“Rid Sloslo: Stap Luk Sevya insaed long Ol Skripja,” Liahona, Jenuware 2024.
Rid Sloslo: Stap Luk Sevya insaed long Ol Skripja
Taem yumi yusum lukluk ia blong art, i save helpem yumi blong luk Jisas Kraes insaed long Buk blong Momon.
La Pietà, i kam long Michelangelo
I tekem Michelangelo ova long wan yia blong krietem La Pietà, wan naesfala ston we oli katem blong Meri we i stap holem bodi blong Jisas afta we oli kilim ded Hem. Leonardo da Vinci i spendem moa taem long hemia, abaot tri yia, blong pentem art blong hem we ol man oli save gud long hem blong Las Sapa.
Sapos yu mas traem blong talem, yu ting se hamas taem nao wan visita long wan art miusiom i spendem—long averej—blong lukluk long wanwan wok blong art?
Ansa hem i 17 seken, folem wan stadi.1
Traem pikjarem: 17 seken blong stap lukluk wan wok blong art we artis ia i spendem ol yia blong krietem.
Yumi save andastanem hemia. I gat ol handred blong ol peinting mo ston we oli katem long wan miusiom, mo yumi ol pipol we yumi bisi. Mekem se yumi hariap mo tekem hamas we yumi save tekem. Mo from yumi fraet blong mestem wan samting, long en blong dei, yumi mestem stret stamba tingting blong art—ol filing mo tingting we artis i wantem yumi blong eksperiensem. Ae blong yumi i lukluk evri pis blong art long miusiom, be rili se yumi no luk eni long ol samting ia. Afta yumi aot long miusiom we yumi taet mo no kasem insperesen. Maet bae yumi tingting tu se be ol pipol oli luk wanem long art—mo maet tingting ia i winim olgeta se art hem i blong olgeta we oli skul gud, mo i no blong evriwan.
Lukluk Sloslo
Blong ansa long problem ia, ol art miusiom raon long wol oli stap leftemap tingting blong ol visita blong praktisim wan samting we oli singaotem “lukluk slo.”2 Oli invaetem ol pipol blong jusum wan long ol wok blong art long miusiom, oli filim gud, mo luklukgud art ia blong wan taem—5 kasem 10 minit. Lukluk art ia long ol defren daereksen. Go kolosap blong luk ol ditel. Stanap i gobak biaen blong lukluk art ia fulwan. Samtaem, oli stap talem long ol visita blong no ridim saen blong miusiom blong wokemaot ol art wok—oli ridim nomo afta we oli gat wan janis blong mekemap ol tingting blong olgetawan mo ol samting we oli faenem blong olgetawan abaot art ia.
Lukluk sloslo i bin jenisim art miusiom eksperiens blong plante pipol. Sam we oli neva tekem olgetawan se oli laekem art, oli kam blong laekem art fulap. Oli kasem tras long olgetawan se oli save faenem mining long eni wok blong art, mo oli faenem glad insaed long wanem oli faenem. Oli lanem se oli no nidim wan digri long kolej blong art histri blong mekem se art i save tajem hat blong olgeta; oli nidim nomo blong slo daon mo givim wan janis long art blong mekem wanem we oli krietem hem blong mekem.
?Yumi save yusum ol semmak prinsipol ia long fasin blong stap ridim ol skripja?—eksampol, long stadi blong yumi blong Kam Folem Mi blong Buk blong Momon long yia ia?
Yumi save se Buk blong Momon, olsem wan narafala testeman blong Jisas Kraes, oli bin raetem wetem tingting ia blong mekem fet blong yumi long Sevya i kam moa strong (luk long 1 Nifae 6:4). Yumi save se ol profet blong God oli bin raetem tru long insperesen, speseli blong taem blong yumi tedei (luk long, eksampol, Momon 8:35). Yumi save se ol profet blong bifo we oli bin raetem Buk blong Momon, oli bin mekem wetem bigbigfala sakrifaes. Proses ia nomo blong raetem ol toktok long ol buk we oli wokem long aean, i had wok mo oli mas lukaotgud taem oli mekem (luk long Jekob 4:1). Mo sam long olgeta oli putum laef blong olgeta long denja blong sevem gud rekod ia mekem se i save stap blong yumi tedei (luk long Momon 6:6; Moronae 1).
Be yet samtaem long bisi laef blong yumi, yumi harhariap long taem blong rid long Buk blong Momon. Maet yumi lukluk hariap long sam ves long taem blong brekfas o long rod i go long wok. Maet ol ae blong yumi i pas antap nomo long evri toktok long wan japta, be i nogat fulap samting i draon insaed long yumi. I no evri taem, be samtaem, yumi sarem buk o ap mo filim se i nogat samting i defren long taem we yumi stat blong rid mo taem yumi finis.
Rid Sloslo
Sapos wan wok blong art we i gud i nidim blong oli soem tangkyu from tru long fasin blong lukluk sloslo, maet Buk blong Momon i nidim blong yumi “ridim sloslo tu.” Hemia i no minim se i nidim blong ol skripja stadi blong yumi oli longwan moa, be nomo se maet bae yumi kasem moa gud taem yumi jenisim spid blong yumi. Maet stadi blong tedei i lukluk moa long tri o fo ves nomo bitim blong hariap mo flatem wan japta. Be yumi draonem gud yumiwan insaed long ol ves ia. Yumi luksave ol ditel, ol toktok, mo ol sentens. Yumi tingting hevi from wanem wanwan long ol ves ia i maet impoten—?oli tijim mi wan samting abaot Sevya? ?Hem i mekem lav mo fet blong mi long Sevya i kam moa dip? ?I gat wan samting we Hem i wantem mi blong save?
Rid sloslo i letem yumi blong luksave ol samting insaed long Buk blong Momon we sapos no, bae yumi no bin save luksave. Be moa impoten, i save helpem yumi blong luk Sevya moa insaed long buk ia we oli raetem blong testifae abaot Hem. Rid sloslo i wan wei blong openem ol ae, maen, mo hat blong yumi long testemoni blong Buk blong Momon we i gat bigfala paoa, abaot Jisas Kraes. Hem i wan wok blong art wetem insperesen, taem yumi tekem taem blong lukluk tru long hem, i save jenisim laef. Long wan moa dip wei, blong stap luk Sevya insaed long ol skripja, i save gat bigfala paoa long ol tingting mo filing blong yumi—mo oltaem tu insaed long laef blong yumi.
Eksampol, tekem se yu stap ridim 1 Nifae japta 1. Ves 6 i pulum ae blong yu, mekem yu slo daon mo tekem taem blong yu long ples blong wan taem. Maet “longfala faea we i go antap” we Lihae i luk “antap long wan ston,” i pulum tingting blong yu. Hemia i no wan nomol fasin blong faea. ?Hemia i save minim wanem? Maet ol tingting blong yu i go long ol narafala faea we i go antap we oli tokbaot insaed long ol skripja (ol futnot i save helpem yu long ples ia). Yu save tingting hevi long from wanem taem ia we Lod i stap oli stap komperem plante taem long faea. ?Hemia i talem wanem abaot Hem? ?Hem i bin stap olsem wan longfala faea we i go antap insaed long laef blong yu?
Hem i fulap samting blong tingbaot. Mo yu no iven finisim ves ia yet.
Yes, i gat valiu blong ridim Buk blong Momon hariap. Hem i save helpem yumi blong lanem ful storian mo luksave ol bigfala stamba toktok we i stap hapen oltaem. Be i gat plante blong lanem abaot Jisas Kraes insaed long ol ditel blong Buk blong Momon, mo samtaem bes wei blong luk ol ditel ia i blong slo daon mo lukluk gud.
Nifae i talem ol toktok we hem i raetem insaed long Buk blong Momon, “Ol toktok ia … oli ol toktok blong Kraes, mo hem i bin givim ol toktok ia long mi; mo … Kraes bae i soem long yufala long las dei, wetem paoa mo bigfala glori, we oli ol toktok blong hem” (2 Nifae 33:10–11). Yu no nid blong kam wan gudfala man blong rid blong faenem ol toktok blong Sevya insaed long Buk blong Momon. Yu jes nidim blong slo daon mo givim wan janis long Buk blong Momon blong mekem wanem we oli krietem hem blong mekem—bildim fet blong yu long Jisas Kraes.