Yalomalumalumu mo Ciqoma ka Muria

Mai vei Elder Joni L. Koch

Ena Vitusagavulu

Na yalomalumalumu e tiki bibi ni noda vakarautaki keda meda lesu tale vua na Kalou.

Ena ikalima ni wase ni Alama, e tarogi tiko kina e dua na taro titobu “ E rawa beka mo dou kaya, kevaka ko ni sa kacivi mo ni mate ena tiki ni gauna oqo, e rawa beka mo ni na kaya, mai lomamuni, ni ko ni sa yalomalumalumu?”¹ Na taro oqori e kena ibalebale ni yalomalumalumu sa ilavaki tudei vei keda me da vakarau kina meda lesu ki na iserau ni Kalou.

Eda vinakata kece meda vakasamataka nida sa yalomalumalumu tiko, ia eso na noda ivakarau eda sotava ena bula e vakayadrati keda ni tamata vakayago dokadoka sa bula dina tiko e lomada.

Vica na yabaki sa oti, ni rau se vakaitikoitko ga e vale na luvei keirau yalewa, au vakaraitaka sara vei rau kei watiqu na taba ni bisinisi au liutaka tiko vakacakacaka.

A noqu inaki dina meu vakaraitaka vei rau na vanua, sega ni vaka na neitou vale, era na cakava na tamata kece na ka au kaya vei ira ka sega ni tarogi au lesu mai. Ni keitou sa yaco yani ena matamata, e dau dola ga vakataki koya ni yaco yani na noqu motoka, au kurabui ni a sega ni dola ena gauna oqo. Ia, qai lako mai kina motoka e dua na yadra au se bera mada ni bau raici koya ka taroga na noqu ID ni kabani.

Au kaya vua ni sega ni gadrevi noqu ID meu draiva yani kina kabani au tarogi koya sara vakadokadoka; “O kila tiko o cei iko vosa tiko kina?”

A qai kaya lesu mai, “Ia, me vaka ni sega nomu ID ni kabani, au sega ni kila o cei o iko, niu sa tu oqo e matamata o na sega ni vakatarai mo curu mai ena itikotiko ke sega nomu ivakadinadina dodonu.”

Au nanuma meu na rai yani e muri ena iloilo meu raica ena vakacava na nodrau nanuma na luvequ yalewa, ia au kila ni rau taleitaka tiko na luvequ yalewa na veisekodi ni e yaco! O watiqu e yasaqu a kuretaka ga na uluna ni sega ni duavata ena noqu itovo. Na iotioti ni ka oya meu kere veivosoti vua na dauyadra ka kerea me vosoti au ena ivuku ni noqu itovo lolovira. “O sa vosoti,” a kaya, “ia ni sega na ID ni kabani ona sega ni curu mai nikua!”

Oti au sa qai draiva lesu vakamalua ivale me kau mai na noqu ID, niu sa mai vulica na lesoni bibi oqo: Na gauna eda digitaka kina meda kua ni yalomalumalumu, eda na vakamaduataki.

Ena Vakaibalebale eda kunea, “A nona viavialevu na tamata ena vakasivoi kina: ia ko koya sa yalomalumalumu ena dokai tiko.”² Ni gadrevi me tarai cake na yalomalumalumu, e dodonu meda kila na kena ibalebale dina ena vosa ni kosipeli.

Eso na tamata era nanuma cala ni yalomalumalumu sai koya na ka eso, me vaka, mo dravudravua. Ia na ka dina oya ni levu na tamata era dravudravua ka dokadoka ka vuqa era sa vutuniyau ia era sa yalomalumalumu Eso era sa tamata mamadua se era dau itovo malua tu ga era rairai yalomalumalumu e tuba ia e loma e sinai tu ena dokadoka.

Sa qai cava na yalomalumalumu? E kaya na Vunautaka na Noqu Kosipeli, sai koya “na yalo sa soli koya ki na lewa ni Turaga. … Sai koya na vakatavulici rawarawa. … [Sai koya] e dua na yavu talei ni tubu vakayalo.”³

E tiko dina e vuqa na madigivei keda kece meda tara cake kina na itovo Vakarisito oqo. Au gadreva meu vakadikeva mada e liu eda sa yalomalumalumu tiko mai vakacava, se me caka vakacava, meda muria na ivakasala ni noda parofita. Eda na tarogi vakadodonu yadua e rawa ni:

Eda sa tukuna tiko beka na yaca taucoko ni Lotu ena noda veimaliwai? E kaya o Peresitedi Nelson, “Nida kauta tani na yaca ni Turaga mai na Lotu ni Turaga sa qaqa sara kina vakalevu o Setani.”⁴
Eda sa vakatara beka me qaqa ga na Kalou ena noda bula ena noda ciqoma na veisureti matata ni noda parofita? “Nikua au kacivi kemuni na noda lewenilotu e veivanua taucoko mo ni liu ena nomuni biuta laivi na ivakarau ni bula kei na ivalavala ni veivakacacani. ”⁵
Eda sa uabaleta tiko beka na vuravura, ka nuitaka na vunau i Karisito vakalevu cake mai na ivakavuvuli ni tamata, ni sa vakavulica na noda parofita?⁶
Eda sa yaco beka meda sa dauveisaututaki ka kaya na ka dodonu vei ka baleti ira na tamata? A kaya o Peresitedi Nelson ena koniferedi raraba sa oti: “A ka kecega e savasava, na ka e totoka, se rogorogo vinaka se daudokai ka da rawa ni tukuna me baleta edua tale na tamata—se e matana se ni yali—oqori e dodonu me noda ivakarau ni veivosaki.”⁷

Oqo era sa ivakasala rawarawa ia e kaukauwa. Me nanumi, ni ira kece na tamata i Mosese a cakava na ka mera vakabulai kina oya mera rai kina gata parasa a laveta cake tu o koya.⁸ Ia “baleta ni sa ka wale ga na kena sala, se ni sa rui rawarawa wale, era sa lewe vuqa era a mate.”⁹

Ena koniferedi oqo eda sa rogoca ka da na rogoca tale na nodra ivakasala tawadruka na noda parofita kei na iapositolo. Sa kena gauna donu me tarai cake na yalomalumalumu ka yaco na noda nanuma qaqa me kovuti ena veivakadeitaki qaqaco cake ni Turaga sa dau vosa maivei ira na liuliu digitaki oqo.

Kena usutu, ni tarai cake na yalomalumalumu, meda na kila vinaka talega ka ciqoma ni na sega ni rawa meda valuta rawa na noda ibolebole se rawata meda gugumatua vakataucoko ena noda sasaga ga. O ira na dauvosa veiuqeti, dauvolaivola, dauveituberi, kei na dauveivakauqeti e vuravura taucoko, vakabibi ena vatavata vakalivaliva, era na kaya ni veika kece sa na vakatau ga vei keda kei na noda ivakarau. Ko vuravura e vakabauta na liga ni tamata.

Ia ena kosipeli vakalesuimai, eda vulica kina nida sa vakararavi vakalevu ga kina yalololoma ni Tamada Vakalomalagi kei na Veisorovaki ni noda iVakabula o Jisu Karisito, “ia eda sa kila nida sa vakabulai ena loloma soli wale, ni sa oti sara na veika kece eda rawa ni cakava.”¹⁰ Oqo na vuna sa ka bibi kina meda cakava ka maroroya na veiyalayalati kei na Kalou, ni da cakava oqo eda na ciqoma vakataucoko na kaukauwa veivakabulai, veivakacokotaki, kei na veivakatudonutaki i Jisu Karisito ena Nona Veisorovaki.

Na tiko ena soqoni ni sakaramede ena veimacawa ka sokalou ena valetabu ena veigauna meda vakaitavi ena cakacaka vakalotu ka ciqoma ka vakavoutaki na veiyalayalati sa ivakatakilakila nida sa kila meda na vakararavi ga vua na Tamada Vakalomalagi kei na noda iVakabula o Jisu Karisito. Oqo ena sureta kina na Nodrau kaukauwa ki na noda bula me veivuke ena noda leqa kecega ka yaco meda rawata vakaoti noda ivakarau ni noda buli.

Dua na gauna sa oti na itagede ni noqu yalomalumalumu ka kila niu vakararavi vua na Turaga a vakatovolei tale. Au a vodo tiko ena tekisi ki na rara ni waqavuka meu laki vuka vakalekaleka ki na dua na vanua sa tiko kina e dua na dredre levu me wali. O draiva ni tekisi, e sega ni lewe ni Lotu, a raici au mai muri ena iloilo ka kaya, “Au raica rawa ni ko sega tiko ni vinaka!”

“O rawa ni tukuna? Au a taroga.

“Io e rawa,” a kaya. A qai tukuna edua na ka me vaka,“O iko edua na dau raica na nodra maumalumu na tu wavoliti iko!”

Au kaya vua ni tiko e dua na dredre levu meu na walia ka tarogi au mai, “O sa cakava kece beka oqo ena nomu kaukauwa mo walia kina?”

Au sauma niu sa cakava na ka kecega au rawata.

A qai tukuna edua na ka au sega ni guilecava rawa: “Mo sa na laiva sara ena ligana na Kalou, ka na vinaka na ka kece.”

Au vakatusa niu temaki meu tarogi koya, “O kila tiko beka o cei o vosa tiko kina?” Ia au a sega ni kaya! Na ka au cakava meu vakayalomalumalumutaki au ena masu vua na Turaga ena dua na auwa na vuka o ya, ka kerea meu vukei. Niu sa biuta na waqavuka, au sa kila ni dredre o ya me wali, sa caka oti tu vakavinaka kei na noqu laki tiko kina sa sega tale mada ga ni gadrevi.

Taciqu kei na ganequ, na ivakaro, veisureti, kei na yalayala oqo mai vua na Turaga e matata ka veivakacegui: “Mo yalomalumalumu; ena tuberi iko e ligamu na Turaga na nomu Kalou, ka sauma vei iko na nomu masu.”¹¹

Meda sa yalomalumalumu meda muria nodra ivakasala na noda parofita ka ciqoma ni Kalou duadua ga kei Jisu Karisito rau na vakavoutaki keda—ena cakacaka vakalotu kei na veiyalayalati e ciqomi ena Nona Lotu—kina keda ituvaki cecere duadua ena bula oqo, ni dua na siga, eda na uasivi sara vei Karisito. Ena yacai Jisu Karisito, emeni.