Elder Alexander Dushku

Vakaitutu Raraba ena Vitusagavulu

E rau a lewena na Lotu na itubutubu nei Elder Alexander Dushku mai Boston, Massachusetts, Amerika, ni oti na nodrau sikova na World’s Fair e New York City ena 1964. A vakauqeti vakayalo o tamana ena ka a vulica me baleta na kosipeli ena dua na vale ni vakaruru e cicivaka na Lotu, ka sureti ira na daukaulotu me ra vakavulici koya kei na yalewa me a qai watina.

E rau a se vou na nona itubutubu ki na Lotu ena gauna a sucu kina, ia e kaya o Elder Dushku ni dau kila tu ga ni na laki kaulotu.

“Me yacova sara niu sa kaulotu au sa qai kila vinaka na lagilagi ni cakacaka ni kaulotu kei na kena kaukauwa dina,” e kaya o Elder Dushku, ka a veiqaravi ena Tabana ni Kaulotu mai Potukali Lisbon mai na 1986 ki na 1988. “ Sa tadola vakataucoko sara ga na mataqu ki na matanitu ni Kalou kei na kena ibalebale .”

E vakabauta o Elder Dushku ni sa cecere sara na gugumatua ni lewe ni Lotu me vakayaco veisau ena vuravura oqo.

“Ë dina ni lailai na keda iwiliwili, era vakaibalebale ka mana,” e kaya o koya. “Eda lako vata kei Karisito, ena veitauriliga. Oti eda qai lako vata vakai keda. Eda sa yaco me liga ka domo ni Turaga ena veilaveti kei na nodra vaqaqacotaki na tani.”

A sucu o Alexander Dushku enai ka 17 ni Noveba, 1966, vei rau o Nicholas kei Donna Lee Dushku mai Fairfield, California e Amerika. A vakamautaki Jennifer Burnham o Elder Dushku ena 1988 ena Valetabu e Salt Lake. E walu tiko na luvedrau ka ciwa na makubudrau.

A rawata o Elder Dushku e dua na koroi vaka-daunifika mai na Brigham Young University ena 1990. A ciqoma e dua na doketa ni juris mai na Koronivuli ni Lawa na BYU Reuben Clark ena 1993. A cakacaka o koya ena dua na kabani ni lawa me baleta na bula raraba ni tamata ena US Court of Appeals ni iKavitu ni Circuit ni se bera na nona cakacaka kei na fomu ni lawa e Kirton McConkie e Salt Lake City, ka vakanamata kina ena iMatai ni Amendment ni Yavu ni Vakavulewa ni Amerika kei na galala vakalotu.

A veiqaravi tiko vaka peresitedi ni iteki o Elder Dushku ena gauna a kacivi kina. Sa veiqaravi oti talega vakabisopi, lewe ni matabose e cake, daunivakasala ena matabisopi, ka peresitedi ni kuoramu ni italatala qase.