iTukutuku ni Lotu

Nodra Veiqaravi na iApositolo kei na Parofita vei ira na Yalododonu ena veiyasai Vuravura

Ena Siga ni Veivosoti e Vuravura ena Julai, a wasea kina o Peresitedi Russell M. Nelson e dua na itukutuku ni veivosoti ena itukutuku raraba. “Na veivosoti e sega walega ni dua na cakacaka ni dua ga na gauna ia e dua na ivakarau tudei e gadrevi kina na vosota, yalololoma, kei na veiciqomi,” a kaya. “E sega ni dau rawarawa me da vosoti ira era sa vakararawataki iko. Sa rawa ni o ciqoma na kaukauwa mai vei Jisu Karisito.”

Peresitedi Dallin H. Oaks Na iMatai ni Daunivakasala ena Mataveiliutaki Taumada, e vakauqeti ira na itabagone qase cake e vuravura raraba ena dua na lotu ni Me 21 me ra vakamuria e dua na rai tawamudu ni ra lakova na “gauna dredre.”

“Se mani vakacava na keda duidui ena veimataqali veika e bulia na Tamada Vakalomalagi, e lomani keda kece o Koya, ka tiko na noda ivotavota yadua ena Nona ituvatuva uasivi ni marau,“ a kaya o Peresitedi Oaks. “Eda vakaraitaka noda loloma Vua ena noda muria Nona ivakaro, oka kina noda lomani ira na Luvena.”

O Peresitedi Henry B. Eyring, iKarua ni Daunivakasala ena Mataveiliutaki Taumada, a vakayaloqaqataki ira na Yalododonu Edaidai era a tiko ena vakatabui ni Valetabu e Saratoga Springs Utah enai ka 13 ni Okosita mera dolea ena nodra vakabauta kei na igu na vale vou ni Turaga.

Sa soli vei ira na lewe ni Lotu “na valetabu oqo me ivakatakilakila ni nona veivakabauti na Turaga … kei na Nona yalodei ni [ra] na dolea ena vakabauta kei na igu e cecere cake,” a kaya o Peresitedi Eyring. “Na valetabu oqo sai koya na vanua mo na taura vakawasoma kina na kaukauwa ni veiyalayalati ni valetabu. E kila na yalomu. E kila o Koya na nomu gagadre mo laveti cake ka yaco mo tamata buladodonu cake—me vaka ga ni sa yaco na vuravura me veileti ka lutu tani.”

Ni ra veitalanoataka ka wasea na lewenilotu na itukutuku ni Veivakalesui mai, era na vakila eso tale na dina ni nodra vosa, e kaya o Peresitedi M. Russell Ballard, na Peresitedi Vakatawa ni Kuoramu ni iApositolo Le Tinikarua. “Na ka vakasakiti duadua ena itukutuku kei vuravura a yaco ena Veikau Tabu ena 1820,” e kaya o koya. “A tadola ko lomalagi.”

Ena nona vosa tiko vei ira na lewenilotu kei na daukaulotu mai Toronto, Ontario, ena Epereli, a vakadinadinataka kina o Peresitedi Ballard na veikacivi vakaparofita nei Josefa Simici. “A rairai dua beka na ka a curuma na nona bula—mai buradelana ki na qeteqete ni yavana—ni rogoca ni kaciva na Tamada Vakalomalagi na yacana, ‘ Josefa, oqo na Noqu Gone ni Toko. Mo Rogoci Koya!” [raica na Josefa Simici—Ai Tukutuku 1:17] Oqori na neimami itukutuku,” a tukuna vei rau na daukaulotu.

Ena Epereli, a veisiko o Elder Dieter F. Uchtdorf ki Varanise, Ijipita, kei Isireli. A tiko ena soqoni ni sakaramede mai Ijipita, ka vosa vei ira na gonevuli ena Valenibose ni Brigham Young University e Jerusalemi, ka sikova na veivanua tabu.

“Sa dua na ka rekitaki e sega ni tukuni rawa ni Turaga sa digitaki au meu dua vei ira na Nona tisaipeli ena gauna oqo,” a kaya o koya. “E dina sara, eda gadreva kece me da tisaipeli, ka gadrevi me da bulataka na veiyalayalati eda sa cakava.

“Ia meu tiko eke ka vakadinadinataka niu sa tisaipeli, me vaka era a cakava na iApositolo ena gauna e liu, e dua na ka e vakatakatara na yaloqu ka laveti au ki na itagede e sega ni vakasamataki rawa. Ena yalo e cecere ni yalomalumalumu, au vakila ni sa nuitaki au na Turaga meu ivakadinadina baleti Koya kei na Yacana. Sa dua na ka rekitaki me da lakova na vanua era a bula kina na noda iApositolo ka lako voli.”

O Elder David A. Bednar a vakatabuya na nodrau vale vakalesuimai o Josefa kei Emma Simici mai Katiladi, Oaio, ena 26 ni Okosita. A tukuna o Elder Bednar vei ira e rauta ni 300 na tamata, oka kina o ira na iliuliu ena itikotiko raraba kei na iliuliu vakalotu: “Na vale oqo e sega walega ni vale me baleta na veika ni itukutuku makawa. Na vale oqo a nodrau itikotiko dina o Josefa kei Emma Simici—na vanua erau a bula voli kina ena dua na gauna balavu sara ni bera na mate nei Josefa.”

A vosa o Elder Quentin L. Cook ena koniferedi vakayabaki ni Univesiti e Brigham Young ena Okosita. A raica ni ra sa vakatura tiko na kenadau ena ituvaki ni vakasama ni veiqaravi vakaulotu e vakarautaka e dua na iwalewale ni yalomatua ni vuli ka sa dua na vakavakarau ki na vuli torocake.

E sivia ni rua na ikatolu ni gonevuli e BYU era sa kaulotu oti, a kaya o Elder Cook. “Vakatau tiko ki na simesita, oqori e sivia na 21,000 na daukaulotu oti. Vakasamataka mada na kaukauwa era sa kauta yani na gonevuli e BYU e vuravura raraba. Me kena ikuri, vakasamataka na sala e vaqaqacotaka kina na nodra ituvaki ni vuli ena itikotiko oqo na veika era sotava ena nodra kaulotu.

Ena dua na veisiko ki Niu Siladi kei Ositerelia ena Me, a veisureti o Elder D. Todd Christofferson vei ira na Yalododonu Edaidai mai Niu Siladi me ra vakavakarau ki na vakatabui ni Valetabu e Auckland ena 2024 ka mera savasava ka Vakarisito vakalevu cake sara.

A sureti ira mera tarogi ira vakai ira, “Na cava beka au rawa ni cakava meu na tamata savasava cake, meu dua na isolisoli kei na iloloma vinaka cake meu vakaraitaka vua na Turaga ena siga ni veivakatabui?”

O Elder Neil L. Andersen a vakadinadinataki Jisu Karisito ena dua na ilesilesi ni Sepiteba ki Esia. “Na veika au sotava vaka-iApositolo ni Turaga sa solia vei au e dua na ivakadinadina ni o Jisu na Karisito ka sa dusimaka tiko na Nona cakacaka ena vuravura oqo mai vua na Nona parofita kei ira na Nona iApositolo,” e kaya o koya. A tiko o Elder Andersen ena iWasewase ni Vualiku kei Esia ena Lotu me sota ka veiqaravi vei ira na Yalododonu Edaidai mai Korea, Mongolia, kei Japani.

Ena ika 22 ni Epereli, a sota o Elder Ronald A. Rasband kei na peresitedi ivukevuke ni Ceva kei Aferika, o Paul Mashatile, ikarua ni iliuliu vei peresitedi ni Ceva kei Aferika. Oqo e sa tukuna tiko na imatai ni gauna me sota kina e dua na iliuliu ni Lotu kei na dua na vakailesilesi cecere vakamatanitu ni Ceva kei Aferika.

Era railesuva na iliuliu oqo na sala eso sa veivuke kina na Lotu me baleta nodra vakacegui na tamata mai na nodra rarawa ka vakaukauwataki ira na tamata ena Ceva kei Aferika, e kena isau e R240 na milioni (sivia na $13 na milioni ilavo ni Amerika) ena iyaya ni veivuke mai na 2018. Na cau era oka kina na veivuke ena leqa tubukoso baleta na sasaga ni nodra cakacaka na itabagone, parokaramu ni teitei me veivukei, kei na tarovi ni veivakacacani vei ira na tagane se yalewa.

E kaya o Elder Rasband ni nuitaka tiko ni veisasaga oqo e vakaraitaka ni Lotu ena “tiko eke ena dua na gauna balavu. Eda cakava oqo meda muria kina e rua na ivunau levu ni Turaga: meda lomana na Kalou ka lomani ira na wekada.”

Ena dua na veisiko ena Sepiteba ki Iceland, Sikoteladi, kei Igiladi, a vakamatatataka kina o Elder Gary E. Stevenson na kena gadrevi vei keda na Yalododonu Edaidai me da “yalovata ka duavata” (Mosese 7:18) ka “yavutaki na bula vei Jisu Karisito,” ka cakava na veika kece eda rawata me da muri Koya. Ena veitomani nei watina, o Lesa, a veisiko o Elder Stevenson, ki Reykjavik, Iceland, ena ika 7 ni Sepiteba ni bera ni gole ki Edinburgh, Scotland, kei Northampton, Igiladi, ena 9–10 ni Sepiteba.

Ena dua na lotu ena Marriott Center ena Macawa ni Vuli ena Brigham Young Univesiti ena 22 ni Okosita, a vunau kina vakatitobu o Elder Dale G. Renlund ena sala era cakacaka vata kina na vakadidike, inaki, kei na vakabauta me rawa kina na ivakatakila. Ni ra duidui lako, na vakadidike, inaki, kei na vakabauta era na tawayaga e vakavulica o Elder Renlund. Na tolu na ka oqo me ratou cakacaka vata.

“Na vakabauta ‘ni sa sega na cakacaka’ [Jemesa 2:20] ena sega ni vakarabailevutaki koya. Ena tubu ga na vakabauta ena dodonu kei na inaki, ka salavata kei na cakacaka vakayalo tale eso. Me kena ikuri, na dodonu, na inaki, kei na vakabauta ena yaco taumada me sega walega ni ciqoma na ivakatakila yadua ia me kilai vinaka na ivakatakila oya.”

Ena ika 15 ni June, rau a sota o Elder Gerrit W. Gong kei Nona Eminence Sheik Osman Nuhu Sharubutu, na iLiuliu ni Matanitu o Imam kei Grand Mufti ena Republic of Ghana. A yaco na sota vata oqo ena nodratou itikotiko na Grand Mufti e Accra.

E wasea o Elder Gong na sala e mareqeta kina na Lotu i Jisu Karisito ni Yalododonu Edaidai na noda itubutubu taumada, o Atama kei Ivi, me vakataki ira na Musolomani: “O keda talega, eda vakadinata ni da lako mai vei rau na itubutubu vata ka dodonu me da bula vata vakamatavuvale.” E tukuna o Elder Gong ni da liutaki tiko mai vua e dua na parofita ni Kalou, o Peresitedi Russell M. Nelson, ka tautauvata na nona ivakavuvuli vei ira na Imam. “E vakavulica na neimami parofita me keimami laiva me qaqa tikoga na Kalou, e vakavulica me keimami dauniveisaututaki, ka vakavulica me keimami vukei ira na itabagone me ra vuli ka tuberi me rawa ni ra rawa ka ena bula oqo, ka vakavulici keimami mera vakaukauwataki na marama kei na itabatamata era tubu cake tiko mai. Oqo na veika au sa rogoca mai vei kemudou nikua.”

A veisiko o Elder Ulisses Soares me 10 na siga ki Chile, Uruguay, kei Argentina ena June. Na nona gauna mai Argentina a laki vosa ena dua na koniferedi ni veimatalotu, dua na veivakatarogi kei na dua na dauvolaitukutuku kilai levu ni Argentine, ka veiqaravi vei ira na lewe ni Lotu.

“Na vakacegu e tekivu ena nona rokovi na tamata yadua,” a kaya o Elder Soares vei ira era soqoni vata mai ki na Vakalawataka ni Vuravura ni Veimatalotu kei Veitovo Vakavanua mai Buenos Aires. “Na ivakavuvuli ni bula dokai vakatamata e rawa ni duidui mai na duidui itovo vakavanua yadua, ia e cakacaka me veivakadeitaki ena dua na vuravura veivukiyaki ka veiveisau. Na dodonu vakatamata e vakadonutaka na tatakelokelo ni galala, na vutuniyau, kei na madigi. Na veidodonu oqori mera na vakayagataki vakararaba e vuravura.”