Vakasama Vakasilesitieli!

Mai vei Peresitedi Russell M. Nelson

Peresitedi ni Lotu i Jisu Karisito ni Yalododonu Edaidai

Ia, na nomu digidigi nikua ena vakatautaki kina e tolu na ka: na vanua ona lai bula kina ena tawamudu, na mataqali yago cava ona tucake tale kina, kei ira oni na lai bula vata ka tawamudu.

Kemuni na taciqu kei na ganequ lomani, au vakasinaiti ena marau meu vosa vei kemuni nikua. Ena noqu yabaki ni bula, na veisiga vou yadua e kauta mai na veika tawanamaki totoka ka veibolei talega. Ena tolu na macawa sa oti, au a vakamavoataka kina na viciko ni dakuqu. Au sa tauca oti e sivia na 100 na vosa ena koniferedi raraba niu tucake tiko, ia nikua au nanuma meu na vakayacora niu dabe tiko. Na noqu masu mena kauta na Yalo na noqu itukutuku ki na lomamuni nikua.

Au se qai marautaka toka ga oqo na ika 99 ni noqu siganisucu ka tekivutaka kina na ika 100 ni yabaki ni noqu bula. Au dau tarogi wasoma ena ka vuni me baleta na bula vakadede. Edua na taro e vinaka cake sai koya “Na cava au sa vulica ena voleka ni dua na senitiuri na gauna ni bula?”

Na gauna ena sega ni vakatara vei au meu sauma vakataucoko na taro oya, ia meu na wasea mada edua vei ira na lesoni bibi duadua au sa vulica.

Au sa vulica ni ituvatuva nei Tamada Vakalomalagi vei keda e vakasakiti, ni ka eda cakava ena bula oqo e bibi, kei na Veisorovaki ni iVakabula e vakavuna me rawati kina na ituvatuva nei Tamada.¹

Niu lako curuma tiko na mosi levu ka vu mai na noqu mavoa, au sa vakila na vakavinavinaka titobu vei Jisu Karisito kei na isolisoli tawavakamacalataki rawa ni Nona Veisorovaki. Vakasamataka mada! Na ivakabula a sotava na “mosi kei na veivakararawataki kei na veivakatovolei kecega”² me rawa kina vei Koya me vakacegui keda, vakabulai keda, vueti keda—ena gauna e gadrevi kina na veivuke.³ O Jisu Karisito a vakamacalataka na ka a sotava mai Kecisemani kei Kalivari: “Na rarawa sa vakavuna vei au, na Kalou sara mada ga, ko koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagoqu.”⁴ Na noqu mavoa sa vakavuna meu dau vakananuma vakawasoma “na nona cecere na Yalosavasava ni Isireli.”⁵ Ena noqu bula cake tiko mai, na Turaga sa vakaraitaka na Nona kaukauwa vakalou ena veisala e veivakacegui ka matata.

Ena vuku ni Veisorovaki tawavakaiyalayala i Jisu Karisito, na ituvatuva nei Tamada mai Lomalagi e ituvatuva e taucoko! Na kilai vakamatata ni ituvatuva vakasakiti ni Kalou e kauta tani na veika vuni ni bula kei na veilecayaki mai na noda veisiga ni mataka. E vakatara vei keda yadua meda digitaka na ivakarau eda na bula kina e vuravura kei na vanua eda na lai bula tawamudu kina. Na vakasama lasu meda “kana, ka gunu, ka ia na marau, nida na mate ena mataka, ia ena vinaka ga vei keda”⁶ edua vei ira na lasu lialia duadua ena vuravura.

Oqo na itukutuku cecere ni ituvatuva ni Kalou: na veika sara ga ka na yaco kina na nomu bula vakayago me kena ena uasivi duadua me rawati era sai koya vata sara ga na veika ena yaco ki na nomu bula taucoko ena tawamudu me kena e uasivi duadua me rawati! Nikua, me veivuke vei iko me nomu na veivakalougatataki levu sa vakarautaka tu na tamada Vakalomalagi vei iko, au sureti iko mo vakayagataka na ivakarau ni “vakasama vakasilesitieli!”⁷ Na vakasama vakasilesitieli e kena ibalebale na noda dau vakasama vakalou. Eda vulica mai vua na parofita ni iVola i Momani o Jekope ni “sa vu ni bula tawamudu na gadreva na itovo vakayalo.”⁸

Na bula vakayago e koronivuli vinaka ni kena vulici na digitaki ni veika cecere ka tawamudu na kedra bibi. E vuqa sara na tamata era bula me vaka ni sai koya ga oqo na bula. Ia, na nomu digidigi nikua ena vakatautaki kina e tolu na ka: na vanua ona lai bula kina ena tawamudu, na mataqali yago cava ona tucake tale kina, kei ira oni na lai bula vata ka tawamudu. O koya gona, mo vakasama vaka silesitieli.

Ena imatai ni noqu itukutuku vaka Peresitedi ni Lotu, au a vakauqeti kemuni moni tekivu ena nomuni vakasamataka na icavacava. Oqo e kena ibalebale mo cakava na matanitu vakasilesitieli me nomu lalawa tawamudu ka qai vakasamataka vakavinaka se era na biuti iko evei ena bula ka tarava na digidigi yadua o cakava e vuravura.⁹

Na Turaga sa vakavulica vakamatata nio ira ga na tagane kei na yalewa era sa vauci vakaveiwatini e valetabu, ka ra maroroya na nodra veiyalayalati, era na tiko vata ena bula tawamudu. O Koya e kaya: “Na veiyalayalati, veidinadinati, ivesu, na icolacola, na veiyalayalati vosa, na cakacaka, na isema, isoqosoqo, se na veika namaki, era sega ni caka ka veiyalayalatitaki ka dregati ena Yalo Tabu ni yalayala … ena yacova walega na mate.”¹⁰

O koya gona, nida digidigi cala eda bula ena lawa vaka tilesitieli ena gauna oqo, eda sa digitaka tiko meda na tucaketale ena yago vaka tilesitieli. Eda sa digitaka tiko meda kua ni lai bula vata kei ira na noda matavuvale me tawamudu.

O koya gona, kemuni na taciqu kei na ganequ lomani, na sala kei na vanua cava kei cei o na vinakata mo lai bula tawamudu vata kaya? E nomu na digidigi.¹¹

Nio caka digidigi, au sureti iko mo rai vakabalavu—ena rai tawamudu. Vakaliuci Jisu Karisito, baleta na nomu bula tawamudu ena vakatau ena nomu vakabauti Koya kei na Nona Veisorovaki.¹² E vakatau tale ga ki na nomu talairawarawa ki na Nona lawa. Na talairawarawa e kauta mai na bula rekitaki vei iko nikua kei na icocovi e cecere, ka tawamudu ni mataka.

Nio sotava na lomalomarua, vakasama vakasilesitieli! Nio vakatovolei ena veitemaki, vakasama vakasilesitieli! Ni vakanadakui iko na bula se o ira na daulomani, vakasama vakasilesitieli! Ni dua e mate “vaka sakasaka,” vakasama vakasilesitieli. Ni dua e tauvimate bibi vakabalavu, vakasama vakasilesitieli. Ni solegi iko na veivakasosataki ni bula, vakasama vakasilesitieli! Nio bula cake mai na dua na vakacala-ka se mavoa, me vakataki au, vakasama vakasilesitieli!

Nio vakanamata ki na vakasama vakasilesitieli, namaka mona sotava na veisaqasaqa.¹³ Ena tini vakacaca na yabaki sa oti, edua na noqu itokani vakacakacaka ea vakalewai au niu sa “rui vakaogai vakalevu e valetabu”, ka sivia na dua na noqu iliuliu a totogitaki au ena vuku ni noqu vakabauta. Ia au vakadeitaka, ni noqu dau vakasama vakasilesitieli ea toso vinaka kina na noqu bula vakacakacaka.

Nio dau vakasama vakasilesitieli, na lomamu ena veisau mai vakamalua. Ona dau vinakata mo masu vakawasoma cake ka yalodina cake. Yalovinaka me kakua ni vaka edua na lisi ni volivoli na nomu masu. Na rai ni Turaga e uasivi sara mai na nomu vuku vakatamata. Na Nona sauma na nomu masu ena rawa ni o kurabui kina ka na vukei iko mo vakasama vakasilesitieli.

Vakasamataka mada na ka a tukuna na Turaga vei Josefa Simici ena nona a masuta na veivakacegui ena valeniveivesu e Liberty Jail. Na Turaga a vakavulica vua na Parofita ni ivakarau voravora a sotava ena solia vua na yalomatua ka na vinaka cake kina.¹⁴ “Ia kevaka ko sa vosota rawa,” a yalataka na Turaga, “ena vakacerecerei iko cake na Kalou.”¹⁵ Na Turaga a vakavulici Josefa tiko me vakasama vakasilesitieli ka me raitayaloyalotaka tiko edua na icocovi tawamudu ka kua ni vakanamata ki na veika dredre e yaco tiko. Na noda masu e rawa ni—ka dodonu me—veivosaki bula kei na Tamada Vakalomalagi.

Nio vakasama vakasilesitieli, ona kunea nio na levea edua ga na ka ena kauta tani na nomu galala ni digidigi. Edua ga na veivakatotogani—se qito ena initaneti, veimau ilavo, dinau, waigaga, alakaolo, cudru, iyaloyalo vakasisila, veiyacovi, se kakana mada ga—era vakacudruya na Kalou. Baleta na cava? Baleta na ka o domona vakasivia e yaco me nomu kalou. O rai kina ka sega ni rai vei Koya mo vakacegui. Ke o sotava tiko na dredre ena vuku ni dua na veivakatotogani, vaqara na veivuke vakayalo ka vakakina mai vei ira na kenadau ena veivuke o gadreva. Yalovinaka kakua ni vakatara edua na ka o domona vakasivia me butakoca na nomu galala mo muria na ituvatuva vakasakiti ni Kalou.

Na vakasama tale ga vakasilesitieli ena vukei iko mo talairawarawa ki na lawa ni tiko savasava. Na voroki ni lawa vakalou oqo ena totolo cake na kena vakadredretaka na nomu bula mai na dua tale na ka. Vei ira era sa caka veiyalayalati oti kei na Kalou, na bula ni veidauci edua vei ira na sala totolo me kau tani kina na noda ivakadinadina.

E vuqa na veitemaki sega ni oti rawa nei vunica e okati kina na voroki ni bula savasava. Na kaukauwa ni vakatubu kawa e sai koya na dodonu duadua ga vakalou ka vakatara na Tamada Vakalomalagi vei ira na luvena vakayago mera vakayagataka. O koya gona, sa virikotora kina na Kalou na idusidusi matata ena ivakavakayagataki ni kaukauwa vakalou oqo. Na veiyacovi e baleti rau ga edua na tagane kei na yalewa erau sa vakamau vakairau.

Edua na iwase levu kei vuravura era sega ni vakabauta oqo, ia na nanuma ni lewevuqa e sega ni vakatulewataka se cava e dina. Na Turaga e sa vakaraitaka ni sega ni dua na tamata tawa savasava ena rawata na matanitu vakasilesitieli. O koya gona, nio caka digidigi me baleta na bula savasava, yalovinaka vakasama vakasilesitieli. Ka kevaka o tawa savasava tiko, au vakamasuti iko mo veivutuni. Lako mai vei Karisito ka ciqoma na Nona yalayala nio na vosoti vakataucoko nio veivutunitaka vakaidina na nomu ivalavala ca.¹⁶

Nio vakasama vakasilesitieli, ona raica na veivakatovolei kei na veisaqasaqa ena dua na rarama vou. Nidua o lomana e saqata na dina, vakasama vakasilesitieli, ka kakua ni lomatarotarotaka na nomu ivakadinadina. O Paula na iApositolo a parofisaitaka ni “na vukitani eso mai na vakabauta ena gauna emuri, nira vakarogoca eso na yalo e dauveivakacalai, kei na nodra ivakavuvuli na tevoro.”¹⁷

E sega ni vakaiyalayala na nona dauveivakacalai na vuni ca. Yalovinaka vakarautaki iko. Kakua ni tauri ivakasala mai vei ira na tawa vakabauta. Vaqara na veidusimaki mai vei ira na domo o nuitaka—ira na parofita, daurairai, dauvakatakila kei na vakasolokakana ni Yalo Tabu, ka “ena vakaraitaka vei kemudou na veika kece mo dou kitaka.”¹⁸ Yalovinaka cakava na cakacaka vakayalo me vakalevutaki kina na nomu lololo mo ciqoma na ivakatakila ki na tamata yadua.¹⁹

Nio vakasama vakasilesitieli, ena tubu na nomu vakabauta. Niu tekivu cakacaka niu se cauravou gone, na kequ isau ea $15 ena dua na vula. Dua na bogi, a tarogi au na watiqu o Dantzel seu saumi ikatini tiko ena isau lailai oya. E sega. Au a veivutuni vakatotolo ka tekivu solia na $1.50 me ikuri ni ikatini ena veivula.

Ea vinaka cake beka na lotu nida tosoya cake na ilevu ni noda ikatini? E sega sara. Ia, na noqu sauma vakadodonu na noqu ikatini ea veisautaki au. Oya na gauna au a vulica kina ni saumi ikatini e baleta taucoko na vakabauta, ka sega ni baleta na ilavo. Ena noqu sauma vakadodonu na noqu ikatini, ea tadola kina vei au na katuba kei lomalagi. A yaco mai emuri eso na madigi vinaka vakacakacaka ena vuku ni neirau saumi ikatini ena yalodina.²⁰

Na saumi ikatini e gadrevi kina na vakabauta, ka tara cake tale ga na vakabauta na Kalou kei na Luvena Lomani.

Na digidigi me bulataki edua na bula savasava ena dua na vuravura sinai ena veidauci, kei na politiki e tara cake na vakabauta.

Na vakayagataki vakalevu ni gauna e valetabu e tara cake na vakabauta. Kei na nomu veiqaravi kei na sokalou e valetabu ena vukei iko mo vakasama vakasilesitieli. Na valetabu e vanua ni ivakatakila. E kea e vakaraitaki kina vei iko na sala mo toso kina dua na bula vakasilesitieli. E kea o toso voleka kina vua na iVakabula ka rawarawa kina mo rawata na Nona kaukauwa. E kea o dusimaki kina mo walia na leqa ena nomu bula, na veileqa dredre sara mada ga.

Na veicakacaka vakalotu kei na veiyalayalati ni valetabu e tiko na kedra bibi tawamudu. Eda tomana na kena tara eso tale na valetabu me caka kina na veika tabu ka rawa ni vakayacori me ka dina ena nomuni bula yadudua. Keitou marautaka me kacivaka na neitou ituvatuva me tara edua na valetabu ena veivanua yadua oqo.

Savai’i, Samoa
Cancún, Mexico
Piura, Peru
Huancayo, Peru
Viña del Mar, Chile
Goiânia, Brazil
João Pessoa, Brazil
Calabar, Nigeria
Cape Coast, Ghana
Luanda, Angola
Mbuji-Mayi, Democratic Republic of the Congo
Laoag, Philippines
Osaka, Japani
Kahului, Maui, Hawaii
Fairbanks, Alaska
Vancouver, Washington
Colorado Springs, Colorado
Tulsa, Oklahoma
Roanoke, Virginia
Ulaanbaatar, Mongolia

Na Turaga e dusimaki keitou me tara na veivaletabu oqo me vukei keda meda vakasama vakasilesitieli. E bula tiko na Kalou. Sai Jisu na Karisito. Sa vakalesui mai na Nona Lotu me vakalougatataki ira kece na luve ni Kalou. Au sa vakadinadinataka ena yaca tabu i Jisu Karisito, emeni.