure, te fa’a’orera’a hapa, te here, te ’ohipa ’e te ’ārearea maita’i e tauturu ia tātou ’ia ’ite i te ’oa’oa i roto i te orara’a ’utuāfare. E nehenehe ato’a tātou e fāri’i i te heheura’a nō tātou iho nō te ’ite nāhea i te ha’apūai i tō tātou ’utuāfare.

Hōho’a nō te Mesia, nā Heinrich Hofmann

E nehenehe te mau ta’ata ato’a e fāri’i i te mau ha’amaita’ira’a

E ’ere te tā’āto’ara’a tē fari’i i te rāve’a nō te riro ’ei tuha’a nō te hō’ē ’utuāfare maita’i i’ō nei i ni’a i te fenua nei. ’Ua fafau mai rā te Atua ē, te mau ta’ata ato’a e ha’apa’o i tāna mau fa’auera’a, e fāri’i ïa rātou i te mau ha’amaita’ira’a ato’a o te hō’ē ’utuāfare mure ’ore. E nehenehe tātou e ti’aturi iāna ’e e fa’aro’o i tāna tārena.

Nō roto mai i te mau pāpa’ira’a mo’a

E ha’api’i te mau metua i tā rātou mau tamari’i ’ia here ’e ’ia tāvini te tahi i te tahi (hi’o Mosia 4:14–15).

E ha’apūai te pure i te mau ’utuāfare (hi’o 3 Nephi 18:21).

Te feiā tei tā’atihia i roto i te hiero e fāri’i rātou i te mau ha’amaita’ira’a mure ’ore (hi’o Te Ha’api’ira’a Tumu ’e te mau Fafaura’a 132:19).

Te mau parau e ha’amana’o

Te nātura hanahana : Te mau huru maita’i tā tātou i fāri’i nō ’ō mai i te Atua ra ’ei mau tamari’i vārua nāna.

Te mau fafaura’a : Te mau fafaura’a tā tātou e rave ’e te Atua. E fafau mai ’oia i te mau ha’amaita’ira’a ia tātou.

Fa’atōro’ahia : fa’anahohia, ha’amauhia ’e ’aore rā fa’atōro’ahia. Te aura’a ato’a o te parau « fa’atōro’a » o te hōro’ara’a ïa i te hō’ē mana nō te autahu’ara’a i roto i te hō’ē tōro’a autahu’ara’a, mai te diakono e aore rā, te peresibutero.

Heheura’a : Fa’aurura’a nō ’ō mai i te Atua ra i tāna mau tamari’i i ni’a i te fenua nei.

Ha’api’i rahi atu ā

Nō te ha’api’i mai e aha tā te mau peropheta nō te mau mahana hope’a nei i ha’api’i nō ni’a i te mau ’utuāfare, e nehenehe tā ’outou e tai’o « Te ’utuāfare : E Poro’i i tō te Ao nei » i ni’a ChurchofJesusChrist.org ’aore rā i ni’a i te fa’anahora’a Vaira’a buka ’evanelia. Tē vai ra tā te mau pāroita ’e te mau ’āma’a te mau fa’anahora’a Paraimere, Feiā ’Āpī Tamāroa ’e Feiā ’Āpī Tamāhine nō te mau tamari’i ’e te feiā ’āpī. E nehenehe ’outou e paraparau i te feiā fa’atere ’e i tō ’outou mau taea’e ’aore rā mau tuahine aupuru nō ni’a e nāhea rātou i te tauturu i te ha’apūai i tā ’outou mau tamari’i.