Na Gone Cidroi kei na Sala E Mua iVale
E dina na digidigi e kauti iko vakayawa mai na iVakabula kei na Nona Lotu, na Dauniveivakabulai e tu ena gaunisala e mua i vale,ka kidavaki iko.
E Dua na Turaga e Rua na Luvena Tagane.
E vakatokai me dua na italanoa lekaleka bau tukuni.1 Na kena sa mai vakadewataki ena udolu na vvosa e vuravura, e rawa ni rauta e rua na mileniumi, e sega ni dromu na matanisiga ke sega ni vakamacalataki na italanoa ena dua na vanua kei vuravura.
A tukuni mai vei Jisu Karisito, noda iVakabula ka Dauveivueti, ka lako mai i vuravura “ka vakabula na ka sa yali.”2 E tekivu o Koya ena vosa rawarawa oqo: “E dua na tamata sa lewe rua na luvenatagane.”3
E totolo na noda vulica e dua na veisaqasaqa vakamosi yalo. E dua na luvena tagane4 e tukuna vei tamana ni sa rauti koya na bula ivale. E vinakata o koya na nona galala. E vinakata o koya me biuta na itovo kei na ivakavuvuli ni nona itubutubu. E vinakata o koya na nona ivotavota ni yau—na gauna ga oqo.5
Ena rawa li ni ko vakasamataka na veika e vakila o tamana ni rogoca na veika oqo? Na gauna e kila kina o koya na luvena tagane e vinakata vakalevu cake me biuta na matavuvale ka rairai na sega tale ni lesu mai?
Na iLakolako Cecere
E vakila beka na luvena tagane e dua na marau ni ilakolako kei na malaude. Dua na gauna balavu, o koya sa qai tiko duadua ga. Galala mai na ivakavuvuli kei na lawa ni nona itovo ni itabagone, sa rawa vei koya me vakayacora na nona digidigi ka sega na veivakayarayarataki mai vei rau na nona itubutubu. Sega na yalo luvuci. Sa rawa vei koya me marautaka na veiciqomi ni itikotiko vakasama vata ka bulataka na nona bula ena nona lewa.
Ni yaco yani ena vanua yawa, e totolo sara nona kunea eso na itokani vou ka tekivu me bulataka na bula e dau tatadrataka tu. E taleitaki vakalevu vei ira na lewevuqa okoya, baleta ni vakayagataki ilavo vakarawarawa. Na nona itokani vou—yaga vei ira na nona cidroi—sega ni vakalewai koya. Era marautaka, vakasausau, ka tokona na nona digidigi.6
Ke tiko na vakauitukutuku raraba, ena vakasinaiti na veitabana ena itaba vata kei ira na itokani era veidredrevaki: #Bulatakanoqubulacecere! #Marauuasivi! #Mesecakamakawanakaoqo!
Na Lauqa
Ia na soqo ni marau e sega ni balavu—e sega ni dau yaco. E rua na ka e yaco: imatai, sa oti koso na nona ilavo, ka ikarua, e dua na lauqa a ravuta na vanua.7
Ni sa levu tikoga na leqa, ea qai taqaya. Na dauveivakamarautaki mamarau e sega ni tarovi rawa, sa sega ni rawa ni sauma e dua na kena, se me dua na vanua e tiko kina. Me na bula beka vakacava?
E dau lomasoli vei ira na nona icaba—era na vukei koya beka qo? Au rawa ni raici koya ni kerea tiko eso na veitokoni—me gauna ga oqo—me yacova ga ni sa tu cake tale.
E tukuna vei keda na ivolanikalou ni, “Sega e dua sa vakani koya.”8
Na nona sasaga me bula, a kunea kina e dua na dauteitei ka saumi koya me dau vakani ira na vuaka.9
Mai tarai koya vakaukauwa ni viakana, biu laivi ka tiko duadua, na cauravou ena vakataroga beka se a rawa vakacava me yaco na veika, cala vakalevu.
E sega walega ni vakaleqai koya na lala ni kete. E dua na lala mai na vu-ni-yalona. E vakadeitaka okoya ni na kune marau ni lomasoli kina nona gagadre vakavuravura, na lawa ni bula savasava e vakaitatao kina marau oya. Oqo e sa qai kila vinaka. Ia, sa dua na isau me rawa ni sauma kina okoya na kilaka oya!10
Ni sa tubu tikoga na viakana vakayago kei na vakayalo, e lesu na nona vakasama vei tamana. Ena vukei koya ni oti na veika kece sa mai yaco? O koya madaga na dauveiqaravi yalomalua nei tamana e tiko na kena kakana me kania kei na vakaruru mai na cava.
Ia me lesu vei tamana?
Sega vakadua.
Me vakatusa ki na nona koro ni sa vakasabusabutaka na nona iyau?
Dredre.
Me mai raici ira na wekana ka vakasalataki koya ni vakarogorogocataka na matavuvale ka voroka na yaloi nona itubutubu? Lesu vei ira na nona itokani e liu ka a tukuna kina ena dokadoka ni sa galala?
Sega ni vosoti rawa.
Ia na viakana, galili, kei na rarawa e sega ni gole tani—me yacova ni “sa kila yalona tale.”11
A kila o Koya na ka e dodonu me cakava.
Na Lesutale
Meda sa lesutale vei tamana, na ivakavuvuli yalo kavoro ni vale. E vica beka na drau, se udolu, na auwa e lomaleqataki luvena tu kina?
E vica beka na gauna e rai sobu kina na gaunisala e muria o luvena ka vakila tale na mosi ni sa taubale tani na luvena tagane? E vica beka na masu e cabori ena bogilevu, vakamamasu vua na Kalou me taqomaki luvena, me na kunea na dina, ka lesutale?
Ena dua na siga, ni rai yani na gaunisala galili oya—na sala e mua i vale—ka raica e dua a taubale tiko yani vei koya.
Ena rawa beka?
Dina ni yawa sara na tamata oya, na tamana e kila ena gauna oya ni oqo na luvena.
E cici yani vua, ka mokota ka reguci koya.12
“I Tamaqu,” a tagi yani na luvena, ena dua na vosa a rairai cavuqaqataka vakaudolu, “au sai valavala ca ki lomalagi, vei kemuni talega. Au sa sega kina ni yaga me’u vakatokai me luvemuni. Lesi au meu vakataka e dua na nomuni tamata sa voli na nona cakacaka.”13
Ia na tamana e sega ni waraka me tini. Wainimata e matana, e vakaroti ira na nona tamata: “Dou kauta mai nai sulu vinaka sara, ka vakasulumi koya. Daramaka talega e dua na mama i ligana kei nai vava ki na yavana. Cakava e dua na kana magiti me marautaki. Na luvequ sa kune tale!”14
Na Marau
Ena noqu valenivolavola e lili tiko kina e dua na droini ni daunidroini mai Jamani o Richard Burde. Keirau dau taleitaka kei Harriet na boroboro. E vakaraitaka e dua na yaloyalo malua ni italanoa vakatautauvata ena dua na rai titobu.
Nira marau na tamata kece ni sa lesu mai na luvena, e dua e sega—na tuakana.15
E kauta wavoki tiko eso na icolacola ni lomana.
E tiko ika o koya ena gauna a gadreva kina na tacina na nona iyau. E raica o koya e matanavotu na bibi ni rarawa i tamana.
Mai na gauna e gole kina na tuakana e tovolea o koya me laveta na icolacola ni tamana. Ena veisiga, e tovolea okoya me vakataucokotaka na kavoro ni yaloi tamana.
Ia na gone vakasabusabu oqo sa lesu tale mai, kei ira na sega ni rawa ni tarova na tamata nodra marautaki tacina talaidredre.
“Raica e vica na yabaki oqo,” e tukuna vei tamana, “kau sa sega sara ni talaidredre kina nomu vosa.” Ia o sega sara ni solia, me keitou marau vata mai.”16
E sauma lesu o tamana, “Na luvequ, na ka kecega sa tu vei au sa nomu! Oqo e sega ni vakatautauvatataka na isau se na marau. Oqo e baleta na veivakabulai. Oqo na gauna kedatou nuitaka tu na veiyabaki kece oya. Ni sa mate na tacimu oqo, ka sa qai bula tale! Sa yali ka sa qai kune tale!”17
E Dua na iTalanoa Vakaibalebale ni Noda Gauna
Kemuni na taciqu kei na ganequ lomani, itokani lomani, me vaka na italanoa vakatautauvata kece ni iVakabula, okoya oqo e sega ni baleti ira na tamata era bula na gauna ga oya. Sa baleti iko kei au, nikua.
O cei vei keda se sega ni gole tani mai na salatu ni savasava, vakasama lialia ni rawa vei keda me kunea vakalevu na marau ni keda gole ena sala vakai keda?
O cei vei keda se sega ni vakila na yalomalumalumu, bibivoro, ka gadreva na veivosoti kei na loloma cecere?
Rairai eda na vakataroga, “Sa rawa beka li na lesutale? Au na vakatokai beka me tawamudu, cati, ka levei mai vei ira na noqu itokani eliu? E vinaka beka meu yali tu ga? Na cava beka na cakava na Kalou kevaka au tovolea meu lesutale?
Na italanoa vakatautauvata oqo e solia na kena isau.
Na Tamada Vakalomalagi ena cici vei keda, na yalona e vuabale ena loloma kei na yalololoma. Ena mokoti keda o Koya, vakasulumi keda, e na mama i ligada, vava kina yavada, ka kacivaka, “Edai eda marau! Na luvequ, ko sa mate, sa qai bula tale!”
Na marau o Lomalagi ena noda lesu mai.
Reki e Sega ni Cavuti Rawa ka Sinai ena Lagilagi
Meu na taura mada e dua na gauna oqo meu vosa vei kemuni yadua?
Se mani vakacava na veika e yaco ena nomu bula, au voqataka ka kacivaka na vosa ni noqu itokani lomani ka apositolo Elder Jeffery R. Holand: “Ena sega ga ni rawa vei iko mo lutudromu sivita na rarama tawa vakaiyalayala ni [Veisorovaki iKarisito].”18
Dina na veidigidigi e kauti keda vakayawa mai vua na iVakabula kei na Nona Lotu, na Dauniveivakabulai levu e tu ena salatu ka mua ki vale, kidavaki iko tiko. Ni keda na lewe ni Lotu i Jisu Karisito ni Yalododonu Edaidai segata meda muria na Nona ivakaraitaki ka mokoti kemuni me vaka na tacida se ganeda, kei na noda itokani. Keda reki ka marau vata kei iko.
Na nomu lesu mai ena sega ni vakalailaitaka na kalougata ni eso tale. Ni sa tawayalani na loloma nei Tamada, kei na veika sa soli vua e dua e sega ni vakalailaitaka vakalailai na nodra itutu vaka ulumatua eso tale.19
Au sega ni vakalecalecava ni rawarawa ni caka na lesu mai. Au rawa ni vakadinata oya. Sa rawa, vakaidina, me dua na vakatulewa bibi duadua mo na vakayacora.
Ia au vakadinadinataka ni na gauna o vakatulewataka mo lesu ka taubale ena salatu ni noda iVakabula kei na Dauveivueti, na Nona kaukauwa ena curu mai ki na nomu bula ka veisautaki.20
Era na reki na Agilosi mai lomalagi.
Vakatalega kina o keda, na nomu vuvale vei Karisito. Eda kila kece na kena irairai me dua na cidroi. Eda vakararavi kece e veisiga ena kaukauwa vata ni veisorovaki ni Karisito. Eda kila na sala oqo, keda na taubaletaka vata.
Sega, na noda sala ena sega ni galala mai na lolosi, vutugu, se rarawa. Ni keda sa yaco rawa mai ena “vosa i Karisito kei na dei ni nomudou vakabauti Koya, ka vakararavi vakatabakidua sara ki na nona vinaka o Koya sa kaukauwa me veivakabulai.” Ka keda na “toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega,”21 Eda na “reki e sega ni cavuti rawa ka sinai ena lagilagi,”22 ni sa noda kaukauwa o Jisu Karisito!23
Sa noqu masu ni keda yadua me rogoca, ena italanoa vakatautauvata bibi oqo, na domo ni Tamada e kacivi keda meda gole ki na salatu e mua ki vale—me tiko vei keda na doudou meda veivutuni, ciqoma na veivosoti, ka vakamuria na salatu e lesu ki vua na Kalou dauloloma. Au vakadinadinataka na veika oqo au vakalougatataki kemuni ena yaca i Jisu Karisito, emeni.