Te ’itera’a i te ’ōpuara’a hanahana i roto i tō tātou ’utuāfare « e ’ere i te mea maita’i roa », Liahona, Tēnuare 2023.

Feiā ʼāpī paʼari

Te ’itera’a i te ’ōpuara’a hanahana i roto i tō tātou ’utuāfare « e ’ere i te mea maita’i roa »

Nā Jenet Erickson

’Orometua ’āpiti, tuha’a fa’atere nō te ’ā’amu ’e te ha’api’ira’a tumu a te ’Ēkālesia, fare ha’api’ira’a tuatoru nō Brigham Young

E nehenehe te ’orera’a e fāri’i i te ’utuāfare « maita’i roa » i te tāhuti nei e riro ’ei mea māuiui, terā rā e nehenehe tātou e fa’a’ohipa i tā tātou mau mea mau nō te ha’afātata ia tātou i te Fa’aora.

feiā ’āpī pa’ari tamāhine ’e te hō’ē ’ōpupu mana’o o te ’utuāfare

’Aore hō’ē mea e ’āfa’i mai i te mau mana’o hōhonu a’e nō te aura’a ’e te ’oa’oa ’e te hia’ai ’e te māuiui maori rā tō tātou mau tā’amura’a tumu roa a’e i te tāhuti nei—tō tātou mau tā’amura’a ’utuāfare. ’E nō te mea ho’i e faufa’a rahi tō teie mau tā’amura’a, ’ua fa’auruhia tō tātou feiā fa’atere o te ’Ēkālesia ’ia hāmani i « Te ’Utuāfare : E Poro’i i tō te Ao nei ».¹ Tē fa’a’ite pāpū nei teie mau parau mau nō te hō’ē Metua here ’o tē hina’aro nei ’ia ’ite tātou i te mau hōho’a hanahana e arata’i atu i te ’oa’oa mure ’ore i roto i te orara’a ’utuāfare.

’Ua ha’api’i mai te peresideni Henry B. Eyring, tauturu piti i roto i te Peresidenira’a Mātāmua ē : « Nō te mea ’ua here tō tātou Metua i tāna mau tamari’i, e’ita ’oia e vaiiho ia tātou ’ia ’imi e aha te mau mea faufa’a a’e i roto i teie orara’a nō ni’a i te vāhi e nehenehe i tō tātou mana’o ha’apa’o e hōpoi mai i te ’oa’oa ’aore rā tō tātou mana’o tau’a ’ore e hōpoi mai i te ’oto ».² Tei roto i te reira te rahira’a tauatini ’ohipa mo’a o te ’utuāfare tā tātou e nehenehe e fāri’i i roto i teie orara’a : tamāhine ’aore rā tamaiti, tuahine ’aore rā taea’e, metua vahine ’aore rā metua tāne, tati ’aore rā tonton, māmā rū’au ’aore rā pāpā rū’au.

Tē ha’amāramarama nei te mau parau mau i roto i te poro’i nō te ’utuāfare i te ’ē’a e tae atu ai i te « maita’i roa mure ’ore » e rave rahi ho’i o tātou e hina’aro pūai nei—te mau tā’amura’a ’utuāfare pūai ’e te ’oa’oa mure ’ore. Te fifi, ’oia ho’i, tē ora nei tātou i roto i te « orara’a tāhuti mau ». ’E e nehenehe te reira ārea i rōpū i « te mea mau » ’e « te mea maita’i roa » e riro ’ei mea māuiui. I te tahi taime, maoti i te hi’o i te reira mai te hō’ē mōrī nō te arata’i ia tātou, e nehenehe tātou e fāri’i i te poro’i nō ni’a i te ’utuāfare ’ei fa’aha’amana’ora’a rahi i te vāhi « ’ua manuia ’ore » tātou i te tāpaera’a i te « maita’i roa ».

E hina’aro paha tātou i te fa’aipoipora’a ’aita rā tātou e hi’o ra i te reira mai te hō’ē mea e tupu.
’Ua fa’aipoipohia paha tātou ’e ’ua fa’aruru i te hō’ē fa’ata’ara’a ’ino roa.
E hina’aro paha tātou i te mau tamari’i ’aita e ti’a ia tātou ’ia amo.
’Ua ’ite paha tātou i te hāmani-’ino-ra’a i roto i tō tātou mau tā’amura’a ’utuāfare, tā tātou i ti’aturi.
’Ua fārerei paha tātou i te māuiui rahi nō te mau mā’itira’a a te mau melo here o te ’utuāfare.
E tupu paha te mana’o ’āmahamaha i roto ia tātou noa atu tā tātou mau tauto’ora’a maita’i roa a’e nō te fa’atupu i te hō’ēra’a i rotopū i tei herehia e tātou.
E tupu ato’a paha te mana’o ’ino’ino nō te mau hina’aro ’e te mau fafaura’a tei ’ore i tupu.

Te ti’ara’a mau, e ’ite tātou pā’āto’a i te mau tāmatara’a, te māuiui, ’e te ’oto i roto i te orara’a ’utuāfare—te tahi hau atu i te tahi. Nō te tahi fāito, e topa tātou pā’āto’a i rāpae i te mau hōho’a maita’i roa tei vauvauhia i roto i te poro’i nō ni’a i te ’utuāfare.

Te mea ’aita paha tātou e ’ite ’o te ’ōpuara’a hanahana ïa i roto te reira ti’ara’a mau.

Te ’imira’a ’e te aurarora’a i te Fa’aora

’Ei vahine ’ōtahi tei hina’aro i te fa’aipoipora’a ’e te mau tamari’i e rave rahi matahiti te maoro, ’ua hina’aro vau ’e ’ua ti’aturi au ē, hō’ē ’ōpuara’a tumu o tō’u orara’a, ’o te fa’atupura’a ïa i te mau mana’o teitei nō te orara’a ’utuāfare tei vauvauhia i roto i te poro’i nō ni’a i te ’utuāfare. Noa atu rā tā’u mau tauto’ora’a mau, e au ra ē, ’aita i ti’a iā’u ’ia fa’atupu i te reira mai tā’u i ti’aturi. E mea māuiui taua ’arora’a ra.

I taua taime ra, ’aita i ti’a iā’u ’ia ’ite i te ’ohipa temeio tā te Fatu e fa’atupu ra i roto i tō’u ’ā’au nā roto i taua ’arora’a ra.

’Ia hi’o ana’e au i muri, e ’ohipa mo’a tā tō’u mau hina’aro manuia ’ore i rave nō te fa’afāriu i tō’u ’ā’au i tō’u Fa’aora nō te ’imi i te hau ’e i te arata’ira’a ’o tāna ana’e e nehenehe e hōro’a ’e e fa’ahōhonu i tō’u ti’aturi i tōna here maita’i roa ’e te mana fa’atupu. ’Ua riro mai te pure ’e te tuatāpapara’a pāpa’ira’a mo’a i te mau mahana ato’a, ’e te mau parau iho ā rā o te ’āmuira’a rahi, ’ei taura fa’aora nō te ti’aturira’a ’e te arata’ira’a. ’Ua tupu mai te mana’o e fāriu i ni’a i te mau parau o tō’u ha’amaita’ira’a pātereāreha—’e te tahi atu mau ha’amaita’ira’a autahu’ara’a—nō te ’ite i te here ’e te arata’ira’a nō’u iho nō ’ō mai i tō’u Metua Mure ’Ore ra.

’A nīni’i ai au i tō’u ’ā’au i mua i te Fatu, noa atu ē, ’ua fa’ahemahia vau ’ia fāriu ’ē i roto i te ’ino’ino, ’ua tupu mai ra te mau mana’o mo’a i roto i tō’u ferurira’a ’e i roto i tō’u ’ā’au tei ha’apāpū mai iā’u ē, ’ua ’ite ’oia ē, tei hea vau, ’e e fa’anahora’a nehenehe tō tō’u orara’a, ’e e nehenehe ho’i tā’u e ti’aturi iāna. ’Ua riro mai te fafaura’a a³ tō’u Tāra’ehara ’ei niu nō te hau ’e te ’oa’oa rahi hau atu i te tahi atu mau rāve’a nō te tupu-maita’i-ra’a ’aore rā nō te ’oa’oa.

’Ite a’era vau ē, noa atu ’ua ti’aturi au ē, te ’ōpuara’a o tō’u orara’a o te fa’atupura’a ïa i tō’u mau moemoeā nō te ’utuāfare maita’i roa, ’ua fa’atupu te Fatu i te mea tā Elder Jeffrey R. Holland nō te pupu nō te Tino ’Ahuru Ma Piti ’āpōsetolo i pi’i te ’ōpuara’a tumu o te tahuti nei. Ma te fa’ahiti i te ari’i Beniamina, ’ua fa’ata’a mai ’oia : « Penei a’e te ’ōpuara’a tumu… ’o te rirora’a ïa ’ei ‘ta’ata mo’a nā roto i te tāra’ehara a te Mesia ra te Fatu’, ’o tē tītau ia tātou ’ia riro ‘mai te tamari’i ra te huru, te auraro, te marū, te haeha’a, te fa’a’oroma’i, te ’ī i te here, te hina’aro ’ia auraro i te mau mea ato’a tā te Fatu e hina’aro e tu’u i ni’a iāna, mai te tamari’i e auraro ho’i i tōna ra metua’ ».⁴

Nā tō’u hina’aro i te tauturu ’e te pūai o te Fa’aora i arata’i iā’u ’ia ’imi ’e ’ia ’ite i tōna ’ā’au auraro, te marū, te haeha’a, te fa’a’oroma’i ’e te here. I roto i taua ’ohipa ra, ’ua tauihia vau nā roto i tōna mana fa’atupu. ’E te parau mau, ’o te mea ïa tā’u i hina’aro rahi roa. Te mea ho’i i mana’ohia « e ’ere i te mea maita’i roa » nā te reira ïa i ’īriti i te ’ē’a nō te « maita’i roa » nehenehe a’e.

’Ua fa’ata’a mai tō’u hoa ’o Ty Mansfield i te hō’ē parau mau mai te reira te huru. ’Ei ta’ata tei ’ite i te fa’ahina’arora’a i te ta’ata o tōna iho ’āpeni, ’ua ’ite ’o Ty i te tupura’a pae vārua ’o tē nehenehe e tupu mai ’a tūtau ai tātou i tō tātou orara’a i roto ia Iesu Mesia ’e ’ia tu’u i tō tātou ’ā’au ato’a i mua iāna, ma te fa’ati’a iāna ’ia ha’amo’a i te mau ’itera’a fifi ato’a ’ei maita’i nō tātou. Nō Ty, ’ua ha’amata te reira i te taime ’a ha’api’i ai te Vārua iāna ē, « noa atu e fa’aipoipo vau, ’ua here-mau-hia vau ’e ’ua fāri’ihia e te Atua. Tā’u hōpoi’a ’o te tāmau-noa-ra’a ïa i te ora i te hō’ē mahana i te taime hō’ē ma te ’imi ’e ma te pe’e i te arata’ira’a a te Vārua ».⁵ ’E i te hope’a, nā roto i te ti’aturira’a i te Atua, ’ua arata’i te reira ia Ty ’ia tomo i roto i te hō’ē fa’aipoipora’a mure ’ore ’oa’oa, ’e te nehenehe, i tāna vahine.

Fa’atupu i te hō’ē tā’amura’a hōhonu a’e ’e te Fa’aora

I te pae hope’a ’ua fa’aipoipo-ato’a-hia vau i muri a’e i tō’u uiuira’a ē, e nā reira ānei au. Terā rā, ’ua vai tāmau noa te tītaura’a ’ia vai tūtau-hōhonu-noa-hia i ni’a ia Iesu Mesia, ’aore rā, ’ua mara’a, i te roara’a o te mau matahiti mai te taime a tā’atihia ai au i tā’u tāne fa’aipoipo. ’Ua ha’amata fa’ahou vau i te ’imi iāna nō te hau ’a ’aro ai au nō te ’orera’a e fānau. ’Aita vau i ’ite nāhea e nehenehe ai iā’u ’ia fāri’i i te ’oa’oa tā’u i ti’aturi i roto i te orara’a ’utuāfare ’aita e tamari’i. Terā rā, noa atu i muri a’e i te ha’amaita’i-ra’a-hia māua tā’u tāne nā roto i te fāri’ira’a e piti tamari’i, pinepine au i te rōtahi i ni’a i tō’u mau paruparu ’ei metua vahine. Noa atu ē, i te pae hope’a ’ua fāri’i au i te mea tā’u i hina’aro noa na i te mau taime ato’a, mai te huru ra ē, ’ua rahi fa’ahou atu te ārea i rōpū i te « maita’i roa » ’e « te ti’ara’a mau ».

’Ua tītau teie mau huru o te orara’a iā’u ’ia feruri fa’ahou i te mau ’ōpuara’a o te tāhuti nei ’e i te mau fa’anahora’a tei fa’ata’a-hanahana-hia nā roto ho’i i te reira tātou e tupu ai i te rahi. Penei a’e e ’ere te fā o te orara’a te noa’ara’a te ’utuāfare maita’i roa. Penei a’e ’aita ato’a te fāito maita’i roa e vai ra i te tāhuti nei. Penei a’e te ’utuāfare paha te hō’ē rāve’a nō te haerera’a i mua.

Inaha, pēnei a’e te ’ohipa mau tei riro ho’i ma te ’oto rahi, « ’ei mea iti a’e i te maita’i roa », tē fa’atupu nei te reira i te ’ōpuara’a mo’a nō te tītaura’a i te tupura’a i te rahi e tītauhia nō tātou, nō te ora i te mau tā’amura’a « maita’i ». Penei a’e tei roto te mana i te mea ē, te ārea rahi i rōpū i te mea mau ’e i te mea maita’i roa, tē ani mai nei te reira ia tātou ’ia tomo i roto i te hō’ē tā’amura’a hōhonu a’e ’e ’o Iesu Mesia, i reira ’oia e fa’aora ai ’e e ha’amo’a ai i te mea tei pararī, ma te ha’apuai fa’ahou i te pa’ari, te pūai ’e te here i roto i teie fa’anahora’a. Nā roto i tōna aroha ’e tāna fa’aorara’a, ’e tāna ana’e, e nehenehe tātou e riro mai i te huru ta’ata ma te tā’amura’a tā tātou e ’imi nei ’ia fāri’i i te ra’i.

Tē ti’aturi nei au ē e’ita te « maita’i-roa-ra’a » e tupu i roto i tō tātou mau tā’amura’a ’utuāfare, noa atu te ta’ata—i roto i teie orara’a. Terā rā, te ha’avare ’ore, te parau ti’a, ’e te fātatara’a mau, e tupu ïa te reira. ’Oia mau, te fa’ahuara’a ’aore rā te tīa’ira’a i te maita’i-roa-ra’a, e ha’afifi te reira i te ha’afātatara’a mau i te Atua, i tō tātou ’utuāfare ’e ia vetahi ’ē. Terā rā, mai te mea e fa’ati’a tātou ia tātou iho ’ia hi’ohia mai te au i tō tātou huru mau nā te Mesia, nā tō tātou mau ’utuāfare ’e nā vetahi ’ē, tae noa atu i roto i te mau mea ato’a « e ’ere i te mea maita’i roa », e nehenehe ïa tātou e ani i tōna mana ha’amo’a i roto i tō tātou orara’a. E nehenehe tātou e ’ite i tōna mana semeio nō te fa’afaite i te mau mea e ’ore e ti’a ’ia fa’a’āfaro, nō te fa’a’ī ia tātou i tōna here, ’e nō te taui ia tātou ’ei ta’ata e tā’amura’a hōhonu atu ā i ni’a iāna ’e i ni’a i tei herehia e tātou.

Penei a’e te ’ōpuara’a mo’a roa a’e o te poro’i nō ni’a i te ’utuāfare, ’o te ha’apāpūra’a ïa ia tātou ē, maoti Iesu Mesia, e nehenehe te ’utuāfare « maita’i roa » e riro ’ei hope’ara’a mure ’ore nō tātou tāta’itahi.

’Ei mau tamaiti ’e ’ei mau tamāhine here nā te mau metua i te ra’i ra, e ’utuāfare mure ’ore tātou pā’āto’a. E tuha’a faufa’a roa tō tātou ’itera’a fāito ’ore i te tāhuti nei nō te fa’anahora’a a tō tātou Metua nō te tauturu ia tātou ’ia haere i mua ’e « ’ia fa’atupu ho’i i [tō tātou] hope’a hanahana ’ei mau ta’ata ’āi’a nō te ora mure ’ore »⁶—te hō’ē ā orara’a ’utuāfare nehenehe tāna e ora nei, noa atu ē, mai te huru ē, e mea ta’a’ē te reira i te maita’i i tā tō tātou ’utuāfare e ora nei i teie nei. Mai tā Elder D. Todd Christofferson nō te pupu nō te Tino ’Ahuru Ma Piti ’āpōsetolo i parau ra : « ʼUa ʼite ātea, ’e i te pae hopeʼa, e fa’a’ore te tāraʼehara a Iesu Mesia i te mea tei ʼerehia ’e tei mo’ehia i te feiā tei fāriu atu iāna. ’Aore e ta’ata i fa’ata’a-ātea-hia ’ia fāri’i iti a’e i te mea ato’a tā te Metua i fa’aineine nō tāna mau tamari’i ».⁷

Mai tā te Fatu i fafau ia Iakoba i rotopū i te mau tāmatara’a o tōna ’utuāfare « tei iti mai te maita’i », te tāmarū mai nei tōna autā’atira’a fafau ia tātou, « tei pīha’i-ato’a-iho vau ia ’oe, ’e nā’u ’oe e tīa’i i tō ’oe nā mau haere’a ato’a, ’e e fa’aho’i mai ā vau ia ’oe i [te fare] ; e ’ore ho’i au e fa’aru’e ia ’oe e ’ia hope roa tā’u i parau ia ’oe i te fa’atupuhia e au ra » (Genese 28:15). ’Ia pe’e ana’e tātou iāna, noa atu te huru ti’a ’ore o tō tātou vaira’a mau ’e te tae ’ore i te fāito maita’i roa, e’ita ’oia « e vaiiho ia tātou ’ia haere ’ē », ē tae noa atu ’ua riro tātou i te mau mea ato’a ’o tā tātou e hina’aro ’ia riro, ma te tā’atihia i roto i te mau tā’amura’a ’utuāfare nō te ’oa’oa rahi ē a muri noa atu.