Tu ena Siga Koya ena Vuku i Karisito

Mai vei Sisita Amy A. Wright

iMatai ni Daunivakasala ena Mataveiliutaki Raraba ni Lalai

O Jisu Karisito ena cakava meda rawa ni “tu ena siga koya .”

E dua na siga sinai ena vosa vakatautauvata ka dodonu, taro dredre, kei na ivunau titobu. Ni oti Nona vosataki ira era vaka “na veivale ni bulubulu sa boro vulavula, sa rairai vinaka e taudaku, ia e loma sa sinai ena sui ni mate, kei na ka kecega sa velavela,”¹ a vakavulica tale o Jisu e tolu na vosa vakatautauvata me baleta na vakavakarau vakayalo kei na bula vakatisaipeli. Edua vei iratou oqo sai koya na vosa vakatautauvata me baleta e le tini na goneyalewa.

“Ena qai vakatautauvatataki na matanitu vakalomalagi kei na goneyalewa e lewe tini, eratou sa dui kauta na nona cina, ka laki veitata kei na tagane sa qai vakawati.

“Ka lewe lima vei iratou sa vuku, ka lewe lima sa lialia.

“O iratou na lialia eratou sa kauta na nodratou veicina, a ratou sa sega ni kauta vata kei na waiwai:

“Ia ko iratou na vuku eratou sa kauta na waiwai ena nodratou tavaya kei na nodratou cina.

“Ia, ni sa dede mai na tagane sa qai vakawati, eratou sa sosovu kecega ka moce.

“Ni sa qai lomaloma-ni-bogi na vanua, sa ia na kacikaci, Raica sa lako mai na tagane sa qai vakawati, dou laki veitatavaki kaya.

“Eratou sa qai tucake kecega na goneyalewa oqo, a ratou sa vakarautaka na nodratou cina.

“A sa kaya ko iratou na lialia vei iratou na vuku, Solia mai vei keitou e dua na nomudou waiwai; ni sa boko na neitou cina.

“A sa kaya ko iratou na vuku, De se sega ni takiveilevu vei keda: e vinaka mo dou lako ga vei ira na dauveivoli, ka volia na nomudou.

“Ia ni ratou sa lako me ratou volivoli, sa tadu mai na tagane sa qai vakawati; ia ko iratou sa vakarau oti tu, e ratou sa curu vata kaya kina kana magiti ni vakawati: a sa qai sogo na katuba.

“Sa qai lako tale ga mai emuri ko iratou na goneyalewa ko ya, ka kaya, Noqu Turaga, Noqu Turaga, dolavi keitou.²

“A sa vosa ko koya ka kaya, Au sa kaya vakaidina vei kemudou, Dou sa sega ni kilai Au.³

“O koya mo dou vakatawa, ni dou sa sega ni kila na siga se na tiki-ni-siga sa lako mai kina na Luve ni tamata.”⁴

Peresitedi Dallin H. Oaks a taroga na veitaro vakavure-vakasama oqo me baleta na nona lako mai na Tagane sa qai vakawati:⁵ “E vakacava ke lako mai o Koya ni mataka? Kevaka eda sa kila tiko nida na sota kei na Turaga ni mataka—ena noda matedole se ena Nona lako mai sega ni namaki—na cava eda na cakava nikua?”⁶

Au sa vulica mai na veika au sotava ni vakavakarau vakayalo me baleta na lako mai ni Turaga e sega walega ni bibi sara ia e sala duadua ga me kunei kina na vakacegu kei na marau dina.

Ena dua na siga totoka ni vula i mago au rogoca taumada kina na veivosa oqo “Sa tiko vei iko na kenisa.” Keirau a kurabui vakaveiwatini! Ni keirau gole yani ivale ena vakanomodi, ka vakananuma na itukutuku oqo, e gole na yaloqu vei iratou na luve i keirau tagane.

Ena noqu vakanananu au taroga na Tamada Vakalomalagi, “Au sa na mate beka?”

E vakasolokakana na Yalo Tabu, “Ena VINAKA na veika kece.”

Au qai taroga, “Au na bula beka?”

E lako tale mai na kena isau, “Ena VINAKA na veika kece.”

Au veilecayaki. Na cava e tautauvata tiko ga kina na isau ni taro seu bula seu mate?

Vakasauri au sa vakasinaiti ena vakacegu ka vakananumi au: Ni sega ni gadrevi me keirau vakatotolo ivale me vakavulici iratou na luvei keirau ena ivalavala ni masu. Eratou sa kila tiko na sala ni kena dau ciqomi na isaunitaro kei na veivakacegui mai na masu. E sega ni gadrevi me keirau vakusakusa i vale me vakavulici iratou me baleta na ivolanikalou se na nodra vosa na parofita bula. Na veivosa oqori era sa kilai tu nira sa ivurevure ni kaukauwa kei na kila. E sega ni gadrevi me keirau vakusakusa ivale me vakavulici iratou me baleta na veivutuni, na Tucaketale, na Veivakalesuimai, na yavu ni veivakabulai, vuvale tawamudu, se na ivunau sara ga i Jisu Karisito.

Ena gauna oya na veilesoni kece ni lotu vakavuvale, na soqoni ni vuli ivolanikalou, na masu ena vakabauta ka dau cabori, na veivakalougatataki a soli, na ivakadinadina a wasei, na veiyalayalati a caka ka maroroi, na tiko ena vale ni Turaga, kei na Siga ni Vakacecegu a vakatabui—io, yaga vakaidina! Sa sega ni kena gauna oqo me vakatawani kina na neitou i cina ena waiwai. Keitou gadreva na veituru yadua, ka gadreva sara ga ena gauna oqo!

Ena vuku i Jisu Karisito kei na Nona Kosipeli vakalesui mai, keu mani mate, eratou na vakacegui na noqu matavuvale, vakaukauwataki, ka na tiko vata tale ena dua na siga. Keu na bula, au na rawa ni rawata na kaukauwa levu duadua ena vuravura oqo meu vukei, tokoni, ka vakabulai kina. Ena kena itinitini, ena vuku i Jisu Karisito, sa na rawa ni VINAKA kina na veika kece.

Keitou vulica mai na vulici matua ni Vunau kei na Veiyalayalati se cava na ibalebale ni sa “VINAKA”:

“Ia ena siga ko ya, niu sa lako mai ena noqu lagilagi, sa na qai vakayacori na vosa vakatautauvata kau a tukuna me baleti iratou na goneyalewa savasava e le tini.

“Ia ko ira sa yalomatua ka vakabauta na dina, ka ra sa taura na Yalo Tabu me nodra idusidusi, ka ra qai sega ni rawai—au sa kaya vakaidina vei kemudou, era na sega ni tamusuki sobu ka biu ki na bukawaqa, raica era na tu ena siga ko ya.”⁷

O Jisu Karisito ena cakava meda rawa ni “tu ena siga koya .” Na tu ena siga oya e sega ni kena ibalebale meda vakuria na lisi ni veika-me-caka ka sa tubu-tiko ga na kena levu. Vakasamataka mada edua na iloilo ni vakalevutaki ka. E sega ni kena inaki vakatabakidua ga me vakalevutaka na irairai ni dua na ka. E rawa tale ga ni kumuna vata na rarama me tosoi cake kina na kena kaukauwa. E gadrevi meda vakarawarawataka, ka vakanamatataka na noda sasaga, ka kumuna vei keda na Rarama i Karisito. Eda gadreva e levu na veika savasava ka tiko kina na ivakatakila.

E tiko ena vua-i-ra kei Isireli edua na iyatu ulunivanua totoka ka dau vakatokai me “ulunivanua bulabula.” Na Ulunivanua o Carmel⁸ e dau drokadroka tu ga ena loma ni yabaki taucoko ka vu vakalevu mai na lutu ni tegu. Na veivakani e yaco e veisiga. Me vaka “na tegu mai Carmel,”⁹ nida sasaga me vakania na yaloda “ena veika ni bula dodonu,”¹⁰ “ na veika lalai ka rawarawa,”¹¹ na noda ivakadinadina kei na nodra na luveda ena bulabula!

“Ia, o na vakasamataka beka, “I Sisita Wright , o iko o sega ni kila na noqu matavuvale. Keitou sotava dina tiko na dredre ka sega ni tautauvata kei na kena dou sotava tiko.” O dina sara. Au sega ni kila na nomu matavuvale. Ia edua na Kalou tawayalani na Nona loloma, veivosoti, kaukauwa, kila ka, kei na lagilagi e kila.

Na taro beka ona taroga tiko era taro mai na vuniyalo e dau vakavuna na lomaleqa. Na veitaro vakaoqo era kunei ena ivolanikalou tabu:

“Vakavuvuli, ko sa wele beka ga ni sa mate [na noqu matavuvale?”¹²

“Sa evei na ka meu nuitaka ?”¹³

“A cava [meu] kitaka me kau tani kina na o loaloa ka vakaruguti [au] tu oqo ?”¹⁴

“Ia sa kune maivei na vuku? ka sa evei na yasana ni yalomatua?”¹⁵

“E rawa vakaevei [meu] taura matua na veika vinaka kecega?”¹⁶

“Kemuni na Turaga, a cava ko ni sa vinakata meu cakava?”¹⁷

Ka qai yaco mai ena yalo ni loloma levu na kedra isau:

“Ko sa vakabauta li na kaukauwa i Karisito sa yaco kina na veivakabulai?”¹⁸

Raica, sa vakarota li e dua na Turaga me kakua ni vakaivotavota mai na nona vinaka?”¹⁹

“Drau sa vakadinata ni sa cakava rawa [o Koya] na ka oqo?”²⁰

“Oni sa vakadinati ira na parofita?”²¹

“Ko ni sa vakabauta tiko li na nona veisereki ko koya ka a buli kemuni?”²²

“Ena sega li ni caka dodonu ko Koya sa lewai vuravura kecega?”²³

Kemuni na noqu itokani lomani, eda na sega ni rawa ni wasea na noda waiwai, ia eda rawa ni wasea na Nona rarama. Na waiwai ena noda cina ena sega walega ni vukei keda meda “tu ena siga koya” ia ena rawa tale ga ni sala me vakararamataki kina na sala me tuberi ira eda lomana vua na iVakabula, ka sa tu vakarau tu “me dodoka yani na ligana me ciqomi” ira.²⁴

“Sa kaya vakaoqo ko Jiova; Mo kinoca na domomu, mo kakua ni tagi; ka me kakua ni vakawai na matamu: ni na saumi ga na nomu cakacaka, … ia era na lesu tale mai na vanua ni meca.

“Ia sa tu na ka mo vakanuinuitaka ena nomu gauna emuri, sa kaya ko Jiova, nira na lesu tale mai na luvemu ki na nodra i yalayala.”²⁵

O Jisu Karisito e “inuinui ena nomu gauna emuri.” E sega ni dua na ka eda cakava se sega ni cakava e uasitvita na Nona veisorovaki tawayalani ka tawamudu. O Koya na vuna e sega ni mai cava kina na keda italanoa.²⁶ O koya gona “sa kilikili mo dou toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega. O koya, kevaka [eda] sa toso ki liu, ka kana magiti ena vosa i Karisito, ka vosota me yacova na ivakataotioti, raica, sa kaya na Tamada: [Eda] na rawata na bula tawamudu.”²⁷

Na bula tawamudu e reki tawamudu. Reki ena bula oqo, ena gauna sara ga oqo—ena vuku ni veibolebole eso ni noda siga kei na veivuke ni Turaga meda vuli mai kina ka qai rawai ira—ka reki tawavakaiyalayala ena bula sa bera mai. Ena tavoi na wainimata, vakabulai na yalo kavoro, ena kunei na ka sa yali, wali na kauwai eso, vakalesuitale mai na matavuvale, kei na ka kecega sa tu vei Tamada ena noda.²⁸

Mo rai vei Jisu Karisito mo bula kina²⁹ sa noqu ivakadinadina ena yaca tabu ka savasava ni “iVakatawa ka Bisopi ni [yaloda]” daulomani,²⁹ ko Jisu Karisito, emeni.

iDusidusi

1. Maciu 23:27.

2. Maciu 25:1–11.

3. Vakadewa nei Josefa Simici, Maciu 25:11 (ena Maciu 25:12, footnote a).

4. Maciu 25:13.

5. O Elda James E. Talmage a vakavulica: “Ko Jisu Karisito sai koya na Tagane sa qai Vakawati; na kana magiti ni vakamau e vakatakarakarataka na Nona lako mai ena lagilagi, me ciqoma vei Koya na Lotu ka tiko e vuravura me Watina. O iratou na goneyalewa e vakatakarakarataki ira era tusanaka nira vakabauti Karisito, o koya gona era nanamaki kina ena lomadei mera na okati vata kei ira era kalougata me vakaitavi ena kana magiti. Na itutu ni cina caudre, ka ratou a yadua kece tu na goneyalewa, e ivakaraitaki e taudaku ni vakabauta kei na itovo va-Karisito; kei na waiwai ka ratou a maroroya tu na goneyalewa vuku eda na raica kina na kaukauwa vakayalo kei na rawa-ka, ka dau vakadeitaki duadua ga mai na gugumatua kei na yalodina ena veiqaravi vua na Kalou” (Jesus the Christ [1916], 578–79).

6. Dallin H. Oaks, “Preparation for the Second Coming,” Liahona, May 2004, 9.

7. Vunau kei na Veiyalayalati 45:56–57; vakamatatataki.

8. “Na lutu ni tegu edau solia na wai veirauti ena gauna mada ga ni vula i katakata mamaca, ka yaga vakalevu sara vei ira na itei ni vula ikatakata me vaka na meleni. Na voleka ga ni vanua ki waitui, na kena rawa me na lutu na tegu ena veibogi ka dau maravu kina na cagi, ena gauna e batabata cake kina na qele mai na cagi e dela ni qele. Vakararaba, na Buca ki Matasawa e dau levu cake kina na tegu mai na yasayasa vaka ki na loma ni vanua; ka levu duadua e dau lutu ena Ulunivanua o Carmel, ka rauta ni 250 na bogi ena dua na yabaki” (Efraim Orni kei Elisha Efrat, Geography of Israel, 3rd rev. ed. [1971], 147).

9. Vunau kei na Veiyalayalati 128:19.

10. Mosaia 23:18.

11. Alama 37:6.

12. Marika 4:38.

13. Jope 17:15.

14. Ilamani 5:40.

15. Jope 28:12.

16. Moronai 7:20.

17. Cakacaka 9:6.

18. Alama 15:6.

19. 2 Nifai 26:28.

20. Maciu 9:28.

21. Cakacaka 26:27.

22. Alama 5:15.

23. Na iVakatekivu 18:25.

24. Momani 6:17.

25. Jeremaia 31:16–17; vakabibitaki.

26. Raica na Camille N. Johnson, “Sureta na Karisito me Vola na Kemu iTalanoa,” Liaona, Nove. 2021, 82: “Laiva na veika dredre kei na ka rarawa ka ra sa tiki ni vei italanoa vinaka yadua, me sala ni nomu voleka sara, ka mo vakataki Jisu Karisito vakalevu cake.”

27. 2 Nifai 31:20.

28. Raica na Vunau kei na Veiyalayalati 84:38.

29. Raica na Alama 37:47.

30. 1 Pita 2:25.