“Te Tau Fakahaaʻi Fēfē ʻa e ʻAloʻofá ʻo hangē ko e Fakamoʻuí?,” Liahona, ʻEpeleli 2023.
Haʻu, ʻo Muimui ʻIate Au
Te Tau Fakahaaʻi Fēfē ʻa e ʻAloʻofá ʻo hangē ko e Fakamoʻuí?
Fefine naʻe Moʻua ʻi he Tono Tangatá, tā fakatātā ʻa Harry Anderson, laiseni mei he GoodSalt.com
ʻI he taimi naʻe ʻomi ai ʻe he kau tangata tohí mo e kau Fālesí kia Sīsū Kalaisi ha fefine naʻe moʻua ʻi he tonó, naʻa nau fehuʻi ange pe ʻoku totonu ke tolomakaʻi ia ʻo fakatatau ki he fono ʻa Mōsesé. Ka naʻe ʻaloʻofa ʻa Sīsū kiate ia, ʻo Ne folofola, “Pea ʻoku ʻikai te u fakahalaia koe: ʻalu pea ʻoua ʻe toe faiangahala” (Sione 8:11). Naʻe ʻikai fakahalaiaʻi ia ʻe Sīsū, pe te Ne fakaoleoleʻi ʻene ngaahi tōʻongá. Te tau lava ʻo fakahaaʻi e manavaʻofá lolotonga ʻetau taukaveʻi ʻetau tuí, ʻo hangē pē ko Iá.
Ko ha ngaahi tefitoʻi moʻoni ʻeni ʻe niʻihi ʻe lava ke akoʻi mai ʻe he sīpinga ʻa Kalaisí fekauʻaki mo e founga feohi mo e kakai ʻoku fehangahangai ʻetau tōʻonga moʻuí:
-
ʻOku ʻikai fiemaʻu ia ke tau fai ha meʻa he taimi pē ko iá (vakai, Sione 8:6). ʻE lava ke tokoni hono tuku ha taimi ke tau fakakaukau ai ki heʻetau talí, ke tau fakahaaʻi ʻetau ngaahi fakakaukaú ʻi he manavaʻofa lahi ange.
-
Naʻe tatali ʻa Sīsū kae ʻoua kuo mavahe ʻa e kau tukuakiʻí kimuʻa peá Ne akoʻi ʻa e fefiné (vakai, Sione 8:9). ʻOku ʻikai fiemaʻu ia ke fakahāhā ʻete meʻa ʻoku faí pe fakamaaʻi ʻa e niʻihi kehé.
-
ʻOku fiemaʻu ke tau ʻoange ha taimi ki he kakaí ke nau liliu ai. Naʻe pehē ʻe Palesiteni Tāleni H. ʻOakesi, Tokoni ʻUluaki ʻi he Kau Palesitenisī ʻUluakí, “Naʻe ʻoange ki he fefine naʻe moʻua ʻi he tonó ha taimi ke ne fakatomala ai, ʻa e taimi naʻe mei fakaʻikaiʻi ʻe kinautolu naʻa nau loto ke tolomakaʻi iá.”1
-
Akoʻi ʻa e moʻoní kae tuku pē ki he niʻihi kehé ke nau fili. “ʻOku totonu ke tau fakahā pē ʻa e meʻa ʻoku tau ʻiló mo e meʻa ʻoku tau tui ki aí pea fakaafeʻi e niʻihi kehé ke nau muimui ʻi he Fakamoʻuí, kae ʻoua ʻe fakahalaiaʻi e niʻihi kehé. Ko honau faingamālie ia ʻonautolu ke fili ʻa e moʻoní, kae ʻikai ko haʻatautolú ke fakamālohiʻi.”2