Tui kia Sīsū Kalaisí

Ko e ʻuluaki tefitoʻi moʻoni ʻo e ongoongoleleí ko e tui kia Sīsū Kalaisí (vakai, Ngaahi Tefito ʻo e Tui 1:4). ʻE tokoni ʻetau tuí ke tau fai e ngaahi fili te ne tataki kitautolu ki heʻetau Tamai Hēvaní. Te tau lava ʻo ngāue ke fakamālohia ʻetau tuí ʻi he kotoa ʻo ʻetau moʻuí.

Ko e Hā ʻa e Tuí?

Ko e tuí ko ha tui mālohi pe falala ki ha meʻa. ʻOku kau ʻi he maʻu ʻo e tuí ʻa e ʻamanaki lelei mo e tui ki he ngaahi meʻa ʻoku moʻoní, ʻo aʻu pē ki he taimi ʻoku ʻikai ke tau lava ai ʻo sio ki ai pe maʻu ha mahino kakato ki aí (vakai, Hepelū 11:1; ʻAlamā 32:21).

Fakaikiiki mei he Kalaisi mo e Talavou Koloaʻiá, tā ʻa Heinrich Hofmann

Tui ʻOku Fakatefito ʻia Sīsū Kalaisí

Ke tataki ki he fakamoʻuí, kuo pau ke fakatefito ʻetau tuí ʻia Sīsū Kalaisi ko hotau Fakamoʻui mo e Huhuʻí. ʻOku ʻuhinga ʻa e tui kia Kalaisí ke maʻu ha loto-falala kiate Ia. ʻOku ʻuhinga ia ke falala kakato kiate Ia—ʻo falala ki Hono mālohí, potó, mo e ʻofá. ʻOku kau foki ai ʻa e tui mo muimui ki Heʻene ngaahi akonakí.

Fakatupulaki ʻEtau Tuí

Ko e tuí ko ha meʻaʻofa ia mei he ʻOtuá, ka kuo pau ke tau fekumi ki ai pea ngāue ke tauhi ia ke mālohi. Te tau lava ʻo fakatupulaki ʻetau tuí ʻaki ʻetau lotu mo ako ʻa e folofolá mo e ngaahi akonaki ʻa e kau palōfita ʻo e ngaahi ʻaho kimui ní. ʻOku tau toe fakamālohia foki ʻetau tuí ʻi heʻetau moʻui angatonu mo tauhi ʻetau ngaahi fuakavá.

Moʻui ʻi he Tuí

Ko e tuí ʻoku mahulu hake ia ʻi he tui peé. ʻOku kau ai hono ngāueʻi ʻo e tui ko iá. ʻOku tau fakahaaʻi ʻetau tuí ʻi heʻetau tōʻonga moʻuí. ʻOku fakaʻaiʻai kitautolu ʻe he tui kia Sīsū Kalaisí ke tau muimui ʻi Heʻene sīpinga haohaoá. ʻOku hanga ʻe heʻetau tuí ʻo tataki kitautolu ke tau talangofua ki he ngaahi fekaú, fakatomala mei heʻetau ngaahi angahalá, pea fakahoko mo tauhi e ngaahi fuakavá.

ʻE Lava ke Iku ʻa e Tuí ki ha Ngaahi Mana

ʻOku ʻomi ʻe he tui moʻoní e ngaahi mana, kau ai ha ngaahi vīsone, misi, fakamoʻui mahaki, mo ha ngaahi meʻafoaki kehe ʻoku maʻu mei he ʻOtuá. ʻOku ʻi he folofolá ha ngaahi talanoa lahi ʻo ha kakai naʻa nau maʻu ha ngaahi mana mei he ʻEikí koeʻuhí ko ʻenau tui kiate Iá. Vakai ki he “Maná” ʻi he Fakahinohino ki he Folofolá ki ha ngaahi sīpinga.

ʻE Lava ke ʻOmi ʻe he Tuí ʻa e Nongá

ʻE lava ke fakamālohia kitautolu ʻe he tui ki he ʻOtuá mo ʻEne palani ʻo e fakamoʻuí ke fakamālohia kitautolu lolotonga ʻetau ngaahi faingataʻaʻiá. ʻE lava ʻe he tuí ʻo ʻomi ha ivi ke tau laka ki muʻa mo fehangahangai mo hotau ngaahi faingataʻá ʻi he loto-toʻa. Naʻa mo e taimi ʻe hā ngali taʻepau ai e kahaʻú, ʻe lava ʻe heʻetau tui ki he Fakamoʻuí ʻo ʻomi ha nonga.

ʻOku Fakaiku ʻa e Tui kia Sīsū Kalaisí ki he Fakamoʻuí.

ʻE iku hono ngāue ʻaki e tui kia Kalaisí ki hotau fakamoʻuí. Kuo teuteu ʻe Kalaisi ʻa e hala ke tau maʻu ai ʻa e moʻui taʻengatá. ʻI heʻetau moʻui ʻaki ʻetau tui kiate Iá, ʻe lava ke fakamolemoleʻi ʻetau ngaahi angahalá pea toe foki ʻo nofo fakataha mo e ʻOtuá.