“Ko e Hā Ne u Fakahokohoko Fakamotuʻalea Ai e Ngaahi Hingoa Faingataʻa Tahá?,” Liahona, ʻEpeleli 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Hā Ne u Fakahokohoko Fakamotuʻalea Ai e Ngaahi Hingoa Faingataʻa Tahá?
Naʻe kamata ke u tangi ʻi he mahino kiate au ʻa e mahuʻinga taʻengata ʻo e ngāue naʻá ku fakahokó.
Laʻitā ne maʻu ʻi he angalelei ʻa e tokotaha naʻá ne faʻú
Hili ha konifelenisi lahi ʻi ha ngaahi taʻu siʻi kuohilí, ne u ongoʻi mo hoku uaifi ko Senifaá ʻoku fiemaʻu ke ma fai ha ngaahi liliu ʻi homa tuʻunga fakaākongá. Naʻá ma ongoʻi naʻe ueʻi ke ma fai ha meʻa lahi ange mei he tuʻunga lolotongá. Naʻe ʻikai ke ma fiemaʻu pē ha lolo ki heʻema māmá—ka naʻá ma fiemaʻu ha lolo lahi ange.
Ko e taha ʻo e ngaahi taumuʻa ne u fokotuʻu maʻakú ke ngāue tokoni lahi ange. Ne u fakakaukau ke fai e ngāue hisitōlia fakafāmilí, kau ai e fakahokohoko fakamotuʻaleá.
Ne u ʻiloʻi vave heheʻeku kamatá ko e ngaahi lekooti motuʻa tahá, ʻa ia ʻoku faingataʻa taha ke lau mo ʻiloʻí, ko e faingataʻa taha ia ke fakahokohoko fakamotuʻaleá. Ka ʻoku ou saiʻia he ngaahi polé, ko ia ne u fakakaukau ke kamata ʻi he ngaahi lekooti motuʻá.
Ka neongo ia, naʻe ʻikai fuoloa kuó u fifili pe ko e hā ne u fakahokohoko fakamotuʻalea ai e ngaahi lekooti faingataʻá ka ne u mei lava ʻo fakahokohoko fakamotuʻalea ha ngaahi hingoa lahi ange ʻo kapau ne u fakahokohoko fakamotuʻalea e ngaahi lekooti kimuí ni ne faingofua hono laú. Lolotonga ʻeku feinga ke lau pea mahino ha ngaahi lekooti mali faingataʻá, ne langa hoku ʻulú.
“Ko e hā ʻoku ou ngāue ai ki he ngaahi lekooti faingataʻa tahá?” Ne u fehuʻi loto pē kiate au.
ʻI he meimei taimi pē ko iá, naʻá ku ongoʻi ha kiʻi leʻosiʻi ʻoku pehē mai, “Mālō.”
Hili ha lau sekoni mei a, naʻe telefoni mai ʻa Senifā ke vakaiʻi e tuʻunga ʻoku ʻi ai ʻeku fakahokohoko fakamotuʻaleá.
Naʻá ne fehuʻi mai, “Ko e hā ʻokú ke fakahokohoko fakamotuʻalea he taimi ní?”
Naʻá ku tali ange, “ʻOku ou ngāue ki he ngaahi lekooti motuʻa tahá.”
Naʻá ne pehē mai, “ʻOkú ke ʻiloʻi ko e faingataʻa tahá ena. Ko e hā ʻokú ke fai ai iá?”
Naʻá ku ongoʻi ʻoku ou toe maʻu ha loto-houngaʻia. Naʻe tatali ʻa e kakai naʻá ku fakahokohoko fakamotuʻaleá ʻi ha taʻu ʻe tahaafe tupu ke fakahoko ʻenau ngāue fakatemipalé. Hangē pē ko ʻeku fiefia koeʻuhí kuó u maʻu hoku ngaahi ouau fakamoʻuí ʻi he temipalé, ʻoku nau fiemaʻu foki ke nau maʻu e fiefia tatau. ʻOku malava ia ʻe hono fakahokohoko fakamotuʻalea ʻo e ngaahi hingoá he ʻoku tokoni ia ki he kakaí ke nau fekumi ki heʻenau ngaahi kuí ʻi he ʻinitanetí. Ko e fakahokohoko fakamotuʻaleá ko ha ʻuluaki sitepu ia ki hono teuteuʻi ʻo e ngaahi hingoá ki he temipalé.
Naʻe kamata ke u tangi ʻi he mahino kiate au ʻa e mahuʻinga taʻengata ʻo e ngāue naʻá ku fakahokó. Kuo tokolahi ha kakai kuo nau tatali fuoloa ki honau ngaahi tāpuaki fakatemipale. ʻOku ou ʻilo ʻoku fiemaʻu ke tau tokoni kiate kinautolu ʻo tatau ai pē pe ko e hā hono faingataʻa ʻo e ngāué.