“Ko Homau Kaungāʻapi Leleí,” Liahona, ʻEpeleli 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Homau Kaungāʻapi Leleí
ʻI he ʻaho naʻá ku fiemaʻu tokoni aí, naʻe tali ai ʻe ʻEletā Lāsolo M. Nalesoni ha ueʻi fakalaumālie peá ne haʻu ʻo tokoniʻi au.
Tā fakatātā ʻa Dilleen Marsh
ʻI heʻeku hiki mo hoku fāmilí ʻo nofo mo ʻeku faʻē-ʻi he-fonó ka ko e uitou ko ʻEfi Tiini Lisí, ko e taha homau kaungāʻapi hoko maí ko ʻEletā Lāsolo M. Nalesoni, ʻa ia naʻe ui ki he Kōlomu ʻo e Kau ʻAposetolo ʻe Toko Hongofulu Mā Uá ʻi he ngaahi taʻu siʻi kimuʻá.
Lolotonga e taimi ne mau kaungāʻapi aí, naʻá ma fiefia ke tokoni kia ʻEletā Nalesoni mo hono ʻuluaki uaifi ko Tenisoló ʻi heʻena ngaahi ngāué, pea naʻá na fiefia ke tokoniʻi kimautolu ʻi heʻemau ngāué. Naʻe kau ai hono liliu ha fakatafenga vai he konga ki mui homau ʻapí ki ha feituʻu fakaʻofoʻofa ʻoku holisi sima pea ʻi ai mo ha ngaahi halanga luelue, sitepu, mo e ngoue. ʻI he taimi naʻe mamaʻo ai ʻa ʻEletā Nalesoni ʻi ha ngāue faka-Siasí, ne mau tokoni kia Sisitā Nalesoni ʻi ha meʻa pē te ne fiemaʻu.
ʻI he ʻosi ʻemau ngāue ki he fakatafenga vaí, ne kole mai ʻe hoku ʻilamutú mo hono hoá ke fai ʻena malí ʻi he fakatafenga vaí mo e ngoué. Naʻá na palani ke omi ʻo tokoni ke fakaʻosiʻosi e fakamāú kimuʻa pea fai e polokalamá.
Ka naʻe vave e ʻalu ʻa e taimí. Naʻá na femoʻuekina pea ʻikai lava ke na haʻu. ʻI he ʻaho ʻoupeni hausí, naʻá ku ʻā hake ʻi he 6:00 a. m. mo e ongoʻi ʻiteʻita. Naʻá ku tuʻu hake, toʻo ʻeku kané mo e meʻa kosí, peá u hifo ʻi he sitepu ʻe 58 ki he fakatafengá. ʻI heʻeku ʻauhani e ʻakau ko e ʻaiví (English ivy) ʻa ia ne totoló mo kaka hake he sitepú, ne u ongoʻi fiemālie. ʻI he 8:00 a.m. nai, ne u fanongo ki ha kosi ʻi he toumuʻá. Naʻá ku kiʻi mālōlō ke vakai pe ko e hā e meʻa ʻoku hokó.
ʻI heʻeku aʻu atu ki he toumuʻá, kuo ʻosi kosi mai ʻe ʻEletā Nalesoni ʻa e musie ʻi hono toumuʻá pea ʻokú ne lolotonga kosi ʻeni hoku toumuʻá.
Naʻá ku talaange, “ʻOku ʻikai fiemaʻu ia ke ke fai ena.”
Naʻá ne tali mai, “ʻIo, Kalānite, ʻoku fiemaʻu ia ke u fai ʻeni maʻau he ʻahó ni.”
Naʻe ʻiloʻi ʻe ʻEletā Nalesoni ʻa e founga ke fanongo ai ki he Tamai Hēvaní. ʻI he ʻaho ko iá, naʻe ʻafioʻi ʻe he ʻOtuá ne u fiemaʻu ha tokoni.
Naʻe hanga ʻe he aʻusia ko iá ʻo liliu au. Hili iá, ʻi heʻeku lotu mo hoku uaifí he ʻaho takitaha, naʻe kamata ke ma kole ke fakahā mai ha niʻihi ʻoku mau feohi ʻoku nau fiemaʻu ʻema tokoní.
ʻI he ngaahi taʻu kimuʻá, lolotonga ha faʻahitaʻu kehe, naʻe ʻalu ai ʻeku tamai-ʻi he-fono ko Sione P. Lisí ke tata e sinoú mei he lueʻangá. Ka naʻe ʻosi fai ia ʻe ʻEletā Nalesoni. Naʻe foki ʻa Sione ki loto ʻo faʻu ʻa e foʻi maau ko ʻení:
Kuó u mātā ha malanga kuo tongi ʻi ha maka
Mo e malanga ʻi ha ngaahi matalaʻiʻakau
Malanga ne nounou
Malanga ne fuoloa fau
Ka kuó u toki mamata ʻi ha malanga
Naʻe fai ʻaki ʻa e ngāué
Ne fakahaaʻi haohaoa mai ai
ʻA e founga ke hoko ai ko ha kaungāʻapi leleí
ʻOku mau kei houngaʻia ai pē ko homau kaungāʻapi leleí