“Naʻe Liliu Hoku Mamahí ki he Loto-Houngaʻiá,” Liahona, ʻEpeleli 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Liliu Hoku Mamahí ki he Loto-Houngaʻiá
Naʻá ku tangi ki he ʻEikí ʻi he loto-vivili mo e mamahi lahi. Naʻá Ne tali ia ʻi Heʻene ʻaloʻofá.
Laʻitā ne maʻu ʻi he angalelei ʻa e tokotaha naʻá ne faʻú
ʻI Sepitema 2021, naʻe mālōlō ai homa foha siʻisiʻi taha ko Sioó, hili haʻane moʻui ʻi ha māhina pē ʻe ua. Neongo ʻa e ngaahi lotú, ʻaukaí, ngaahi tāpuaki ʻo e lakanga fakataulaʻeikí, pea mo e ngāue kāfakafa ʻa e kau toketā lelei taha ʻi he māmaní, ka naʻe ʻikai fakangofua ia ʻe he sino ʻo Sioó ke ne moʻui.
Lolotonga e ngaahi momeniti fakaʻosi ʻo e moʻui ʻa Sioó, naʻá ku fua ia mo hoku uaifí. ʻI heʻeku sio ki heʻene mihiʻi fakaʻosi ʻene mānavá, naʻe lavea hoku lotó. Naʻá ku tangi ki he ʻEikí ʻi he loto-vivili mo e mamahi lahi. Naʻá Ne tali ia ʻi Heʻene ʻaloʻofá.
Naʻe fetongi leva ʻeku mamahí ʻaki ha ongoʻi houngaʻia lahi ʻa ia ʻoku faingataʻa ke u fakamatalaʻi. Ne u ongoʻi lōmekina ʻi he fakafetaʻi ʻi hono foaki mai ʻe he ʻEikí kiate au ha uaifi fakaʻofoʻofa, fānau fakaʻofoʻofa ʻe toko fā, mo ha ngaahi fuakava ʻokú ne haʻi kinautolu kiate au ʻo taʻengata. Naʻá ku ongoʻi tatau mo ʻAlamā ko e Siʻí ʻi he taimi naʻá ne aʻusia ai ʻa e fiefiá ʻo tatau mo e mamahi naʻá ne ongoʻi kimuʻá (vakai, ʻAlamā 36:20).
ʻI heʻeku loto-houngaʻia ki he ʻEikí, ne u maʻu ha ongo fakalaumālie mālohi. Naʻe tokoni e mamahi ne u ongoʻi ʻi he mālōlō hoku fohá ke u houngaʻia ʻi he mamahi naʻe ongoʻi ʻe he Tamai Hēvaní ʻi he taimi naʻe pekia ai Hono ʻAló maʻakú, pea mo e toenga ʻo e fānau ʻa e ʻOtuá he taʻu ʻe uaafe kuo hilí. Koeʻuhí naʻe pekia ʻa Sīsū Kalaisi maʻatautolu, ʻoku ou ʻilo te u toe mamata ki hoku fohá.
ʻI ha kiʻi founga siʻi, naʻe mahino lelei ange kiate au ʻa e feilaulau naʻe fai ʻe he Tamai Hēvaní mo Hono ʻAló. Naʻá ku toe ongoʻi houngaʻia ʻi he ʻofa lahi ʻa e ʻOtuá.
Lolotonga e taimi hili e mālōlō homa fohá, kuó u faʻa fakakaukau ki he meʻa ne u ongoʻi he ʻaho ko iá. Kuo liliu au ʻo taʻengata ʻe he loto-mamahí, loto-houngaʻiá, mo e ngaahi ongo fakalaumālie mālohí. Te u lava ʻo fakamoʻoniʻi moʻoni ʻoku ʻomi ʻe he ngaahi ʻahiʻahi ʻo e moʻuí ha aʻusia pea ʻe hoko ia ʻo ʻaonga maʻatautolu (vakai, Tokāteline mo e Ngaahi Fuakava 122:7) ʻo kapau te tau tuku ke kau ʻa e ʻEikí ʻi heʻetau moʻuí pea pikitai ki heʻetau tui ki he Fakamoʻuí mo ʻEne Fakaleleí.