“Pōpoaki Toetuʻu ʻa e Kau Palesitenisī ʻUluakí,” Liahona, ʻEpeleli 2023.
Pōpoaki Toetuʻu ʻa e Kau Palesitenisī ʻUluakí
Ko Sīsū Kalaisi, ʻa e ʻAlo Tofu pē Taha ʻa ʻetau Tamai ʻofá, “ko e toetuʻu, mo e moʻui.” Naʻe ʻomi ʻe Hono ʻaloʻí, moʻuí, mo e pekiá ʻa e talaʻofa “ko ia ʻoku tui kiate aú, ka ne mate ia, ʻe moʻui pē ia” (Sione 11:25). ʻOku mau fakaafeʻi e taha kotoa he lolotonga e faʻahitaʻu Toetuʻu ko ʻení, ke fakalaulauloto ki he talaʻofa nāunauʻia ko ʻení. Koeʻuhí naʻá Ne maumauʻi e ngaahi haʻi ʻo e maté, ʻoku tau takitaha maʻu ai ʻa e fakapapau ʻo e moʻui taʻe-faʻa-maté mo e ʻamanaki lelei ki he moʻui taʻengatá.
ʻE lava ke ʻomi ʻe he feilaulau fakalelei maʻongoʻonga ʻa e Fakamoʻuí ha ʻamanaki lelei ki he fiefiá mo e nongá ʻo ʻikai ngata pē ʻi he moʻui ka hoko maí, ka ʻi he moʻuí ni pea ʻi he taimi ní foki, ʻi heʻetau fehangahangai mo e ngaahi faingataʻa pau ʻo e moʻuí. Pea koeʻuhí ko Ia, ʻoku tau ʻiloʻi ai ʻoku ʻikai ko e ngataʻangá ʻa e maté. ʻOku tau ʻilo he ʻikai ke tuputupuʻa hotau ngaahi faingataʻá. ʻOku tau maʻu ʻa e melinó ʻi heʻetau falala kiate Iá. ʻOku tau tui ʻoku malava ke maʻu ʻa e fiefia ʻoku taʻengatá.
ʻOku mau fakamoʻoni ʻoku moʻui ʻa hotau Fakamoʻui mo e Huhuʻi ko Sīsū Kalaisí. “[Naʻá ne fakaʻilongaʻi mo taki ʻa e halá]” ke tau foki ai ki heʻetau Tamai Hēvaní (“Naʻe Lahi Fau ʻa e ʻOfá,” Ngaahi Himí, fika. 105). ʻOku tau fakafetaʻi ko e meʻaʻofa ʻo Hono ʻAló, ʻa ia te tau lava ai ʻo taau ke maʻu ʻEne meʻaʻofa maʻongoʻonga tahá—ʻa ia ko e moʻui taʻengatá.
Ko e Kau Palesitenisī ʻUluakí